د امریکا ټاکل شوي ولسمشر ډونالډ ټرمپ د تحقیقاتو فدرالي ادارې (FBI) د نوي مدیریت لپاره خپل غوراوی اعلان کړ.

ډونلډ ټرمپ په ډاګه کړې، چې د FBI د راتلونکي رییس په توګه یې د کاش پټل د نومولو پرېکړه کړې ده.

ټرمپ په خپله ټولنیزه شبکه کې لیکلي؛ ویاړم، چې ۴۴ کلن کش پټل به د تحقیقاتو فدرالي ادارې د راتلونکي رییس په توګه دنده ترسره کړي.

دغه راز د FBI اوسنی رییس کریسټوفر ری باید له دندې ګوښه شي او یا ووځي.

کریسټوفر په ۲۰۱۷ کال کې د ټرمپ لخوا دغه مقام ته ټاکل شوی و او د خپلې لس کلنې دورې درې کاله یې پاتې دي.

پټل، چې هندي نژاد دی؛ د ټرمپ په لومړي پېر کې یې غوښتي وه، چې د FBI د استخباراتو راټولولو هڅې ودروي او له هر هغه کارمند څخه یې پاکه کړي، چې د ټرمپ د اجنډا ملاتړ نه‌کوي.

هغه د اف‌بي‌آى د ریاست د ترلاسه کولو لپاره د امریکا د مشرانو جرګې تصویب ته اړتیا لري.

دا په داسې حال کې ده، چې ډونلډ ټرمپ د ری د ماموریت پر مهال په پنسلوانیا کې د ټاکنيزو کمپاینونو پر مهال د وژونکي برید هدف وګرځېد او پر غوږ ټپي شو.

د خیبر پښتونخوا د کورمې په اړوند  سیمه کې شیعه او سني مذهبي ډلو د سیمه‌ییزو حکومتي ادارو او قومي مشرانو پر منځګړیتوب پر اووه ورځني اوربند هوکړه وکړه.

د منځګړي پلاوي غړی او د خیبر پښتونخوا ایالت ویاند محمد علي سیف رسنیو ته په خبرو کې ویلي؛ دواړو لوریو پر ۷ ورځني اوربند هوکړه کړې، چې په بهیر کې به یې د ښځو او ماشومانو هم په ګډون زندانیان خوشې او مړي هم تبادله شي.

ویل کیږي، چې دا جګړې پر مسافر وړونکیو موټرو د ناڅرګندو وسلوالو له برید وروسته پیل او په کې له ۶۷ ډېر کسان وژل شوي او لسګونه نور ټپیان دي.

د جاپان خبري سرچینې په جنیوا کې له درې اروپایي قدرتونو سره د ایران له خبرو اترو خبر ورکړی دی.

د جاپان کیوډو خبري سرچینې د یکشنبې پر ورځ ( د لیندې څلورمه ) راپور ورکړې؛ ایران څو ورځې وروسته له هغې، چې د ملګرو ملتونو د اټومي انرژۍ نړیوالې ادارې د تهران پر ضد پرېکړه لیک تصویب کړ؛ نو ایران و پتېیله، چې د خپل اټومي پروګرام په اړه د لیندۍ پر نهمه / د نومبر پر نهه‌ویشتمه په جینوا کې له درې اروپایي هېوادونو سره خبرې وکړي.

ایران له دې پرېکړه لیک څو ورځې مخکې غبرګون وښود او د غني کولو لپاره یې د نورو سنټرفیوژونو د فعالولو اعلان وکړ.

د ایران یوه لوړ پوړي چارواکي د راتلونکې جمعې پر ورځ د دغې غونډې د ترسره کیدو له تائیدولو سره زیاته کړه: تهران تل پدې باور دی، چې اټومي مسئله باید د ډیپلوماسۍ له لارې حل شي. ایران هیڅکله له خبرو اترو ‌‌ه نده کړې.

د جوبايډن د ولسمشرۍ پر مهال د ايران او امريکا ترمنځ د اټومي مسئلې په اړه په غير مستقيم ډول خبرې اترې شوې وې؛ خو دا خبرې تر اوسه کومې ځانګړې پايلې ته رسېدلې ندي.

په ۲۰۱۸ کال کې د ټرمپ ادارې له شپږ سترو قدرتونو سره د ایران د ۲۰۱۵ کال له اټومي هوکړې ووت او د ایران پر حکومت یې سخت بندیزونه ولګول، چې تهران یې په ځواب کې د دغه تړون د یورانیمو د غني کولو په ګډون د سنټرفیوژونو د شمېر د پراخولو له ځینو محدودیتونو سرغړونه وکړه.

په هرصورت، ټرمپ، د JCPOA د ویجاړونکي په توګه په سپتمبر کې د خپل ټاکنیز کمپاین پر مهال ویلي وه، چې مونږ باید یوې هوکړې ته ورسیږو؛ ځکه، چې پایلې یې د منلو وړ ندي او باید هوکړه وکړو.