د روسیې ځانګړي استازي په کابل کې د افغانستان بهرنیو چارو وزارت له چارسمبالي( سرپرست) امیر خان متقي سره د دوه اړخیزو ډیپلوماټیکو اړیکو د کچې پر لوړولو، د اقتصادي او سوداګریزو اړیکو پراختیا او ځینو سیمه‌ییزو مسایلو خبرې وکړې.

د بهرنیو چارو وزارت د خپرې شوې خبرپاڼې له مخې؛ دغه راز امیر خان متقي د روسیې له فډراسیون مننه وکړه، چې په مسکو کې د سفیر پر کچه د اسلامي امارت ډیپلوماټ مني او ژمنه یې وکړه، چې د افغانستان حکومت به په نږدې راتلونکي کې مسکو لپاره د سفیر پر کچه ډیپلوماټ معرفي کړي.

د افغانستان لپاره د روسیې ولسمشر ځانګړي استازي ضمیر کابلوف هم پخپل وار وویل، چې هېواد ته یې له افغانستان سره د اړیکو پراختیا اړینه ده او د همدې لپاره یې دا اقدام وکړ، چې د اړیکو د پراختیا په لار کې خنډونه لرې شي.

د هېواد د بهرنیو چارو وزارت چارسمبالي د روسیې فډراسیون له وروستي اقدام ، چې د افغانستان اسلامي امارت یې د ممنوعه ډلو له نوملړه لرې کړ؛ مننه وکړه.

کابلوف ویلي؛ په راتلونکې می میاشت کې به د کازان فورم په څنډه کې د روسیې او افغانستان د دوه اړخیز دایمي کمیسیون د کار د پیل لپاره هم ځانګړې غونډه ترسره شي.

ویل کیږي، چې دواړو لوریو د افغانستان اسلامي امارت او روسیې فډراسیون ترمنځ دوه اړخیزو اړیکو د کچې لوړوالی مهم وباله او دا یې د دواړو هېوادونو ترمنځ د اړیکو نوی پړاو یاد کړ.

د کرنې، اوبو لګولو او مالدارۍ وزارت چارسمبالی(سرپرست) عطاءالله عمري په کابل کې د چین د خصوصي سکټور له پلاوي او استازو سره وکتل، چې ورسره یې د همکارۍ پراخولو، کرنې، مالدارۍ، اوبو لګولو، پانګونې او له افغانستان سره د چین د تجربو شریکولو په اړه خبرې اترې وکړي.

د کرنې وزارت د سې‌شنبې پر ورځ د دې غونډې اعلان وکړ او څرګندوي، چې د چین پلاوي د افغانستان د کرنې او مالدارۍ په سکټور کې د پانګونې لپاره د بیجینګ د خصوصي سکټور پر لېوالتیا ټینګار وکړ او د ځمکو د اجارې په ګډون د آسانتیاوو له برابرولو وروسته یې د پروژو د عملي پیل لپاره د چمتووالي ډاډ ورکړ.

د چین پلاوي د صنایعو او سوداګرۍ وزارت له چارسمبالي نورالدین عزیزي سره هم خبرې اترې وکړې. د دې غونډې پر مهال عزیزي ویلي، چې دوی بهرنیو پانګوالو ته ټولې آسانتیاوې برابروي.

د یادونې ده، چې په تېرو درې کلونو کې ډېری چینایي شرکتونو د هېواد په کانونو کې پانګونې ته لېوالتیا ښودلې؛ خو دا لومړی ځل دی، چې چینایي پانګوال غواړي په افغانستان کې د کرنې په سکټور کې پانګونه وکړي.

د روسیې د اقتصادي پراختیا وزارت چارواکو ویلي، چې افغان محصولات به د روسیې- د کازان اسلامي نړۍ په شپاړلسم نړیوال اقتصادي فورم کې نندارې ته وړاندې شي.

د روسیې د اقتصادي پراختیا وزارت مشر پاول کالمیچوک د دوشنبې پر ورځ( د غویی لومړۍ) په یوه رسنیز کنفرانس کې ویلي، چې د افغانستان محصولات به د روسیې- د کازان اسلامي نړۍ په شپاړلسم اقتصادي فورم کې نندارې ته وړاندې شي، چې په راروانه می میاشت کې ترسره کیږي.

هغه زیاته کړې؛ د تاتارستان حکومت منلې، چې د افغان توکو او تولیداتو د نندارتون جوړولو لپاره به اړینې آسانتیاوې برابرې کړي.

د روسي دې چارواکي ویلي، چې دا نندارتون به د افغانستان د اقتصادي وړتیاوو د پېزندلو لپاره یو ځانګړی فرصت وي.

پاول کلمیچوک وایي: “دا نندارتون به خامخا ډېر پام ځانته راواړوي؛ ځکه، چې په روسیه کې پر طالبانو (اسلامي امارت) د بندیزونو د لرې کولو پرېکړه شوې ده.”

مخکې له دې د روسیې سترې محکمې د هېواد د لوی څارنوال غوښتنه منلې وه، چې د اسلامي امارت د فعالیتونو بندیز وځنډوي.

د افغانستان لپاره د روسیې ځانګړي استازي ضمیر کابلوف هم اعلان کړی و، چې د روسیې او افغانستان ترمنځ به د دې فورم په څنډه کې یوه لویه سوداګریزه غونډه هم ترسره شي.

د کازان شپاړسم نړیوال اقتصادي فورم ‘روسیه – اسلامي نړۍ: کازان فورم’ به د می له ۱۳ څخه تر ۱۸ پورې په کازان کې ترسره شي.