د افغانستان په چارو کې د پاکستان د ځانګړي استازي محمد صادق پر مشرۍ یو لوړ پوړی پلاوی د یو ورځني سفر لپاره د افغانستان پلازمېنې کابل ته راورسېد.

دا پلاوی به د پاکستان او افغانستان د همغږۍ ګډې کمیټې په غونډه کې ګډون وکړي.

اسلامي امارت کابل ته د پاکستاني پلاوي راتګ تائیدوي او وايي، چې د پلاوي د سفر موخه د پاکستان او افغانستان د همغږۍ ګډې کمېټې په غونډه کې ګډون دی.

د افغانستان اسلامي امارت ویاند ذبیح الله مجاهد آریانا نیوز ته ویلي: “دا اوومه غونډه ده، چې کله په کابل او کله په اسلام‌آباد کې جوړیږي.”

د ذبیح الله مجاهد د څرګندونو له مخې؛ په دې غونډه کې به د امنیت، سوداګرۍ او هغو مسلو په اړه بحث وشي، چې کله ناکله د افغانستان او پاکستان ترمنځ رامنځته کیږي او همدارنګه « د دیورند کرښې په اوږدو کې د احتمالي منازعاتو د اواري او د دواړو لوریو ولسونو ته د تسهیلاتو پر رامنځته کیدو خبرې کیږي. ».

هغه زیاته کړې، چې دا ځل د پاکستان او افغانستان د همغږۍ ګډې کمېټې غونډه په کابل کې ترسره کیږي.

د افغانستان د دفاع وزارت مرستیال عبدالقیوم ذاکر به په دې غونډه کې د افغان لوري مشري وکړي.

د پاکستان او افغانستان د همغږۍ ګډې کمیټې وروستۍ غونډه د ۲۰۲۴ کال په جنورۍ کې د پاکستان پر کوربتوب ترسره شوې ده.

د ریاست الوزرء اقتصادي کمیسیون اوونیزې ناستې، چې مشري یې ملا عبدالغني برادر کوله؛ د ملي پراختیا سټراټیژۍ مسوده له هر اړخیزې ارزونې وروسته تصویب کړه.

د ریاست الوزراء د سې‌شنبې د ماښامنۍ خبرپاڼې له مخې: “د ملي پراختیا سټراټیژۍ مسوده جامع، واحد او اوږدمهاله سند دی، چې موخه یې په راتلونکو پېنځه کلونو کې د اقتصادي چارو لپاره د ریاست الوزراء د اقتصادي مرستیالۍ تر مشرۍ لاندې د اقتصاد وزرارت پر سکرټریت او اړوند سکټوري وزارتونو سره په ګډه همکارۍ کې د اساسي ملي اهدافو ټاکل او ترلاسه کول دي.”

په خبرپاڼه کې زیاته شوې: “دا سټراټیژي د یوه باثباته او سوکاله افغانستان لپاره له سیمې او نړۍ سره ښې اړیکې رانغاړي. د دې سټراټیژۍ اهداف د اسلامي شریعت پیاوړي کول، د اغېزمنتوب، شفافیت او حساب ورکولو اصل تضمینول، له سیمې او نړۍ سره د اغېزمنو او ښو اړیکو پراخول، د تلپاتې سولې او عمومي امنیت ټینګول، د کارموندنې او اقتصادي ودې رامنځته کول، د مذهبي او ملي ارزښتونو، ځمکنۍ بشپړتیا او اسلامي حاکمیت ساتل، د ملي او طبیعي سرچینو مدیریت اغېزمنتوب ته وده ورکول، د بنسټیزو خدماتو چمتو کول، ښه کول، د صنعت، سوداګرۍ او خصوصي سکټور وده، د بېخبناوو او سیمه‌ییز اتصال پراختیا، ټولنیز خوندیتوب ته وده ورکول او د چاپیریال ښه کول دي.”

د صنایعو او سوداګرۍ وزارت پاکستان ته د افغانستان اسلامي امارت د یوه پلاوي له سفر خبر ورکړی، چې په کې به د سوداګرۍ، ټرانزیټ او ټرانسپورټ د خنډونو او ستونزو د لرې کولو او د افغان کډوالو د ستونزو د حل په اړه خبرې وشي.

د صنایعو او سوداګرۍ وزارت د سې‌شنبې پر ورځ د خپرې شوې خبرپاڼې له مخې؛ د دې پلاوي د سفر لپاره د دې وزارت د چارسمبالي(سرپرست) نورالدین عزیزي پر مشرۍ د همغږۍ غونډه ترسره شوه.

په دې رسنیزه خبرپاڼه کې راغلي؛ په دې پلاوي کې به د ریاست الوزراء د اقتصادي مرستیالۍ، د ادارې چارو د پانګونې اسانتیا ریاست، د بهرنیو چارو، مالیې، کډوالو او راستنېدونکو، ټرانسپورټ او ملکي هوايي چلند، کرنې اوبو لګولو او مالدارۍ وزارتونو او د هېواد د خصوصي سکټور استازي به د نورالدین عزیزي پر مشرۍ په نږدې راتلونکي کې پاکستان ته سفر وکړي.