د ازبکستان بهرنیو چارو وزارت ويلي، چې د دغه هېواد او اروپايي ټولنې ځانګړو استازو د سیمه‌ییز امنیت او د افغانستان د اوسني وضعیت پر اړینو مسلو خبرې کړې دي.

د یاد هېواد بهرنیو چارو وزارت د خبرپاڼې له مخې، عصمت الله ایرګاشوف او اډوارډز سټیپرایس د ازبکستان او اروپايي اتحادیې ترمنځ د همکارۍ ژوروالی تر ارزونې لاندې ونیوه.

اروپايي ټولنې زیاته کړې، چې په مرکزي آسیا کې د دې ټولنې استازي سټیپرایس د دې غونډې په بهیر کې د افغانستان د وضعیت پورې اړوند مسلو په اړه د رغنده او سیسټماټیک بحثونو سره خپله علاقه څرګنده کړه.

د غونډې په بهیر کې سټیپرایس هوکړه وکړه، چې د ازبکستان له ځانګړي استازي سره یوځای د منظمو مشورو ملاتړ وکړي.

مخکې له دې د ازبکستان او اروپايي ټولنې ځانګړو استازو د افغانستان د وضعیت او په هېواد کې د بشري بحران د مخنیوي لپاره د نړیوالې ټولنې د هڅو او په ترمز کې د نړیوال ټرانسپورټ او لوژسټیک مرکز څخه د بشري مرستو د لېږلو د امکان په اړه بحث کړی و.

د روسیې ولسمشر ولادمیر پوتین په کازان کې د روسیې- اسلامي نړۍ د شپاړلسم نړیوال اقتصادي فورم په غونډه کې د هرکلي پر مهال ویلي، چې مسکو له سختو نړیوالو شرایطو سره – سره له اسلامي هېوادونو سره همکاري روانه ساتي.

دا غونډه یو مهم نړیوال فورم دی، چې موخه یې د نړیوالې همکارۍ زیاتوالی او په ځانګړي توګه د روسیې او د اسلامي همکاریو ټولنې د هېوادونو ترمنځ د اړیکو پراختیا ده.

دا غونډه نن( د غویی پر درویشتمه د ولادمیر پوتین پر پرانیستونکې وینا پیل شو او د غویی تر اته‌ویشتمې) به په کازان ښار کې روانه وي.

پوتین ویلي، چې هغه به له دې هېوادونو سره په بېلابېلو برخو کې خپلې اړیکې پراخې کړي.

ولادیمیر پوتین وایي:” له پېړیو راپدېخوا زمونږ څو توکمیز هېواد د اسلامي نړۍ له هېوادونو سره پراخې همکارۍ ته پرانیستی دی او نن له سختو نړیوالو همکاریو سره – سره مونږ په مؤثره او دوامداره توګه اقتصادي، علمي، تعلیمي، بشري او سیمه‌يیزو اړیکو ته پراختیا ورکوو”.

د اسلامي امارت چارواکي هم دې غونډې ته بلل شوي او ټاکل شوې، چې له افغانستان څخه یو پلاوی په دې غونډه کې ګډون وکړي.

یو شمېر کارپوهان دا فرصت د افغانستان لپاره ارزښتناک ګڼي، چې له نړیوالې ټولنې سره په ځانګړي توګه له مشترک المنافع هېوادونو سره نور تعامل او همکاري وکړي.

که څه هم روسیه اسلامي امارت پر رسمیت نه‌پېژني؛ خو په وروستیو میاشتو کې یې له افغانستان سره ډیپلوماټیکې اړیکې نورې هم وغځولې، چې په کې د اسلامي امارت نوم د منع شویو ډلو له نوملړه وایستل شو.

د ټرمپ حکومت د لنډمهاله ملاتړ پروګرام، چې له افغانستان څخه زرګونو خلکو ته یې خوندي ایستل وړاندې کول؛ پای ته رسوي.

د کورني امنیت وزارت د دوشنبې پر ورځ ویلي، چې دا پروګرام به د جولای پر دولسمه پای ته ورسوي.

د TPS پروګرام مهاجرینو ته اجازه ورکوي، چې د جګړې، طبیعي پېښو یا نورو مسلو له کبله خپلو هېوادونو ته ستنېدا یې خوندي نده؛ نو د ایستلو پرمهال لنډمهاله معافیت او د کار جواز ترلاسه کوي.  

د فډرالي احصائیو له مخې؛ د تېر کال پر پرتله له ۸ زره څخه ډېر افغانان د TPS لپاره تائید شوي دي.

TPS د وروستی ځل لپاره په ۲۰۲۳ کال کې د افغانستان لپاره تمدید شو او ټاکل شوې وه، چې په می کې پای ته ورسیږي؛ خو که د ټرمپ حکومت یې د بل تمدید پرېکړه ونکړي.

AfghanEvac  هغه ډله ده، چې د افغانانو په ځای پر ځای کولو کې مرسته کوي. دې ډلې په ایکس پاڼه کې لیکلي: “دا پرېکړه  د منلو نده او څپه‌ییزې اوږدمهاله اغېزې به ولري.