دا غونډه، چې مهم شخصیتونه او د هېوادونو سفیران به په کې ګډون وکړي؛ په افغانستان کې به د بشري مرستو د چمتو کولو او د یوناما د کاري بهیر په اړه خبرې وکړي.

تمه ده، چې ویناوال د ښځو او ماشومانو د حقونو پر اړوند مسایلو هم خبرې وکړي.

دغه راز د ملګرو ملتونو د بشري چارو د همغږۍ دفتر (اوچا ) به هم په راتلونکو اوونیو کې خپل درې میاشتنی راپور خپور کړي.

دا غونډه، چې د چنګاښ پر دوه‌یمه یا د جون پر درویشتمه ترسره کیږي ټاکل شوې د افغانستان لپاره د ملګرو ملتونو د عمومي منشي ځانګړې استازې روزا اوتونبایوا هم په کې وینا وکړي.

د امنیت شورا غونډې مشري به د سویلي امریکا ګیانا هېواد پر غاړه ولري.

په ملګروملتونو کې د ګویان سفیر کارولین رودریګز ویلي؛ ” په افغانستان کې د ملګرو ملتونو د ماموریت یا یوناما د فعالیتونو په اړه به یوه لنډه او مشورتي غونډه هم جوړه شي.

تمه ده په دې غونډه کې د یوناما ځانګړې استازې او روزا اوتونبایوا د ملګرو ملتونو د ښځو اجرائیوي رییسه سیما بحوث او د ملګرو ملتونو د بشري چارو د همغږۍ دفتر یا اوچا یو چارواکی وینا وکړي.”

دغه راز ټاکل شوې په افغانستان کې د ملګرو ملتونو ماموریت یا یوناما استازولي د غبرګولي پر درویشتمه( د جون پر دیارلسمه) له غونډې مخکې خپل درې میاشتنی راپور خپور کړي.

له دې مخکې اسلامي امارت په افغانستان کې د یوناما فعالیتونه بې اغېزې یاد کړي وه، چې یوناما د افغانستان غلط انځور وړاندې کوي.

د ملګروملتونو امنیت شورا غړو د تېر کال په کب میاشت کې د رایو پر یووالي یو پرېکړه لیک تصویب کړ، چې له مخې یې په افغانستان کې د یوناما ماموریت د ۲۰۲۶ کال د مارچ تر اووه‌لسمې پورې د یو بل کال لپاره وغځول شو.

ویل کیږي، چې یوناما په افغانستان کې د بشري حقونو د ودې، د خبرو اترو د آسانتیا، د سیمه‌ییزې همکارۍ د ودې، د بشري مرستو د همغږۍ او اقلیمي اقداماتو ملاتړ ته ورته اهداف تعقیبوي.

ازبکستان له افغانستان سره په خپلو اړیکو کې د رسميت پېژندلو لپاره یو عملي او اصولي چلند تعقیبوي او د بېړې پرځای ورسره له نړیوالو خبرو اترو ملاتړ کوي.

د ازبکستان د امنیت شورا د مرستیال منشي او د ولسمشر د بهرني سیاست ځانګړي استازي عبدالعزیز کاملوف دا ټینګار له Ishonch.uz سره په یوه وروستۍ مرکه کې کړی دی.

کاملوف څرګنده کړې، چې د ازبکستان د اسلامي انارت په رسمیت پېژندلو کې بېړه نه‌کوي.

هغه ویلي؛”مسئله دا نده، چې مونږ یې پر رسمیت بېژنو یا نه. رسمیت پېژندنه به یې پخپل وخت وي؛ خو یوازې له نړیوالې ټولنې سره په همغږۍ کې. په ځانګړي توګه له ملګرو ملتونو سره.”

هغه د افغانستان او ازبکستان د خلکو ترمنځ پر ژورو تاریخي او کلتوري اړیکو ټینګار وکړ او البیروني، نوایي او بابر ته ورته شخصیتونو له لارې د ګډ میراث یادونه وکړه.

هغه د ښه نیت د سمبول په توګه په ​​ازبکستان کې د امام البخاري د زیارت د بیارغونې لپاره له هرات څخه د مرمر د سپینې ډبرې له بسپنې یادونه وکړه او زیاتوي: “دا حرکت زمونږ معنوي نږدېوالی ښیي. کوم بل هېواد به دا کار وکړي؟”

کاملوف دا استدلال هم وکړ، چې افغانستان له څلور لسیزو راپدېخوا جګړه زغملې؛ ملاتړ ته اړتیا لري نه بهرني فشار ته. “بهرني ځواکونه راغلل، ویجاړی یې وکړ او یې ووی، چې افغانستان باید څنګه اداره شي. هغه څه، چې دا ملت اوس ورته اړتیا لري مرسته ده، نه قضاوت.”

هغه دې ته هم نغوته وکړه، چې ازبکستان له اوږدې مودې رابدېخوا د افغانستان پخوانی حکومت هڅولی و، چې له مخالفو ځواکونو سره تعامل وکړي. کله، چې دا هڅې له پامه وغورځول شوې؛ ازبکستان له اسلامي امارت سره د خبرو اترو د پیلولو د بدیلې پایلې لپاره چمتووالی ونیو. یوه داسې تګلاره، چې اوس د نورو هېوادونو لخوا ورته د لاسرسي په لټه کې پر رسمیت پېژندل کیږي.

کاملوف په نړیواله کچه د اسلامي امارت له استازو سره د هراړخیزو خبرو اترو غوښتونکی شو.

هغه وایي:”یو اړخیزې خبرې بې معنی دي. باید هغو غوږ ونیول شي؛ که ورسره موافق یو یا نه.”

ویل کیږي، چې افغانستان د لسیزو شخړو له کبله زیانمن شوی ملت دی؛ مسلکي ملاتړ او رښتینې ښکېلتیا او ملاتړ ته اړتیا لري.

د افغان بېسیم شرکت چارواکو ويلي، چې دا په جنوب لویدیځه سیمه کې ترټولو لوی دفتر دی او د دې پرانیستل به د هلمند اوسېدونکو ته ډېرې اسانتیاوې برابرې کړي.

 د افغان بیسیم د جنوب غرب زون عمومي مسوول نثاراحمد رحیمي وایي؛ دا په هلمند کې د افغان بېسیم مخابراتی شرکت  د پېردونکو د خدماتو اته‌لسمه څانګه ده، چې فعالیت پیلوي.

د جنوب غرب زون د خرڅلاو عمومي مسوول عبدالمبین کریمي وایي، چې افغان بېسیم مخابراتي شرکت به په نږدې راتلونکې کې د پرېدونکو لپاره د دې ولایت په درې ولسواليو کې دا ډول لوي څانګې فعاله او نورې زیاتې آسانتیاوې به برابرې کړي.

د هلمند د مخابراتو رییس مولوي امان الله بشیر بیا د دې ولایت په ټولو ولسوالیو کې د مخابراتي پوښښ له پراختیا خبرورکوي دوی وایي؛ دمګړۍ د یاد ولایت په ټولو ولسوالیو کې مخابراتي شبکې فعالې او اوسېدونکي یې د درېیم او څلورم نسل له مخابراتي خدماتو څخه استفاده کوي.

د هلمند د اترا ادارې مسوول محب الله آغا په دې ولایت کې ٩٥ سلنه وګړي د افغان بېسیم مخابراتي شرکت له خدماتو استفاده کوي او د اسلامې امارت له راتګ سره د دې ولایت ټولې لرې پرتې سیمې د باکیفیته مخابراتي پوښښ لاندي راوستل شوې دي.

د یادولو ده، چې په هلمند کې ډېری وګړي له افغان بیسیم مخابراتي شرکت له خدماتو څخه استفاده کوي.