د اسلامي امارت د بهرنیو چارو وزارت په یوه خبرپاڼه کې ویلي، چې نن (چهارشنبه د لیندۍ پېنځمه) یې په کابل کې د پاکستان د سفارت چارسمبالی احضار کړ.

د بهرنیو چارو وزارت د خبر له مخې؛ د پاکستان پوځ د پکتیکا ولایت د برمل ولسوالۍ په ځینو برخو کې د بمبارډ له کبله د دغه سفارت چارسمبالي ته یو «سخت اعتراض لیک» سپارلی، چې په کې پاکستاني لوري ته ویل شوي؛ د افغان خاورې ساتنه د اسلامي امارت "سره کرښه" ده، چې دا ډول غیر مسوولانه کړنې بدې پایلې لري.

ویل کیږي، چې تېره ورځ د پکتيکا په برمل ولسوالۍ کې د پاکستان د بې پيلوټه الوتکې د بريد له کبله ٤٦ کسان وژل شوي او ۶ نور ټپيان دي.

د پکتيکا ولايت په برمل ولسوالۍ کې د پاکستانيو ځواکونو په هوايي بريدونو کې لږ تر لږه ۴۶  کسان وژل شوي او شپږ نور ټپيان دي.

د اسلامي امارت د ویاند مرستیال حمدالله فطرت ویلي، چې ډېري قربانیان ماشومان او ښځې دي.

پاکستان د برمل ولسوالۍ پر څلورو سیمو هوايي بریدونه کړي، چې پراخ غبرګونونه یې پارولي دي.

ملي دفاع وزارت ویاند عنایت الله خوارزمي دا وحشیانه عمل د ټولو نړیوالو اصولو خلاف او ښکاره تېري بولي؛ په کلکه یې غندي او ټینګار کوي، چې بې ځوابه به یې پرې نه‌ ږدي.

نوموړي زیاته کړې، چې پاکستاني لوري باید پوه شي، چې دا ډول خپلسرې کړنې د ستونزې د حل لار نده.

پاکستاني لوری ادعا کوي، چې پاکستاني طالبان يې پر نښه کړي؛ خو اسلامي امارت وايي؛ ملکي وګړي دي، چې زياتره يې وزيرستاني کډوال دي.

ملي دفاع وزارت له خپلې خاورې دفاع خپل حق ګڼي. د هېواد اوسېدونکي هم وايي، چې د پاکستان د بریدونو ځواب باید ورکړ شي.

دا بریدونه په داسې حال کې کېږي، چې کابل ته د افغانستان لپاره د پاکستان ځانګړي استازي سفر کړی او له افغان چارواکو سره یې د سیاسي او امنیتي مسایلو پر سر خبرې کړي دي.

د رییس الوزرا سیاسي مرستیال مولوي عبدالکبیر ويلي، چې اسلامي امارت به د جهاد ارزښتونه ساتي او خپلو اصولو ته به ژمن وي.

د رییس الوزرا سیاسي مرستیال بغلان ولایت ته د خپل سفر پر مهال او د دیني مدرسو د زده‌کوونکیو د فراغت په مراسمو کې ویلي، چې اسلامي امارت د جهاد ارزښتونه ساتلي او د ژوند په اوږدو کې به خپلو اصولو ته ژمن وي.

هغه وایي، چې په اسلام او اسلامي امارت معامله ناشونې ده.

هغه له نړۍ سره د افغانستان د اړیکو په اړه زیاته کړې؛ له نړۍ سره د اسلامي امارت اړیکې د اسلامي اصولو پر بنسټ ولاړې دي او لنډمهالی حکومت له اړوند مسایلو سره مسوولانه چلند کوي.

مولوي عبدالکبير ويلي، چې د تېرې ادارې سرتېري بښل شوي او په بشپړ امنيت کې ژوند کوي.

د سیاسي شنونکيو د څرګندونو له مخې؛ اسلامي امارت په علمي او پرمختيايي برخو كې هڅې پيل كړي، چې په تدريجي ډول به د خلكو ستونزې اوارې شي.