د رییس الوزرا سیاسي مرستیال مولوي عبدالکبیر ويلي، چې اسلامي امارت به د جهاد ارزښتونه ساتي او خپلو اصولو ته به ژمن وي.

د رییس الوزرا سیاسي مرستیال بغلان ولایت ته د خپل سفر پر مهال او د دیني مدرسو د زده‌کوونکیو د فراغت په مراسمو کې ویلي، چې اسلامي امارت د جهاد ارزښتونه ساتلي او د ژوند په اوږدو کې به خپلو اصولو ته ژمن وي.

هغه وایي، چې په اسلام او اسلامي امارت معامله ناشونې ده.

هغه له نړۍ سره د افغانستان د اړیکو په اړه زیاته کړې؛ له نړۍ سره د اسلامي امارت اړیکې د اسلامي اصولو پر بنسټ ولاړې دي او لنډمهالی حکومت له اړوند مسایلو سره مسوولانه چلند کوي.

مولوي عبدالکبير ويلي، چې د تېرې ادارې سرتېري بښل شوي او په بشپړ امنيت کې ژوند کوي.

د سیاسي شنونکيو د څرګندونو له مخې؛ اسلامي امارت په علمي او پرمختيايي برخو كې هڅې پيل كړي، چې په تدريجي ډول به د خلكو ستونزې اوارې شي.

د افغانستان اسلامي امارت دفاع وزارت د سې‌شنبې پر ورځ ( د مرغومي څلورمه) په پکتیکا ولایت کې د پاکستان هوایي برید دغه بریدونه تائید کړي او هغه یې پر سختو ټکو غندلي دي.

ملي دفاع وزارت څرګنده کړې، چې په دغو بریدونو کې د ماشومانو په ګډون ملکي وګړي پر نښه شوي دي.

د ملي دفاع وزارت په خبرپاڼه کې راغلي: د افغانستان اسلامي امارت دغه وحشیانه عمل د ټولو نړیوالو اصولو خلاف او ښکاره تېري بولي او پر کلکه یې غندي.

دغه وزارت زیاته کړې، چې پاکستاني لوری باید پوه شي، چې دا ډول خپلسري کړنې د کومې ستونزې د حل لار نده.

په اعلامیه کې ټینګار شوی، چې: "اسلامي امارت به دغه بزدلانه عمل بې ځوابه پرې نږدي، بلکې د خپلې خاورې او هویت دفاع خپل نه منونکی حق ګڼي."

د پکتیکا په برمل ولسوالۍ کې د پاکستان د هوايي برید په اړه د زلمي خلیلزاد غبرګون

د افغانستان د سولې لپاره د امریکا پخواني استازي زلمي خلیلزاد د پکتیکا ولایت په برمل ولسوالۍ کې د پاکستان د هوايي بریدونو په غبرګون کې ویلي، چې که دا بریدونه تائید شي، ښايي اسلامي امارت غبرګون وښيي.

زلمي خلیلزاد په ایکس پاڼه کې لیکلي، چې پاکستان او افغانستان یو داسې روښانه توافق ته اړتیا لري، چې هیڅوک به د بل او بل پر ضد نه خپله خاوره نه‌کاروي.

نوموړي کابل ته د پاکستان د ځانګړي استازي سفر ته په نغوته کې پوښتلي، چې آیا د پاکستان د پوځ مشر جنرال عاصم منیر به دغه استازي ته اجازه ورکړي، چې د دغو کړکېچونو د حل لپاره خبرې اترې پیل کړي؟!

دا بریدونه په داسې حال کې شوي، چې د افغانستان په چارو کې د پاکستان ځانګړی استازی محمد صادق د خبرو لپاره د یوه پلاوي پر مشرۍ کابل ته راغلی او د اسلامي امارت له لوپوړو چارواکو سره یې پر دوه اړخیزو همکاریو خبرې کړې دي.

د یادونې ده، چې پاکستانيو جیټ الوتکو د سې شنبې پر ورځ (د مرغومي څلورمه) د پکتیکا د برمل ولسوالۍ ځینې سیمې په نښه کړې دي.

د نیمروز والي محمد قاسم خالد د یکشنبې پر ورځ ( د مرغومي درېیمه) د دغه ولایت له سیمه‌ییزو چارواکو سره په کتنه کې ویلي، چې د چهاربرجک ولسوالۍ په «ډاګ» سیمه کې د انساني قاچاق یوه سرحدي لاره تړل شوې ده.

د چارواکو د څرګندونو له مخې؛ دغه سرحدي سیمه، چې له ایران او پاکستان سره ګډه پوله لري د انساني قاچاق له یوې اصلي لارې څخه وه.

د نیمروز والي د مطبوعاتي دفتر د خبرپاڼې له مخې؛ په دې ولایت کې د اسلامي امارت د رهبرۍ شورا د فرمان له صادرېدو وروسته محمد قاسم خالد د انساني قاچاق د مخنیوي لپاره دا هڅه وکړه.

د نيمروز والي د دغه فرمان پر بشپړ پلي کېدو د ټينګار ترڅنګ زياته کړې، چې د انساني قاچاق ناوړه پايلې بايد د جوماتونو او مطبوعاتو له لارې له خلکو سره شريکې شي.

خالد دا ټینګار هم کړی، چې له دې وروسته به هیچا ته اجازه ورنکړي، چې له دې لارې تېر شي.

په دې غونډه کې د انساني قاچاق د خطرونو په اړه د عامه پوهاوي او د دې ناوړه پدیدې په مخنیوي کې له ولایتي ادارې سره د همکارۍ لپاره کمیټې وټاکل شوې.

د اسلامي امارت رهبر په یوه فرمان کې کورنیو چارو وزارت ته دنده سپارلې، چې د انساني قاچاقبرانو د فعالیتونو مخه ونیسي او له نیول کیدو وروسته یې نظامي محاکمو ته وروپېژني.