د پاکستان پوځ ویلي، چې د شنبې پر ورځ د پاکستان په شمال لویدیځ کې د وسلوالو نښتو له کبله ۶ پاکستاني پوځیان او ۲۲ وسلوال وژل شوي دي.

د رویټرز خبري سرچینې د راپور له مخې؛ د پاکستان د پوځ په خبرپاڼه کې راغلي، چې دغه نښتې د وزیرستان په اړوند درې سیمو کې د پوځیانو لخوا له عملیاتو وروسته رامنځته شوې دي.

تحریک طالبان پاکستان اعلان کړی، چې د دوی جنګیالیو پر یوه امنیتي پوسته په برید کې پوځیان وژلي دي.

تحریک طالبان پاکستان په دې وروستیو میاشتو کې خپل بریدونه پر امنیتي ځواکونو زیات کړي دي.

د افغانستان پولې ته نږدې د پاکستان د خيبرپښتونخوا په کرمه سيمه کې يو سيمه‌ييز چارواکي ويلي، چې په دې سيمه کې د وروستيو مذهبي شخړو د مرګ او ژوبلې شمېر ۱۳۳ ته رسيدلې دی.

د کرمې سیمه‌ییز چارواکي وجد حسين ويلي، چې د دغې سيمې د شيعه او سني اوسېدونکیو ترمنځ د شخړې د مخنيوي هڅې تر اوسه کوم ځاى ته ندي رسېدلي.

په کرمه کې اکثره وسلوال شیعه او سني مسلمانان له لسیزو راپدېخوا د ځمکې او نورو محلي شخړو پر سر د ډلو ټپلو شاهدان دي.

دغه وروستۍ نښتې د لیبندۍ پر لومړۍ له پاراچنار څخه پېښور ته پر لاره د شيعه زيارت کوونکیو پر موټرو د وسلوالو له بريد سره پيل شوې، چې له کبله يې لږ تر لږه ۴۳ کسان وژل شوي دي.

تېره یکشنبه د حکومت مخالفو ډلو د یوه حکومتي پلاوي پر منځګړتوب اووه ورځني اوربند ته غاړه کیښوده؛ خو د سیمه‌ییزو چارواکو پر وینا دا نښتې اوس هم روانې دي.

د کرمې ولسوالۍ یوه سیمه‌ییز چارواکي وجد حسین ویلي: سیمه‌ییز حکومت او نورو اړوند چارواکو د دواړو ډلو ترمنځ د جګړې د بندولو هڅې پیل کړې؛ خو تر اوسه کوم پرمختګ ندی شوی.

د خیبر پښتونخوا اعلی وزیر علي امین خان ګنډاپور د شنبې پر ورځ د دې سیمې له رهبرانو او قومي مشرانو سره وکتل.

د شنبې په ورځ ناوخته د هغه د دفتر څخه په خبرپاڼه کې ګنډاپور ویلي: هر څوک، چې وسله پورته کوي د ترهګرو په توګه به ورسره چلند وشي او د دوی برخلیک به د ترهګرو برخلیک وي.

هغه زياته کړې، چې امنيتي ځواکونه به په سيمه کې پاتې شي.

د سیمې اوسېدونکیو او چارواکو ویلي، لویه لار، چې د کرمې ولسوالۍ له مرکز پاراچنار سره نښلوي د خیبر پښتونخوا له مرکز پېښور سره تړلې او روغتونونو ته د ټپیانو په لېږدولو کې یې ننګونې رامنځته کړې دي.

د پاراچنار د روغتون مسوول ميرحسن ويلي، چې د تاوتريخوالي په ترڅ کې د شاوخوا ۱۰۰ ټپيانو درملنه روانه ده او ٥٠ مړي ترلاسه شوي دي.

شیعه ګان د پاکستان د ۲۴۰ میلیون نفوسو شاوخوا ۱۵ سلنه جوړوي. پاکستان په تېرو وختونو کې د ډېرو مذهبي بریدونو شاهد دی.

د شیعه او سني ټولنو تر منځ تاوتریخوالی له لسیزو راپدېخوا په ځینو سیمو کې شتون لري. په ځانګړي توګه د خیبر پښتونخوا د کرمې سیمې په شیعه اکثریت سیمو کې.

د روان کال په جولای میاشت کې له دواړو خواوو تر منځ د ځمکې پر سر د شخړې له کبله نږدې ۵۰ کسان ووژل شول.

اسوشېټېډ پرس په خپل یوه راپور کې ویلي، چې د سنیانو او شیعه ګانو ترمنځ نښتې لومړی د جولای په میاشت کې پیل شوې وې؛ خو بیا دغه اختلافات پر مذهبي تاوتریخوالي بدل شول، چې تر اوسه په کې لسګونه کسان وژل شوي دي.

د اداني ګروپ بنسټ ایښودونکي او هندي میلیارډر ګوتم اداني د شنبې پر ورځ ( د لیندۍ لسمه) د امریکايي چارواکو لخوا د فساد او رشوت اخیستنې تورونه رد کړل او څرګندوي، چې اداني ګروپ له نړیوالو مقرراتو سره سم عمل کړی دی.

امریکایي چارواکو ګوتم اداني د هغه وراره ساګر داني او د اداني ګرین ګروپ سی ای او وینټ ایس جین د هند لپاره د سولر برښنا قراردادونو خوندي کولو لپاره د ۲۶۵ میلیون ډالرو رشوت ورکولو تور لګولی او امریکایي پانګه اچوونکي یې ګمراه کړي دي.

اداني ګروپ د امریکا تورونه رد کړي او هغه یې "بې اساسه" بللي او ژمنه یې کړې، چې ټولې شونې قانوني لارې به وڅاري.

د اداني د څرګندونو له مخې: له دوه اوونیو څخه لږ مخکې، مونږ د امریکا لخوا له یو لړ تورونو سره مخ شوو. دا لومړی ځل ندی، چې مونږ له داسې ننګونو سره مخ یوو.

نوموړي پرته له جزئیاتو ویلي په نننۍ نړۍ کې منفي کړنې د حقایقو پر پرتله چټکې خپریږي او لکه څنګه، چې مونږ د قانوني بهیر له لارې کار کوو، زه غواړم له نړیوال اطاعت څخه خپله بشپړه ژمنتیا بیا تائید کړم.

اداني، چې د هند په شمالي ښار جیپور کې خبرې کولې وایي: هغه څه، چې زه تاسې ته ویلای شم هغه دا دی؛ هر برید مونږ پیاوړي کوي او هر خنډ د یو ډېر مقاومت لرونکي اداني ډلې لپاره پر حوصلې بدلیږي.

په هند کې ډېري اپوزیسیون ګوندونه د هند لومړی وزیر نریندرا مودي او بهارتیا جنتا ګوند تورنوي، چې د اداني ملاتړ کوي او په هند کې د هغه پر ضد د تحقیقاتو مخه نیسي؛ خو د مودي ګوند دواړه تورونه رد کړي دي.

حکومت تر اوسه د دادني پر وړاندې د جرم د اعلان په اړه تبصره نده کړې؛ د مودي بهارتیا جنتا ګوند ویلي، چې دوی د عدني د دفاع لپاره هیڅ دلیل نلري او زیاتوي، چې ګوند د صنعتکارانو خلاف ندی او دوی یې د ملت جوړونې لپاره په هڅو کې شریک ګڼي.

د اداني ګروپ لوی مالي افسر د جمعې پر ورځ دا تورونه رد کړل او د هند حکومت وویل، چې دوی په دې اړه د متحده ایالاتو څخه هیڅ غوښتنه نده ترلاسه کړې.