د افغانستان د ټولګټو چارو وزارت د اوسپنې پټلۍ مرستیال محمد اسحق صاحب‌زاده پر مشرۍ یو تخنیکي پلاوي د ترکیې هیواد په رسمی بلنه د UIC ټولنې په څلوردېرشمه سیمه‌ییزه غونډه کې د ګډون لپاره پرون ماښام ترکیې هېواد ته سفر وکړ.

ټولګټو چارو وزارت ویلي؛ په دې غونډه کې د دې ټولنې د کلني راپور له وړاندې کولو وروسته د سیمه ییزو هیوادونو د ریلي او ټرانسپورټي اسانتیاوو پراخولو، د پانګونو راجلبولو د وروستیو لاسته راړونو او فعالیتونو په اړه خبرې اترې وشي.

دغه راز د ټولګټو چارو وزارت د اوسپنې پټلۍ مرستیال به د دې غونډې په بهیر کې د هېواد د تر کار لاندې ريلي پروژو، وروستيو فعاليتونو او لاسته راوړنو، سيمه‌ييز ريلي اتصال، پرمختګونو او راتلونکیو پلانونو په تړاو معلومات وړاندې کړي.

ویل کیږي، چې UIC د اوسپنې پټلۍ د پراختيا، ټرانسپورټي او ريلي ترويج په برخه کې يوه نړيواله ټولنه ده، چې افغانستان په ۲۰۱۳ کال کې د يادې ټولنې غړيتوب ترلاسه کړی دی.

د افغانستان لپاره د ایران د سفیر او ځانګړي استازي حسن کاظمي قُمي له ګوښه کېدو وروسته د دغه هېواد د بهرنیو چارو وزارت ويلي، چې د افرادو ادلون او بدلون یوه "عادي خبره" ده.

د ایران بهرنیو چارو وزارت ویاند ویلي، چې په ډیپلوماتیکو مسوولیتونو کې بدلون یوه دودیزه او عادي خبره ده.

اسماعیل بقايي د یوې خبري غونډې پر مهال په افغانستان کې د ایران د سفیر په توګه د حسن کاظمي قُمي له کار ستاینه وکړه او د ایران د سفارت د نوي سفیر په توګه یې د علیرضا بیکدلي له ټاکل کیدو هرکلی وکړ.

د ایران بهرنیو چارو وزارت ویاند اسماعیل بقايي وایي: د بهرنیو چارو وزارت او په بهر کې زمونږ د هېواد په ډیپلوماټیکو استازولیو او قونسلګریو کې د مسؤلیتونو بدلونونه یو عادي کار دی، چې په ټاکلو وختونو کې ترسره کیږي.

درې ورځې مخکې د ایران بهرنیو چارو د وزیر پر حکم حسن کاظمي قُمي په افغانستان کې د ایران د سفیر او ځانګړي استازي په توګه له دندې لرې کړای شو او علي رضا بیکدعلي د نوي سفیر په توګه وټاکل شو.

په کابل کې سیاسي شنونکی سلیم پیګیر علي رضا بیکدلي کارونه د پام وړ یادوي او تمه لري، چې نوموړی به دغه اړیکې نورې هم پیاوړې کړي.

له دې مخکې د بهرنیو چارو وزارت چارسمبالي امیر خان متقي د ایران له پخواني سفیر کاظمي قُمي سره په کتنه کې ویلي وه، چې کابل د ایران له نوي سفیر سره د دوه اړخیزو اړیکو د پراختیا لپاره کار کولو ته چمتو دی.

د افغانستان بهرنیو چارو وزارت ويلي، چې د ایران د ولسمشر ځانګړي استازي حسن کاظمي قُمي او په کابل کې د ایران سفیر د دوشنبې پر ورځ ( د لیندۍ شپږمه) د دغه وزارت له چارسمبالي امیر خان متقي سره د مخه ښۍ لیدنه وکړه.

د بهرنیو چارو وزارت په خبرپاڼه کې راغلي، چې په دې کتنه کې دواړو لوریو پر دوه اړخیزو اړیکو او سیمه‌ییزو تحولاتو بحث او خبرې وکړې.

د بهرنیو چارو وزارت چارسمبالي د ایران د ولسمشر د ځانګړي استازي او سفیر حسن کاظمي قُمي دنده او تر سره شوې هڅې د ستاینې وړ وارزولې.

د بهرنيو چارو وزارت چارسمبالي دا هم ويلي؛ دا وزارت چمتو دى، چې د ايران له نوي سفير سره د دوه اړخيزو اړيکو د پراختيا په برخه کې خپل کار روان وساتي.