د افغانستان بهرنیو چارو وزارت چارسمبالي تېره ورځ د وږي پېنځه‌ویشتمه په کابل کې د مېشتو دولتونو سفیرانو او د سیمه‌ییزو او نړیوالو ټولنو له استازو سره د ماښامنۍ ناسته تر سره کړه. 

د بهرنیو چارو وزارت د خبر پاڼې له مخې؛ په دې ناسته کې د بهرنیو چارو وزیر مولوي امیر خان متقي تېره اوونۍ له ترکمنستان سره د ټاپي، ټاپ، نوري فایبر او اوسپنې پټلۍ د سترو پروژو د پرانیستي په تړاو د ناستې ګډونوالو ته هراړخیزه معلوماتي وینا وړاندې کړه. 

د بهرنیو چارو وزیر امیر خان متقي ویلي؛ د افغانستان په خاوره کې د سیمې د ټاپي نللیکې د عملي کار پیل په حقیقت کې له جګړې او سیالۍ څخه د پرمختګ او همکارۍ پر لور د بحث بدلون دی.

مولوي امیر خان متقي د افغانستان په خاوره کې د ټاپي نللیکې د غځولو په برخه کې د اسلامي امارت سیاسي اراده ټینګه وبلله او هیله یې څرګنده کړه، چې که ټاپي تر خپل منزل مقصود پورې ورسېږي؛ نو د پاکستان او هندوستان پر ولسونو سربېره به نور ولسونه هم ترې ګټه واخلي.

د بهرنیو چارو وزیر له ګډونوالو وغوښتل، چې د خپلو هېوادونو او ولسونو د هوساینې او پرمختګ لپاره باید د منفي سیالیو، امنیتي او صفر مجموعې له زاویو د تعامل پر ځای د ګټې-ګټې له مثبتې زاویې مسایلو ته وګوري.

امیر خان متقي زیاته کړې؛ اوس د نړۍ ګڼ هېوادونه دې پایلې ته رسېدلي، چې د ژیوپولیتیک لیدلوري پر ځای کولی شي مسایلو ته له ژیوایکانومیکي زاویې وګوري او په پای کې ټول ګټونکي واوسي.

د بهرنیو چارو وزارت چارسمبالي هیله وښوده، چې د سترو اقتصادي پروژو له پرانیستې سره به په سیمه کې داسې ستر مثبت اقتصادي بدلون رامنځته شي، چې د ټولو لوریو اقتصادونه به ورسره وغوړېږي.

ویل کیږي، چې په دې ناسته کې د ترکمنستان سفیر خوجه عوضوف هم وینا وکړه او د افغانستان او ترکمنستان ترمنځ یې د سترو پروژو پرانیسته د دواړو هېوادونو په اړیکو کې د نوي څپرکي پیل وباله.

د افغانستان اسلامي امارت د رهبر د پرېکړې له مخې؛ پر پخواني حکومت د یو شمېر بهرنیو بنسټونو پاتي (۲.۷) میلیارډ افغانۍ پورونه ورکړ شوي دي.

د مالیې وزارت د خپرې شوې خبرپاڼې له مخې؛  دې وزارت (۹۱۰) میلیون افغانۍ نړیوال بانک ته او شاوخوا (۱.۹) میلیارډ افغانۍ د آسیا پراختیايي بانک ته ورکړې دي.

د مالیې وزارت د څرګندونو له مخې؛ دغه راز په (۱۴۰۳لمریز لېږدیز) کال کې د یو شمېر بهرنیو بنسټونو د پورونو د ادا کولو لپاره له ملي بودجې څخه یوه مشخصه اندازه ځانګړې شوې، چې د پور ورکوونکیو بنسټونو له غوښتنې سره سم به د اسلامي امارت د مشرتابه پر لارښوونه ورکړ شي.

له دې مخکې ویل شوي وه، چې پخوانی حکومت له بهرنیو بنسټونو نږدې ۱۸ میلیارډ افغانۍ پوروړی دی.

ویل کیږي، چې اسلامي امارت په تېرو درې کلونو کې له هیڅ هېواد او بهرني بنسټ څخه پور ندی اخیستی؛ هڅه یې کړې، چې د پخواني حکومت ټول پاتې پورونه د مشرتابه د پرېکړې له مخې ورکړي او افغانستان د کوم بهرني هېواد او ادارې پوروړی پاتې نشي.

د آلمان لومړي وزیر اولاف شولز ویلي؛ آلمان له ازبکستان سره یوه داسې هوکړه لاسلیک کړې، چې له مخې به یې د اقتصادي ملاتړ لپاره د منځنۍ آسیا له هېوادونو څخه ماهر کارګر آلمان ته مهاجر شي او د ځینو نورو مهاجرو په بېرته ستنېدو کې مرسته وکړي.

شولز د یکشنبې پر ورځ د ازبکستان په سمرقند ښار کې د ازبکستان له ولسمشر شوکت میرضیایوف سره له کتنې وروسته ویلي؛ مونږ د بااستعداده کارګرانو د اړتیا وړ مهاجرت ته اړتیا لرو، چې اقتصاد به مو ورسره وده وکړي.

شولز پرته له دې، چې توضیحات ورکړي ویلي؛ دواړو هېوادونو د هغو کسانو لپاره، چې باید بېرته لاړ شي پر ساده، غیر بیوروکراټیک طرزالعملونو هم موافقه وکړه.

هغه د رسنیو هغو ګونګوسیو ته ځواب ورنکړ، چې ګنې له ازبکستان سره تړون به د هغو افغانانو د ایستلو لپاره هم کار وکړي، چې جرم یې کړی وي.

هغه زیاته کړې: بل دا، چې له نیکه مرغه په ​​ډېرو برخو کې د همکارۍ په اړه محرمې خبرې روانې دي.

جرمني د اګست پر دېرشمه ویلي وه؛ له سیمه‌ییزو ټاکنو څخه څو ورځې مخکې، چې مهاجرت د کمپاین مسله وه خپل هېواد ته د مجرم پېژندل شویو افغان وګړیو جبري ایستل بیا پیل کړي.

برلین په ۲۰۲۱ ز.کال کې د اسلامي امارت له بیا واکمنېدو وروسته د بشري حقونو د اندېښنو له کبله افغانستان ته د خلکو راتګ ودراوه.

د رویټرز خبري آژانس د راپور له مخې: د آلمان کورنیو چارو وزیرې نانسي فایسر، چې له شولز سره یې په سمرقند کې اړوند هوکړه لاسلیک کړی ویلي؛ هغه افغانستان ته د نورو الوتنو پلان لري، چې سرغړوونکي افغان وګړي جبري وباسي.

فایسر وایي: خو مونږ به وګورو، چې له کومو هېوادونو سره د همکارۍ له مخې دا کار تر سره کړو.

د جرمني حکومت په افغانستان کې د طالبانو له حکومت سره کومې اړیکې نلري؛ خو د قطر پر منځګړیتوب یې په اګست کې د جرمني د وتلو لومړۍ الوتکه تر سره کړه.