د افغانستان بهرنیو چارو وزارت چارسمبالي(سرپرست ) امیر خان متقي په مسقط کې د عمان بهرنیو چارو له وزیر بدر بن حمد البوسعیدي سره وکتل.

په دې کتنه او ناسته کې دواړو خواوو د دوه اړخیزو سیاسي، اقتصادي او ټولنیزو اړیکو د پیاوړتیا په اړه بحث او خبرې وکړې او د افغانستان او عمان د اړیکو د نوي پړاو د پرانستلو لپاره یې پخپلو ژمنو ټینګار وکړ.

امیر خان متقي له نوموړي سره په خبرو کې د اسلامي امارت پر لاسته راوړنو ټینګار وکړ؛ د لسګونو شخړو پای ته رسېدا، د نړیوالو او سیمه‌ییزو متوازنو اړیکو رامنځته کېدا او د ټولیز امنیت ډاډمنېدا او دې ته ورته نور بدلونونه د بهرنۍ پانګونې لپاره په ځانګړي توګه عماني پانګوالو او سوداګرۍ ته د اړینو فرصتونو په توګه یاد کړل.

متقي په مسقط کې د افغانستان سفارت د عملیاتو د اسانتیا لپاره له عمان حکومت څخه د مننې پر څرګندولو په عمان کې د افغان اتباعو لپاره د کار ویزو صادرول، د عمان بازار ته د افغان صادراتو اسانتیا او د دواړو هېوادونو ترمنځ د مستقیمو الوتنو پیل کول اړین لومړیتوبونه پر ګوته کړل.

البوسعیدي د افغانستان د ثبات او پرمختګ لپاره د عمان پر اوږدمهاله ملاتړ ټینګار وکړ او په سیاسي، اقتصادي او سوداګریزو برخو کې یې د دوه اړخیزو اړیکو د پیاوړتیا لپاره د عمان پر ژمنې ټینګار وکړ.

د عمان بهرنیو چارو وزیر د دواړو هېوادونو د بهرنیو چارو وزارتونو ترمنځ د دوامداره تبادلو لپاره هیله څرګنده کړه، د ملګرتیا او همکارۍ د نویو لارو د موندلو لپاره یې د پرله‌پسې خبرو اترو او عملي همکارۍ پر اهمیت ټینګار وکړ.

د اسلامي همکارۍ ټولنې (OIC) استازي طارق علي بخیت د یکشنبې پر ورځ د ترکیې د بهرنیو چارو وزارت د سویلي آسیا د عمومي رییس، جهاد ارګیني سره د افغانستان د وضعیت په ګډون پر بېلابېلو مسلو خبرې وکړې.

په دې غونډه کې، چې د سعودي عربستان په جده کې وشوه؛ دواړو خواوو د افغانستان د سیاسي، اقتصادي او بشري اړخونو په اړه نظرونه شریک کړل او د همکارۍ پر ممکنه لارو لارو یې بحث او خبرې وکړې.

د اسلامي همکاریو ټولنې په خبرپاڼه کې راغلي، چې غونډه په افغانستان کې د سیاسي، اقتصادي او بشري مسلو او په دې برخه کې د دواړو خواوو ترمنځ پر همکارۍ راوڅرخېده.

په خبرپاڼه کې راغلي، چې په دې خبرو اترو کې د افغانانو د ملاتړ او “له اسلامي امارت سره د رغنده خبرو اترو” لپاره د دوامدارې ښکېلتیا پر اهمیت ټینګار وشو.

د اسلامي همکارۍ ټولنې ويلي، چې دواړو خواوو د اړوند پرېکړو په رڼا کې د مهمو اندېښنو د حل لپاره د نظرونو او طریقو په اړه هم بحث شوی دی.

د غونډې په بهیر کې طارق علي بخت د اسلامي همکارۍ ټولنې په پرېکړه لیکونو کې ټاکل شویو اهدافو ته د رسېدو لپاره د ترکیې د رول او ګډون پر اهمیت ټینګار وکړ.

دواړو خواوو همدارنګه په افغانستان کې د سولې، سوکالۍ او ثبات د ګډو موخو د پرمختګ لپاره د یادښتونو تبادلې ته د دوام ورکولو ژمنه تکرار کړه.

د تورخم سرحدي لار تېره میاشت د پاکستان لخوا د یوې نوې پوستې د جوړولو په اړه له شخړې وروسته وتړل شوه او اوس د پاکستان رسنیو راپور ورکړ، چې پوله به د خبرو اترو تر راتلونکي پړاو پورې تړلې پاتې وي.

په تیرو دوه اوونیو کې د ډزو شدیدې تبادلې شوي، چې له کبله یې لږترلږه یو کس وژل شوی دی.

په سلګونه خلک هم په پوله کې بند پاتې دي او سوداګرو ته په میلیونونه زیانونه اوښتي دي؛ ځکه، چې لارۍ پاکستان او افغانستان ته د تېریدو وس نلري.

اناتولي خبري سرچینې د یوه پاکستاني چارواکي د څرګندونو له مخې راپور ورکړی، چې د یکشنبې پر ورځ (د کب نولسمه) سرحدي ځواکونو له اوونیو جګړو وروسته په تورخم کې پر دوه ورځني اوربند هوکړه وکړه.

په راپور کې راغلي، چې په تېرو دوه اوونیو کې لږ تر لږه یو کس وژل شوی؛ څو نور ټپیان دي او د دواړو خواوو سلګونه کورنۍ د جګړو له کبله بې ځایه شوې دي.

یوه لوړپوړي پاکستاني چارواکي د نوم د نه ښودلو پر شرط اناتولي خبري سرچینې ته خبرې ورکړی، چې دا هوکړه د تورخم په پوله کې د دواړو خواوو د قومي مشرانو له یوې جرګې وروسته رامنځته شوې ده.

د افغانستان استازیتوب د قبایلي مشرانو د ۳۵ کسیزې پلاوي لخوا شوی دی.

اناتولي راپور ورکړی؛ دواړو خواوو هم هوکړه وکړه، چې د خبرو اترو تر راتلونکي پړاو پورې د پولې په دواړو غاړو کې “هر ډول” ساختماني کارونه ودروي.

اړوند خبرې اترې د چارشنبې لپاره ټاکل شوې دي.

دغه راز اناتولي ته ویل شوي؛ احتمال لري، چې پوله د خبرو اترو له دوه‌یم پړاو وروسته بېرته پرانیستل شي.

تورخم د دواړو هېوادونو ترمنځ د ۱۸ لارو څخه یو ده، چې ګڼه ګوڼه لري.

شاوخوا ۱۰ زره خلک، چې په ټولیزه توګه افغانان دي؛ هره ورځ د پاکستان په سرحدي سیمو کې د طبي درملنې او د ژوند د ګټلو لپاره له دې لارې کار اخلي.