د یمن د حوثيانو المسیره ټلویزیون راپور ورکړی، چې د یمن د شمال لویدیځ پر صعده د امریکا د برید له کبله لږ تر لږه ۶۸ کسان وژل شوي او ۴۷ نور ټپیان دي.

المسیره د دوشنبې پر ورځ( د غویی اتمه) راپور ورکړی، چې امریکا په دې عملیاتو کې یوه بندخونه پر نښه کړې ده.

د یمن د حوثیانو د کورنیو چارو وزارت هم اعلان کړی، چې د امریکا د برید پر مهال په بندخونه کې ۱۱۵ افریقایي کډوال ساتل کېدل.

صعده د ایران ملاتړ لرونکو حوثیانو یو له مهمو اډو څخه ګڼل کیږي او پخوا هم د امریکا د هوايي بریدونو هدف ګرځیدلی ده.

العربیه څانګې د وري پر اتلسمه په صعده ولایت کې د حوثي قومندان ابو عبدالله الحمران له وژل کېدو راپور ورکړی و.

د ۱۴۰۳ کال د فبروري پر پېنځلسمه د ډونالډ ټرمپ ادارې حوثیان د “بهرنيو ترهګرو ډلو” په نوملړ کې شامل کړل.

په دې وروستیو ورځو کې د امریکا پوځ په یمن کې د حوثیانو پر وړاندې خپل کمپاین چټک کړی دی.

د حماس او اسرائیلو د جګړې له پیل لږ وروسته حوثیانو په سره سمندر، باب المندب تنګي او عدن خلیج کې پر نړیوالو کښتیو بریدونه پیل کړل، چې په سیمه کې یې سمندري امنیت له خطر سره مخ کړ. د دې بریدونو ساحه حتا د هند سمندر ته هم وغځېدله.

دې ایران پلوې ډلې  تل کوښښ کړی، چې د اسرائیلو خاوره  پر نښه کړې ده.

امریکا په سیمه کې خپل پوځي شتون پیاوړی کړی، چې څارونکي یې د ایران حکومت او حوثیانو لپاره بشپړ ګواښ ګڼي.

ټرمپ ټینګار کړی، چې د حوثیانو پر مرکزونو به د امریکا پوځي بریدونه تر هغې روان وي، چې پر نړیوالو کښتیو د دوی بریدونه ونه‌درول شي.

د غویی پر اتمې سهارمهال د امریکا پوځ اعلان وکړ، چې د حوثیانو پر وړاندې وروستیو بریدونو پر دې ډلې “وژونکې اغېزه” درلوده.

د امریکا پوځ دا هم ویلي، چې دوی به په یمن کې د عملیاتي امنیت ساتنې” لپاره د خپلو بریدونو په اړه ځانګړي جزئیات خپاره نکړي. “

د سکای نیوز عربيه ورځپاڼې د وري پر نولسمه په یمن کې د سیمه‌ییزو سرچینو د څرګندونو له مخې راپور ورکړ، چې د امریکا هوايي بریدونو له زیاتېدا وروسته حوثیانو خپل یو شمېر استخباراتي قومندانان د جاسوسۍ او د دوی د پوستو د همغږۍ د افشا کولو پر تور نیولي دي.

رویټرز راپور ورکړی، چې د روسیې ولسمشر ولادمیر پوتین د دوشنبې پر ورځ په می میاشت کې؛ د شوروي اتحاد او د هغه د متحدینو د دوه‌یمې نړیوالې جګړې د بریا د اتیایمې کلیزې د نمانځلو پر ویاړ له اوکراین سره درې ورځنی اوربند اعلان کړ.

د پوتین دا هڅه ښیي، چې روسیه اوس هم سولې ته لېواله ده. دا هغه څه دي، چې اوکراین او د هغه اروپایي متحدین ورسره مخالف دي؛ ځکه، چې په واشنګټن کې د ولسمشر ډونالډ ټرمپ اداره د سولې لپاره له ناکامو هڅو سخته ځوریږي.

کریملین ویلي، چې ۷۲ ساعته اوربند به د می له اتمې تر لسمې وي. دا په داسې حال کې ده، چې پوتین به د نازي جرمني پر وړاندې د بریا د نمانځلو لپاره د چین د ولسمشر شي جین پینګ په ګډون د نړیوالو مشرانو کوربتوب وکړي.

دغه راز کیف دا پوښتنه وړاندې کړې، چې پوتین ولې ډیپلوماسۍ ته د لار اوارولو لپاره لږ تر لږه د ۳۰ ورځني اوربند غوښتنه نه‌مني.

ولسمشر ولادمیر زیلینسکي تېرې شپې په ویډیويي څرګندونو کې ویلي: “د ځینو دلیلونو لپاره، هرڅوک باید د می د اتمې پرتمه وي، چې په دې وخت اوربند وشي او د پوځي نندارې پر مهال پوتین د آرامي یقیني شي”. “مونږ د خلکو ژوند ته ارزښت ورکوو؛ نه پوځي نندارې ته.”

روسیې ویلي، چې دوی بشپړ جوړجاړی غواړي، نه لنډمهاله وقفه.

د یکشنبې پر ورځ د امریکا بهرنیو چارو وزیر مارکو روبیو او د روسیې د بهرنیو چارو وزیر سرګي لاوروف له خبرو وروسته پوتین د ۷۲ ساعته اوربند اعلان کړی دی.

سپینې ماڼۍ ویلي، چې ټرمپ د روسیې او اوکراین ترمنځ دایمي اوربند غواړي.

د ملي امنیت شورا ویاند برایان هیوز ویلي: “په داسې حال کې، چې ولسمشر ټرمپ د ولادمیر پوتین د شخړې د درولو له لیوالتیا هرکلی کوي او ولسمشر ښکاره ویلي، چې هغه دایمي اوربند غواړي او دا شخړه سوله‌ییز حل ته ورسوي”.

کریملین د می له اتمې څخه تر لسمې پورې د اوربند په اړه په خبرپاڼه کې ویلي؛ “ټول پوځي اقدامات د دې مودې لپاره ځنډول شوي دي. روسیه باور لري، چې اوکرایني اړخ باید له دې اوربند ملاتړ وکړي”.

د خبرپاڼې له مخې؛ “د اوکراین له لوري د سرغړونو په صورت کې به د روسیې وسلوال ځواکونه مناسب او اغېزمن ځواب ورکړي.”

دا د اوربند دوه‌یم یو اړخیزه اعلان دی، چې پوتین پرې د سپېڅلي اختر له ۳۰ ساعته اوربند وروسته ټینګار کړی، چې هر اړخ یو بل ترې پر سرغړونې تورنوي.

د روسیې د بهرنیو چارو وزارت ویلي، چې لاوروف “د اوږدمهاله او دوامداره سولې لپاره د باور وړ چوکاټ رامنځته کولو لپاره د خبرو اترو پیلولو ته زمینه برابروي.”

کریملین ویلي، چې مسکو غواړي له اوکراین سره “پرته له کوم شرط څخه” مستقیمې خبرې اترې وکړي.

ټرمپ د یکشنبې پر ورځ له روسیې څخه وغوښتل، چې په اوکراین کې خپل بریدونه ودروي او وړاندیز یې وکړ، چې زیلینسکي د کریمیا پریښودو ته چمتو دی، چې روسیې په ۲۰۱۴ کال کې له اوکراین څخه ونیوله.

زیلینسکي د روانې میاشتې په پیل کې ویلي وه، چې دا کار به د اوکراین له اساسي قانون څخه سرغړونه وي. دا په داسې حال کې ده، چې کیف د یکشنبې پر ورځ د کریمیا په اړه د ټرمپ د څرګندونو په اړه تبصره نده کړې.

رویټرز راپور ورکړی، چې د امریکا ولسمشر ډونالډ ټرمپ د یکشنبې پر ورځ له روسیې وغوښتل، چې په اوکراین کې خپل بریدونه ودروي؛ خو د هغه لوړ پوړي ډیپلومات ویلي: که پرمختګ ونشي؛ نو امریکا ممکن د سولې له هڅو څخه ووځي.

په نیو جرسي کې له خبریالانو سره په خبرو کې ټرمپ ویلي، چې پر اوکراین د روسیې له پرله‌پسې یرغل له کبله ناهیلی شوی او زیاتوي، چې د شنبې پر ورځ یې په واتیکان کې د اوکراین له ولسمشر ولادمیر زیلینسکي سره مخامخ لیدنه ښه وه.

ټرمپ د زیلینسکي په اړه ویلي: “زه هغه ارام وینم. فکر کوم، چې هغه پر وضعیت پوهیږي. فکر کوم ، چې هغه غواړي یوې هوکړې ته ورسیږي.”

دغه راز د امریکا بهرنیو چارو وزیر مارکو روبیو ویل، چې که روسیه او اوکراین پرمختګ ونلري؛ کېدی شي د هوکړې لپاره د ټرمپ اداره د منځګړیتوب هڅې پرېږدي.

روبیو د NBC په “له رسنیو سره لیدنه” خپرونه کې ویلي: “دا پېښه باید ژر تر ژره وشي.” “که دا کار ونکړي، مونږ نشو کولی دې هڅې ته وخت او سرچینې وقف کړو.”

ټرمپ په واټیکان کې د جنازې د مراسمو په څنډه کې له زیلینسکي سره له لیدنې وروسته د روسیې پر ولسمشر ولادمیر پوتین نیوکه وکړه او په ټولنیزو رسنیو کې یې ویلي؛ د روسیې لپاره “هیڅ دلیل” نشته، چې پر ملکي سیمو توغندي وتوغوي.

د روسیې بهرنیو چارو وزیر سرګي لاوروف په یوه مخکې ثبت شوې مرکه کې، چې د یکشنبې پر ورځ له ملت سره مخامخ پروګرام کې خپره شوې ویلي، چې روسیه به د اوکراین د پوځ لخوا کارېدلو ځایونو پر نښه کول روان وساتي. له لاوروف څخه د تېرې اوونۍ پر کیف د روسیې د برید په اړه پوښتنه وشوه، چې ملکي وګړي په کې ووژل شول؛ هغه وویل: “هغه هدف، چې برید پرې شوی بشپړ ملکي نه و” او روسیه یوازې “هغه ځایونه، چې د پوځ لخوا کارول کیږي” پر نښه کوي.

زیلینسکي د ټیلیګرام پیغام رسولو په اپلیکیشن کې لیکلي، چې د هغه جګپوړي پوځي قومندان راپور ورکړی، چې روسیې د یکشنبې پر ورځ نږدې ۷۰ بریدونه کړي دي.

زیلینسکي وایي: “د جګړې په جبهه کې وضعیت او د روسیې د پوځ اصلي فعالیت دا ثابتوي، چې اوسمهال د نړۍ لخوا دومره فشار نشته، چې پر روسیې دا جګړه پای ته ورسوي.”

اوکرایني او اروپايي چارواکو تېره اوونۍ د جګړې د پای ته رسولو په اړه د امریکا ځینې وړاندیزونه رد کړل او له سیمې څخه د بندیزونو تر لرې کولو پورې د مسلو په اړه متقابل وړاندیزونه وړاندې کړل.

د امریکا په وړاندیزونو کې د روسیې لخوا د کریمه پر رسمیت پېژنه هم شته؛ د اوکراین دا ټاپو وزمه مسکو په ۲۰۱۴ کال کې ونیوله او له ځان سره یې یوځای کړه او همدارنګه د اوکراین په نورو برخو کې د روسیې د واکمنۍ پر رسمیت وپېژنه اړین وړاندیزونه دي.

دغه راز د اروپا او اوکراین وړاندیز د سیمې په اړه مفصل بحثونه تر هغه وخته پورې ځنډوي، چې اوربند ترسره شي.

د جرمني دفاع وزیر بوریس پیسټوریوس د یکشنبې پر ورځ ویلي، چې اوکراین باید د امریکا دې وړاندیز ته لېواله نشي او څرګندوي، چې د اوربند په بدل کې یې د سیمې د ځینو برخو پرېښودو ته ډېره هڅه کړې ده.

د امریکا په سنا کې لوړپوړي ډیموکراټ چک شومر د یکشنبې پر ورځ ویلي؛ هغه اندېښمن دی، چې ټرمپ به “پوتین ته تسلیم شي”.