د افغانستان کرکټ بورډ د پاکستان پخوانی پیاوړی توپ‌وهونکی او په خپله لوبډلمشرۍ کې د شل اوریز نړیوال جام ګټونکی یونس خان د روان کال اتلانو جام یا چمپینز ټرافي لوبو لپاره د افغان ملي لوبډلې د سلاکار روزونکي او څارونکي په توګه وټاکل شو.

د کرکټ بورډ د څرګندونو له مخې؛ د اتلانو جام سیالۍ د روان کال د کب پر لومړۍ / د فبرورۍ پر نولسمه د پاکستان پر کوربتوب پیلیږي، چې د کب تر نولسمې / د مارچ تر نهمې به روانې وي.

په دې لړ کې به د افغان اتلانو د لومړي پړاو لوبې د فبرورۍ پر یوویشتمه، شپږویشتمه او اته‌ویشتمه  ترسره شي.

اووه څلوېښت کلن یونس خان په ۱۱۸ ټسټ لوبو کې ۱۰۰۹۹ منډې، په ۲۶۵ یو ورځنیو سیالیو کې ۷۲۴۹ او ۲۵ نړیوالو شل اوریزو لوبو کې ۴۴۲ منډې جوړې کړې دي.

همدا راز نوموړي ۲۲۹ فرسټ کلاس، ۳۵۱ لیسټ اې او ۸۳ شل اوریزې لوبې هم ترسره کړې دي.

یونس خان په یو ورځنیو لوبو کې ځانګړی نوم لري، چې په یاده بڼه کې یې د ۷۲۴۹ منډو ترڅنګ ۷ سلیزې او ۴۸ نیمه سلیزې جوړې کړې دي. دغه ډول نوموړی په ټسټ لوبو کې ۳۴ سلیزې او ۳۳ نیمه سلیزې لري.

یونس خان له دې مخکې په ابوظبي کې د افغان ملي لوبډلې د روزنیزو هڅو پرمهال هم د توپوهنې د روزونکي په توګه دنده ترسره کړې، چې شتون یې ډېر ګټور و.

همدا راز نوموړی د پاکستان کرکټ ملي لوبډلې سره د توپوهنې د روزونکي په توګه هم پاتې شوی دی.

د یونس خان په لوبډلمشرۍ کې پاکستان د ۲۰۰۹ز. کال شل اوریز نړیوال جام ګټلی او همدا راز د نوموړي په شتون کې یاد هېواد د ۲۰۱۲ز. کال د آسیا جام لوبو اتلولي هم خپله کړې ده.

د افغانستان کرکټ بورډ ویلي؛ نوموړی به افغان لوبډلې ته په یادو سیالیو کې د پاکستان د اب و هوا، د پیچونو یا ویشتنځایونو د څرنګوالي، د ملي لوبدلې له مشر روزونکي سره د پلان جوړونې او همغږۍ، د لوبغاړو د کارکردګۍ  او په دغه برخه کې د سلاکارۍ، د پلان جوړونې او نورو اړوند برخو مسوولیتونه پر غاړه ولري.

د افغانستان کرکټ بورډ اجراییوي رییس نصیب خان په دې اړه وایي؛ د خوشحالۍ ځای دی، چې د ملي لوبډلې لپاره مو له یونس خان سره لنډمهاله قرارداد وکړ، هغه له دې مخکې هم له افغان اتلانو سره په اړوند ډګر کې کار کړی، چې په کې د نوموړي شتون ډېر ګټور و.

د خوشالۍ ځای دی، چې آریانا راډیو ټلویزیون درنو هېوادوالو ته د کرکټ نړیوال ۲۰ اوریز لیګ د سیالیو درېیم پړاو پر ژوندۍ او قانوني بڼه خپروي.

د یادونې ده، چې په ټول افغانستان کې د کرکټ مینه‌وال کولی شي د نورو خبرتیاوو او تازه معلوماتو لپاره د آریانا راډیو ټلویزیون ATN تر څنګ زمونږ ټولنیزې رسنۍ هم وڅاري.

آریانا راډیو ټلویزیون( ATN ) د دوشنبې پر ورځ( د مرغومي لسمه ) د "آریانا سنوکر اتلولۍ جام" په زړه پورې سیالۍ، چې ټاکل شوې د سلواغې په وروستیو کې ترسره شي؛ تولید او خپروي.

دغه سيالۍ به د سلواغې د درویشتمې او نهه‌ویشتمې تر منځ په کابل کې د يوې اوونۍ لپاره د هېواد د ١٦ غوره لوبغاړو په ګډون ترسره شي.

د آریانا راډیو ټلویزیون سوداګریز رییس لطف الله ستانکزي د دغو سیالیو د تولید او خپراوي د تړون د لاسلیک په مراسمو کې ویلي: « نن مونږ د سنوکر سیالیو د ترسره کولو د تړون د لاسلیک شاهدان یوو. په آریانا ټلویزیون کې تل زمونږ هڅه دا ده، چې څنګه کولی شوو کورنیو او نړیوالو لوبو ته وده ورکړو او څنګه کولی شوو په ښه او ګټور ډول یې د ټول افغانستان هېوادوالو ته ورسوو. دا په افغانستان کې د سپورټ د ودې او د سپورټي ټولنې لپاره زمونږ د ژمنو یوه برخه ده او هیله لرو، چې د دې کار پر ترسره کېدا مونږ سنوکر ته زیاته پاملرنه راواړوو."

د هېواد د سنوکر ملي فډراسیون رییس وحیدالله اصغري ویلي: نن د افغانستان د سنوکر ملي فډراسیون او آریانا نړیوال ټلویزیون ترمنځ د دې هوکړه لیک پر لاسلیکولو د افغانستان د سنوکر د ودې، پرمختګ او هڅونې په لاره کې یو بل مثبت او هڅوونکی ګام پورته شو، چې ورسره به دې شاهانه سپورټ ته د ځوانانو هڅې او همدارنګه د دې فډراسیون فعالیتونه وځلیږي."

د آريانا ټلويزيون د سوداګریز رییس په هېواد کې د سنوکر د ودې لپاره د دې سياليو ترسره کول اغېزمن بولي، چې د سنوکر د ملي فډراسيون مشر هم پرې ټينګار وکړ.

لطف الله ستانکزي ویلي: " د افغانستان په ډېرو ځایونو کې خلک د سنوکر لوبه کوي؛ خو میکانیزه شوې نده. زه فکر کوم، چې دا لیګ‌ او سیالۍ به دې اړه مثبت اغېز ولري او زه یې یوه ځلېدونکې راتلونکی وینم."

وحید الله اصغري ویلي: د دې شبکې او دې نړیوالې معتبرې رسنۍ له لارې د دغو سیالیو خپرول کولی شي له مرکز څخه تر ولایتونو او له ولایتونو څخه کلیو او بانډو ته د دې شاهانه سپورت د ودې او پراختیا په برخه کې ګټورې اغېزې ولري.

د يادونې ده، چې د آريانا سنوکر په سياليو کې به دوه افغان کډوال، چې په ايران او پاکستان کې مېشت دي هم ګډون ولري.