Connect with us

تازه خبرونه

د سیاسي جوړجاړي لپاره د جګړې د درولو غوښتنه وشوه

خپور شوی

د

(Last Updated On: )

د افغانستان د سولې لپاره د امریکا ځانګړي استازي زلمي خلیلزاد او یوناما دواړو د شنبې پر ورځ یوه اعلامیه خپره کړې؛ د جګړې له ښکېلو خواوو یې غوښتي، چې جګړه ودروي او د سولې خبرو اترو د لښتیلیک پر بنسټ پرمختګونه رامنځته کړي.

دا خبرې د پنجشنبې پر ورځ په روم کې د اروپايي اتحادیې، ناتو، انګلستان، فرانسې، جرمني، ایټالیا، ناروې او امریکا تر منځ له غونډې وروسته راپورته کیږي.

په اعلامیه کې څرګنده شوې، چې د هېوادونو او سازمانونو ډله له افغانستان سره ځواکمن ګډون ته ژمنه ده او د لیږد نوي پړاو په بهیر کې به د بهرنیو ځواکونو له وتلو سره روان پرمختګونه له نږدې وڅاري.

دوی د تاوتریخوالي له لوړې کچې، پوځي بریدونو او بشري حقونو څخه سرغړونو اندېښمن کړي او وایي؛ مونږ پر ټولو لوریو غږ کوو، چې تاوتریخوالی کم او د ملکي وګړو ساتنه وکړي او د نړیوالو بشردوستانه قوایونو له مخې د خلکو مسوولیتونو ته درناوی وشي.

دغه راز څرګنده شوې؛ مونږ اوربند ته د رسیدو پر اړتیا ټینګار کوو، چې د خبرو اترو بریا تضمین کړو او د افغان امنیتي ځواکونو قربانۍ باید هیرې نشي.

دې ډلې ټینګار کړې، چې په افغانستان کې د جګړې لپاره هیڅ ډول پوځي حل نشته او له هغه لوري، چې واک و ځواک ته د رسېدو لپاره پوځي لار غوره کوي؛ ملاتړ نکیږي.

د افغانستان د سولې امریکایي استازي زلمي خلیلزاد دغې ناستې د ګدې اعلامیې په اړه ویلي؛ مونږ د سیاسي جوړجاړي پر اړتیا همغږي یو؛ خو هغه جوړجاړی، چې مونږ یې ملاتړ کوو پېنځه برخې لري:

۱- ټولګډونه حکومت

۲- د سیاسي مشرانو د ټاکني حق

۳- د ټولو نرینه او ښځو لپاره د بشري حقونو ساتنه او ملاتړ

۴- د تروریزم پر وړاندې د مبارزې ژمنې

۵- د اساسي او نړیوال قانون پلوي.

نوموړي په خپلو ټویټونو کې په ډاګه کړې: د روم غونډې له جوړولو سره به مونږ د سیمې هېوادونو، ترویکا پلس هېوادونو او ملګرو ملتونو سره کار وکړو، چې یوې هوکړې ته ورسیږو.

هغه زیاته کړې؛ ګډ کار له افغانانو سره مرسته کوي، چې پر عادلانه او دوامداره سولې هوکړه وشي او له راتلونکي نړیوال سیاسي او اقتصادي ملاتړه برخمن پاتې شي.

دغه راز دې ډلې د افغانستان د حکومتي او طالب مشرانو تر منځ په دوحه کې له خبرو اترو هرکلی وکړ او څرګندوي: مونږ د یوه جامع سیاسي جوړجاړي په اړه د خبرو ګړندی کولو او په نږدې وخت کې د بیا کتنې لپاره د دواړو لوریو له اعلان شوې ژمنې څخه هم هرکلی کوو. مونږ باور لرو، چې راتلونکې ناستې به پر اصلي مسلو راوڅرخي او یوه ټولګډونه سیاسي جوړجاړي ته د رسېدو لپاره به بنسټیزې وي.

دې ډلې پر دواړو خواوو غږ کړی؛ پر ښه نیت خبرې وکړئ، چې عادلانه او سیاسي جوړجاړي ته ورسیږئ.

دې ډلې د قطر د ستاینې ترڅنګ ویلي، چې دوی به د افغانستان ګاونډ هېوادونه دې ته وهڅوي، چې له افغانانو سره خپلې مرستې پیاوړې او تلپاتې سولې او اقتصادي پراختیا لپاره مرستې وکړي.

دغه راز مونږ له ټولو اړخونو غواړو، چې د بهرنیو سفارتونو او نورو ډیپلوماټیکو ماموریتونو، څو اړخیزو ادارو، د رسنیو نمایندګانو، هوایي ډګرونو او نادولتي سازمانونو او د دوی د افغان او نړیوالو کارمندانو امنیت ډاډمن کړي.

مونږ په ځانګړي توګه د ترکیې چمتووالي او ژمنې، چې له اړتیا سره سم د هوایي ډګر په امنیت کې مرستې ته ټټر وهي؛ نړۍ مننه کوو.

تازه خبرونه

په امریکا کې سختو توپانونو مرګ او ژوبله رامنځته کړه

د ای‌بي‌سي نیوز د راپور له مخې؛ دغو توپانونو او بوړبړکیو د امریکا په میزوري، آرکانزاس، ټکزاس، اوکلوهوما، کانزاس او میسیسیپي ایالتونو کې ۲۹ کسان ټپیان کړي دي او پراخ مالي زیانونه یې هم رامنځته کړې دي.

Published

on

(Last Updated On: )

امریکایي رسنیو راپور ورکړی، چې د لومړنیو څرګندونو له مخې د دې هېواد په لویدیځو او سویلي سیمو کې سختو توپانونو ۳۳ کسان مړه کړي او ۲۹ نور ټپیان دي.

د ای‌بي‌سي نیوز د راپور له مخې؛ دغو توپانونو او بوړبړکیو د امریکا په میزوري، آرکانزاس، ټکزاس، اوکلوهوما، کانزاس او میسیسیپي ایالتونو کې ۲۹ کسان ټپیان کړي دي او پراخ مالي زیانونه یې هم رامنځته کړې دي.

په راپور کې زیاته شوې، چې تر دې دمه له ۱۲۷ ډېرې توپاني څپې او بوړبړکۍ راغلي، چې سرعت یې په ساعت کې له ۱۳۰ کیلومټرو ډېر ښودل شوی دی.

په راپور کې راغلي؛ توپانونو ۵۰۰ ودانۍ نړولي، د برښنا سیسټم یې خراب کړی او ځنګلي اورونه یې رامنځته کړي دي.

ویل کیږي، چې توپان اوس هم چټک روان دی او میلیونه خلک یې له مالي او ځاني زیانونو سره مخ دي.

Continue Reading

تازه خبرونه

د ملګرو ملتونو امنیت شورا د یوناما ماموریت د غځولو لپاره رایې اچوي

دا په داسې حال کې ده، چې څه وخت مخکې د اسلامي امارت ویاند په افغانستان کې د یوناما ماموریت “ناکام” یاد کړی دی.

Published

on

(Last Updated On: )

د ملګرو ملتونو امنیت شورا نن یکشنبه (د کب شپږویشتمه) څرګنده کړې؛ ټاکل شوې، چې سبا، دوشنبه (د مارچ اووه‌لسمه) په افغانستان کې د ملګرو ملتونو د مرستندویه پلاوي یا یوناما د ماموریت غځولو لپاره د یوې مسودې پر پرېکړه لیک رای اچونه وشي.

دې شورا په یوه راپور کې ویلي: که دا مسوده تصویب شي، نو د یوناما ماموریت به د یو بل کال لپاره پرته له دې، چې خپلې دندې او لومړیتوبونه بدل کړي وغځوي.

د راپور له مخې؛ په دې مسوده کې د یوناما له یو کلن ماموریت سره د بشري حقونو، په ځانګړي توګه د ښځو او نجونو حقونو، ښځې، سوله او امنیت، په افغانستان کې اقتصادي او بشري وضعیت، ترهګري، د مخدره توکو قاچاق، سپکې وسلې، داخلي بې ځایه شوي کډوال او د طبیعي پېښو اغېزې خوندي پاتې دي.

د ملګرو ملتونو امنیت شورا ویلي؛ تمه ده، چې د شورا ټول ۱۵ دایمي او غیر دایمي غړي به ترې ملاتړ وکړي.

دا په داسې حال کې ده، چې څه وخت مخکې د اسلامي امارت ویاند په افغانستان کې د یوناما ماموریت “ناکام” یاد کړی دی.

د اسلامي امارت ویاند ذبیح الله مجاهد د یوناما ماموریت تورن کړی، چې د افغانستان د وضعیت په اړه “منفي او ناسم” راپورونه ورکوي.

مجاهد ویلي، چې د یوناما راپورونو په ملګرو ملتونو کې د افغانستان په اړه “منفي ذهنیت” رامنځته کړی دی.

Continue Reading

تازه خبرونه

امریکا په یمن کې د ۳۱ حوثیانو پر وژلو د هوايي بریدونو لړۍ پیل کړه

د امریکا مرکزي قومندې سینټکام د شنبې پر ماښام ناوخته اعلان وکړ، چې په سره بحیره کې د امریکا له یوې کښتۍ څخه جنګي جټ الوتکو د حوثي وسلوالو پر مرکزونو یو لړ هوایي بریدونه پیل کړي دي.

Published

on

(Last Updated On: )

متحده ایالاتو د ایران له ملاتړه برخمنو حوثي یاغیانو پر وړاندې پراخ هوايي بریدونه پیل کړي او تهران ته یې خبرداری ورکړی، چې سمدلاسه د دې ډلې ملاتړ پای ته ورسوي، چې امریکا یې د ترهګرې ډلې په توګه پېژني.

د امریکا مرکزي قومندې سینټکام د شنبې پر ماښام ناوخته اعلان وکړ، چې په سره بحیره کې د امریکا له یوې کښتۍ څخه جنګي جټ الوتکو د حوثي وسلوالو پر مرکزونو یو لړ هوایي بریدونه پیل کړي دي.

د رویټرز د څرګندونو له مخې؛ د شنبې پر شپه په هوايي بریدونو کې لږ تر لږه ۳۱ کسان وژل شوي دي. د حوثي وسلوالو چارواکي وايي، چې د ټپیانو شمېر ۲۳ دی؛ دا ادعا په خپلواکه توګه د تائید وړ نده.

رویټرز د یمن د یوه اوسېدونکي د څرګندونو له مخې ویلي، چې “چاودنې زورورې وې او سیمه یې د زلزلې ته ورته ولړزوله.”

له برید یو ساعت مخکې د امریکا ولسمشر ډونالډ ټرمپ حوثیانو ته خبرداری ورکړ، چې که دوی پر کښتیو بریدونه او پر اسرائیلو د توغندیو ویشتل ونه دروي؛ نو “دوزخ به درباندې راکښته شي”.

ډونالډ ټرمپ ایران ته دا خبرداری هم ورکړ، چې امریکا به تهران “په بشپړه توګه مسوول وګڼي، او که چیرې د حوثیانو ملاتړ پای ته ونه رسوي؛ نو مونږ به نرم نشو”.

ډونالډ ټرمپ په ټروټ پاڼه کې لیکلي؛ د امریکا پوځ ته یې امر کړی، چې په یمن کې د “حوثي ترهګرو” پر وړاندې دې پرېکنده او ځواکمن پوځي هڅې پیل کړي.

د یکشنبې پر سهار د ایران  بهرنیو چارو وزیر عباس عراقچي په حوثیانو باندې د امریکا د نوي برید د “بندولو” غوښتنه وکړه، او همدارنګه یې د حوثیانو لپاره د تهران د دوامداره ملاتړ د پایلو په اړه د ډونالډ ټرمپ خبرداری ته ځواب ورکړ.

عباس عراقچي په ایکس پاڼه کې لیکلي، چې “د امریکا حکومت حق نلري، چې د ایران بهرنۍ پالیسي وټاکي.هغه دوره په ۱۳۵۷  کال کې پای ته رسېدلې ده.”

په همدې ورځ د ایران د بهرنیو چارو وزارت ویاند اسماعیل بقائي هم د حوثي ډلې پر وړاندې د امریکا او بریټانیا بریدونه “پر کلکه” وغندل.

د سپاه پاسدارانو قومندان حسین سلامي د یکشنبې پر ورځ د امریکا د ولسمشر د څرګندونو په ځواب کې ویلي، چې “ایران به هیڅکله جګړه پیل نکړي … خو که څوک مونږ ته ګواښ وکړي،” ایران به “مناسبه، پرېکنده او وروستۍ ځواب ورکړي.”

هغه د یمن د حوثیانو له بې ثباته کولو عملیاتو سره د ایران د تړاو ردکړ او وایي: “زه ټولو دښمنانو ته خبرداری ورکوم، چې مونږ به هر ګواښ ته که  دا عملي اړخ غوره کړي؛ سخت، پرېکنده او ویجاړونکي ځواب ځواب ورکړو.”

دغه راز د امریکا بهرنیو چارو وزارت اعلان وکړ، چې د امریکا بهرنیو چارو وزیر مارکو روبیو له خپل روسي سیال سرګي لاوروف سره اړیکه نیولې، چې هغه ته د پوځي عملیاتو په اړه معلومات ورکړي.

د روسیې بهرنیو چارو وزارت اعلان وکړ، چې د بهرنیو چارو وزیر سرګي لاوروف له امریکا وغوښتل، چې په یمن کې پر حوثي یاغیانو خپل بریدونه ودروي.

د راپور له مخې؛ له مارکو روبیو سره په ټیلیفوني خبرو کې لاوروف “د زور کارولو د سمدستي بندولو اړتیا او د نورو وینو تویولو د مخنیوي لپاره د ټولو خواوو ترمنځ د سیاسي خبرو اترو پر اهمیت ټینګار وکړ.”

د یمن پر حوثیانو هوایي بریدونه د جنورۍ له شلمې راپدېخوا د ډونالډ ټرمپ له واکمنېدو وروسته په منځني ختیځ کې د امریکا تر ټولو پراخ پوځي عملیات دي.

رویټرز او نورو رسنیو د امریکایي چارواکو د څرګندونو له مخې راپور ورکړی، چې دا بریدونه به یوازې یوې ورځې پورې نه محدودیږي او روان به وي.

په تېرو ۱۸ میاشتو کې حوثي وسلوالو د سیمې له اوبو څخه پر تېرېدونکو کښتیو لسګونه بریدونه کړي او ادعا یې کړې، چې د فلسطینیانو ملاتړ کوي.

Continue Reading
Advertisement

Trending

Copyright © 2024 Ariana News. All rights reserved!