د افغانستان کورنیو چارو وزارت د اسټرالیایي پروفیسور ټیموتي ویکس( جبرئیل عمر ) ، چې په افغانستان کې یې ژوند کاوه له مړېنې خبر ورکړ او پر ​​مړېنه یې خواشیني څرګنده کړه ده.

د کورنیو چارو وزارت ویاند عبدالمتین قانع په یوه رسنیزه خبرپاڼه کې ویلي، چې ټیموتي ویکس اسلامي امارت ځواکونو په وروستیو کلونو کې نیولی و؛ خو له څه مودې وروسته د بندیانو په تبادله کې خوشې شو او بیا يې اسلام قبول کړ او خپل نوم یې له ټیموتي ویکس څخه جابرئیل عمر ته بدل کړ.

د عبدالمتین قانع د څرګندونو له مخې، هغه له ډېرې مودې راپدېخوا د سرطان پر ناروغۍ اخته و او د چهارشنبې پر ورخ( د مرغومي نولسمه) د کابل په خپل استوګنځي کې مړ شو.

د یادونې ده، چې جبرئیل عمر په کابل کې د انګلیسي ژبې د ښوونکي په توګه دنده ترسره کوله.

د هند بهرنیو چارو وزارت مرستیال ویکرام میسري په متحده عربي اماراتو کې د افغانستان د بهرنیو چارو وزارت له چارسمبالي امیرخان متقي سره لیدلي دي.

د هند بهرنیو چارو وزارت د خبرپاڼې له مخې؛ په دې کتنه کې، چې نن( چارشنبه د مرغومي نولسمه )ترسره شوې دواړو خواوو پر دوه اړخیزو اړیکو، د سیمې پر امنیتي وضعیت او بشري مرستو خبرې کړې دي.

د دې وزارت د خبرپاڼې له مخې؛ دواړو لوریو ژمنه کړې، چې د چابهار بندر له لارې به سوداګرۍ ته نورو هم وده ورکړي.

دغه راز ښاغلي مصري ډاډ ورکړی، چې له افغانانو سره پر بشري مرستو سربېره به په افغانستان کې د پراختیايي پروژو ملاتړ ته هم روان وساتي.

هند ویلي، چې تر اوسه یې افغانستان ته د توکو څو باره، چې په کې ۵۰ زره ټنه غنم، ۳۰۰ ټنه درمل، ۲۷ ټنه زلزله ځپلو لپاره مرستې، د پولیو واکسین ۱۰۰ میلیون دوزه د ماشومانو د ګوزڼ واکسین او نور اړین توکي مرسته کړې ده.

د یادونې ده، چې په دې وروستیو کې د افغانستان او هند ترمنځ ډیپلوماټیکې اړیکې مخ په پراخېدو دي.

د ریاست الوزرا سیاسي مرستیال په کابل کې د ایران د سفارت له چارسمبالي علی رضا بیګدالي سره په یوه کتنه کې ویلي، چې د اوبو د حق موضوع د دواړو خواوو ترمنځ د متقابل تفاهم له لارې حل شوې او په دې برخه کې نامسؤلانه څرګندونې کولی شي د دواړو هېوادونو پر اړیکو منفي اغېزه وکړي.

د ایران اسلامي جمهوریت سفیر علي رضا بیګدلي د دواړو هېوادونو د اړیکو پراختیا او اقتصادي همکاریو پر زیاتوالي ټینګار وکړ او وایي، چې د چابهار بندر فعالول او پرانیستل به یې د هڅو په سر کې وي.

همدارنګه یې د ریاست الوزراء سیاسي مرستیال ته تهران ته د سفر بلنه ورکړه.

د ریاست الوزراء سیاسي مرستیال مولوي عبدالکبیر د افغان کډوالو د کوربتوب له کبله له ایران څخه د مننې ترڅنګ وویل، افغان کډوالو ته دې لازمې اسانتیاوې برابرې شي. له هغوی سره دې نرمي وشي او د افغان کدوالو له اجباري ایستلو دې ډډه وشي.

مولوي عبدالکبیر زیاته کړې؛ اسلامي امارت اجازه نه ورکوي، چې له هېوادونو سره اړیکي یې د نورو له لوري تر اغېز لاندې شي، بلکې افغانستان د سیمه‌ییز ثبات او اقتصادي پیاوړتیا په هڅه کې دی.