له څه وخت راپدېخوا په کندهار ولايت کې د کوکنارو د بديل کښت لپاره هڅې پيل شوې او بڼوالو د پستې د بڼونو(باغونو ) پر جوړولو پيل کړى دى.

د دې ولایت سیمه‌ییز چارواکي وايي، له ۱۵۰ هکتاره بڼونو څخه ۱۱۵ ټنه پسته ترلاسه شوې ده.

د چارواکو د څرګندونو له مخې؛ پسته د کوکنارو یو له اغېزمنو بدیلونو څخه ده، چې هڅه کوو د بڼونو د جوړولو بهیر پراخ شي.

د دې ولایت د بڼوالۍ( باغدارۍ ) مسوولينو ويلي، پسته د نورو مېوو پر پرتله ښه حاصلات لري او بيې يې هم لوړې دي.

د کریم الله نومي بڼوال د څرګندونو له مخې؛ دوی هره ورځ له ۳۰ څخه تر ۶۰ کسانو پورې د پستې په بڼ کې کار کوي او له دې لارې خپله روزي ګټي.

د کندهار يو شمېر کروندګرو ويلي، د پستې د بڼونو د جوړولو لګښت ډېر دی او له دولت څخه غوښتنه کوي، چې په دې برخه کې ورسره همکاري وکړي.

د کندهار ولايت د کرنې، اوبولګولو او مالدارۍ رياست استازی محمد داوود دوست وايي، د پستې بڼونه د کوکنارو د کښت ښه بديل کېدای شي او په دې برخه کې به له کروندګرو سره همکاري وکړي.

ویل کیږي، چې په ١٥٠ هکتاره ځمکه کې د پستې بڼونه جوړ شوي، چې ترې ١١٥ ټنه پستې ترلاسه شوې دي.

په دایکندي ولایت کې د مهاجرینو ستونزو ته د رسېدو کمیسیون تېره ورځ د دې ولایت د مهاجرینو او راستنو شویو لپاره د ځمکو د وېش لړۍ پیل کړه.

دغه برنامه د ملي دفاع وزارت د لوی درستیز فصیح الدین فطرت، د افغانستان بانک ادارو مسوولینو، اوسپنې پټلۍ، بدني روزنې، د دایکندي ولایت د مقام، رییسانو، یو شمېر مهاجرینو او رسنیو په شتون کې پیل شوه.

فصیح الدین فطرت ویلي: خوښ یم، چې دایکندي ته راغلی یم، د مهاجرینو ستونزې له نږدې ګورم او د دوی لپاره د ځمکو وېش لړۍ پیلوم.

هغه زیاته کړې؛ له څلور لسیزو جګړو وروسته اسلامي امارت واک ته ورسېده، جګړه یې ختمه کړه او ټول هېوادوال ډاډمن ژوند تېروي.

نوموړی وایي، چې « اسلامي امارت د یو مسوول نظام په توګه خپل ټول توان په کار اچولی، چې د مهاجرینو ستونزو ته رسېدنه وکړي او د هغوی لپاره د دایمي مېشتېدنې امکانات برابر کړي.»

د نوموړي د څرګندونو له مخې: « دا طرزالعمل له بشپړېدو وروسته د امیرالمؤمنین حفظه الله له لوري توشیح شوی او هغه مهاجرین، چې د سرپناه ستونزې لري دغه ستونزې به یې حل شي.»

د دایکندي والي نجیب الله رفیع هم مهاجرینو ته ډاډ ورکړ، چې د مشرانو له لارښوونې سره سم به ځمکې په عادلانه توګه مستحقو کسانو ته ووېشل شي.

هغه وویل: « د فخر ځای دی، چې په دې کم وخت اسلامي امارت ټولو مسایلو ته متوجه دی او د مهاجرینو ستونزې یې په اساسي توګه درک کړې دي.»

د دایکندي والي له موسسو هم وغوښتل، چې دغه پروژې په اساسي توګه جوړې کړې.

 د خلکو پر استازیتوب امان الله متحد ویلي: « د دایکندي خلک له فقر، بې‌وسۍ او محرومیت له کبله ډېر ګاونډ هېوادونو ته مهاجر شوي دي. دا، چې اسلامي امارت دغه ولایت ته توجه وکړه او د مهاجرینو ستونزو ته د رسېدو کمېسیون پلاوی دغه ولایت ته ورغی؛ ترې مننه کوم. »