ازبکستان د کرنې د سکټور په بېلابېلو برخو کې له افغانستان سره همکارۍ ته لېوالتیا څرګنده کړې او د دوه اړخیزو همکاریو پر پراختیا یې خبرې کړې دي.

د کرنې اوبولګولو او مالدارۍ وزارت چارسمبالي( سرپرست) عطاءالله عمري د ازبکستان د کرنې له وزیر ابراهیم عبدالرحمن اوف سره په تاشکند کې کتلي او د کرنې او مالدارۍ په برخو کې یې د همکاریو پر پراخېدو ټینګار کړی.

عطاءالله عمري د پانګونې فرصتونو ته په نغوته (اشاره) کې ډاډ ورکړی، چې افغان لوری به پانګوالو ته اسانتیاوې برابرې کړي.

د ازبکستان د کرنې وزیر د کرنیزو توکو د تبادلې، تخمونو برابرولو او تخنیکي همکاریو ژمنه وکړه.

د ازبکستان لوري دا هم ویل، چې هېواد یې چمتو دی د کرنې په بېلابېلو برخو کې له افغانستان سره همکاري وکړي.

د کرنې وزارت رهبرۍ د ازبکستان د کرنې وزارت ترڅنګ د اوبو او انرژۍ وزارت له چارواکو سره هم کتلي او هغوۍ ژمنه کړې، چې د افغانستان د اوبو په مدیریت کې به پانګونه او همکاري وکړي.

د کرنې او مالدارۍ وزارت ویاند غلام محمد کاظم وایي: ((د  واړو خواوو د غیر معیاري توکو د لېږد، نباتي کرنتین او حیواني روغتیا په برخو کې د همکارۍ پرېکړه کړې ده. د هېواد  د کرنې وزیر په کرنه، مالدارۍ او نورو برخو کې د پانګونې پراخ فرصتونه ازبکستاني لوري ته تشریح کړل او ډاډ یې ورکړ، چې افغانستان به پانګوالو ته لازمې اسانتیاوې برابرې کړي)).

د اقتصادي چارو ځیني شنونکي هم وايي، چې له افغان لوري سره د کرنې او مالدارۍ په برخو کې د ازبکستان همکاري او پر ظرفیتونو ګډه پانګونه کولی شي د کرنې او مالدرۍ سکټور د پراختیا لپاره زمینه برابره کړي. ازبکستان ډېرو کرنیزو توکو ته اړتیا لري او افغانستان کولی شي د پنبې، وریجو، مېوو او سبو د تولید په برخه کې اغېزناک رول ولوبوي.

دغه راز ازبکستان چمتو دی، چې اصلاح‌ شوي کرنیز تخمونه افغانستان ته ورکړي، چې بزګران یې وکري او له حاصلاتو وروسته یاد هېواد چمتو دی، چې بېرته دغه تولیدات وپېري.

د اقتصادي چارو شنونکی قطب الدین یعقوبي وایي: (( له افغان لوري سره د کرنې او مالدارۍ په برخو کې د ازبکستان همکارۍ او د دې سکټور پر شته ظرفیتونو ګډه پانګونه کولی شي د کرنې او مالدرۍ ته د پراختیا زمینه برابره کړي)).

 د افغانستان د کرنې وزارت پر مشرۍ تللي پلاوي د لیدنو پر مهال ژمنه کړې، چې د نباتي کرنټین او د حیواني روغتیا په برخو کې به د بندرونو له لارې نږدې همکاري کوي، چې سریع الفساد محصولاتو ته لازمې اسانتیاوې برابرې شي.

د ننګرهار په تورخم کې د عمري کمپ له لارې راستنېدونکي کډوال پخپل وخت ثبتېږي، خواړه ترلاسه کوي، نغدي مرستې ورکول کېږي او د ملي دفاع وزارت له لوري خپلو اصلي سیمو ته انتقالېږي.

د ننګرهار ولایت د رسنیو دفتر د خبرپاڼې له مخې؛ د دې ولایت د کډوالو او بېرته راستنېدونکو چارو ریيس بازمحمد عبدالرحمن زیاته کړې، چې په تورخم کې ټولو راستنېدونکو افغان کډوالو ته منظم، چټک او معیاري خدمتونه وړاندې کېږي.

نوموړي ویلي؛ د کډوالو د سم مدیریت، اسانتیاوو او همغږۍ لپاره نه ستړې کېدونکي ګامونه اخيستل کيږي او د ملي او نړیوالو بنسټونو همکاري هم پیاوړې شوې ده.

دغه راز د یادې سرچینې د څرګندونو له مخې؛ د ننګرهار  عامې روغتیا رییس  امین الله شریف په دې اړه د EPR  غونډې پرمهال ډاډ څرګند کړ، چې په تورخم کې به راستنېدونکو هېوادوالو ته روغتیايي خدمات نور هم پراخ شي.

ویل کیږي، چې راستنېدونکي کډوال هم له برابر شویو خدمتونو خوښ دي او د حکومت له اقداماتو مننه کوي.

له پاکستان څخه د افغان کډوالو د جبري ایستلو د بهیر له ګړندۍ کېدو وروسته د بهرنیو چارو وزارت چارسمبالي(سرپرست) امیر خان متقي په کابل کې د پاکستان د سفارت له شارژدافیر سره په دې اړه خبرې کړې دي.

د بهرنیو چارو وزارت د خبرپاڼې له مخې؛ امیرخان متقي په خپلو خبرو کې د افغان مهاجرینو پر جبري ایستنې او د ځینو ارګانونو له لوري له مهاجرینو سره په نامناسب چلند خپله خواشیني څرګنده کړه او روان ناسم چلند یې پاروونکې او د دواړو هېوادونو د اړیکو پر زیان وباله او د دې وضعیت د بدلولو غوښتنه یې وکړه.

د بهرنیو چارو وزارت د څرګندونو له مخې؛ په کابل کې د پاکستان سفارت چارسمبالي عبیدالرحمن نظاماني د  بهرنیو چارو وزارت له چارسمبالي امیرخان متقي سره د لیدنې پرمهال د افغانستان او پاکستان ترمنځ پر سیاسي او اقتصادي مسائلو هر اړخيزې خبرې کړې دي.

د یاد وزارت په خبرپاڼه کې راغلي: د پاکستان سفارت چارسمبالي ویلي، چې د اسلامي امارت تشویش درک کوي او یاده موضوع به له اړوند ارګانونو سره شریکه کړي.

د اړوند څرګندونو له مخې؛ هره ورځ سلګونه کورنۍ له پاکستان څخه جبري ایستل کیږي او افغانستان ته ننوځي، چې تر اوسه پورې په تېرو لس ورځو کې نږدې ۵۰ زره کورنۍ بېرته هېواد ته راستنې شوې دي.

اسلام‌آباد ويلي، چې د امنیتي پېښو د کمولو لپاره د افغان کډوالو د شړلو هوډ لري؛ خو کابل وايي، چې افغانان د پاکستان په ناامنۍ کې ښکېل ندي.

ویل کیږي، چې د دواړو لوریو لخوا د متقابلو اغېزمنو اقداماتو پر کولو او د لوړ پوړیو پلاوو پر تګ راتګ ټینګار وکړ.