د اسلامي امارت د رهبر د ۵ سوه نولسمې ګڼې حکم له مخې؛ د چارسمبالي حکومت ټول مسوولان، مجاهدین، منسوبین او عام هېوادوال اړ دي، چې د کورنیو چارو وزارت له اجازې پرته د سپکو او درندو وسلو او مهماتو له ساتنې او لېږد - رالېږد څخه ډډه وکړي.

کورنیو چارو وزارت په یوه خپره شوې خبرپاڼه کې لیکلي؛ د ټولو سپکو او درندو وسلو د ګرځولو لپاره پخواني جوازونه، استعلامونه، مکتوبونه او خطونه لغو اعلان شوي او د باور وړ ندي.

کورنیو چارو وزارت وایي؛ نوي جوازونه د جرمونو د کشف او پر وړاندې یې د مبارزې ریاست د ډایاک مدیریت لخوا وېشل کیږي.

یاد وزارت ویلي؛ د اسلامي امارت د رهبر د ۱۲۵۹ ګڼې حکم له مخې: د موټرو د تورو ښېښو او پردو لپاره هم جوازونه د همدې مدیریت لخوا ویشل کیږي او له جواز پرته حکومتي او ملکي وګړي د تورو ښېښو او پردو لرونکیو موټرو د ګرځولو اجازه نلري.

ویل کیږي، چې ټولو ملکي ادارو، ملي سوداګرو، صرافانو او عامو هېوادوالو د وسایطو پر ښېښو د تورو پردو د لګولو لپاره دې قانوني جوازونه د کورنیو چارو وزارت له ډایاک مدیریت څخه ترلاسه کړي.

د یادونې ده، چې د ملي دفاع وزارت او د استخباراتو لوی ریاست برحاله منسوبین، چې د اسلامي امارت د پورته یاد شویو ګڼو حکمونو له مخې پر شرایطو برابر وي؛ د خپلو ادارو له لورې ورته جوازونه چاپ او وېشل کيږي.

آریانا او آریانا نیوز ټلویزیوني شبکو د آسیا - اقیانوسیې خپرندویې اتحادیې (ABU) دوه له ویاړه ډکې کلنۍ جایزې ( په کاري چاپېریال کې تنوع او هېواد ته د جبري  مهاجرو د راستنېدو پراخ پوښښ ) ترلاسه کړې دي.

د آریانا راډیو ټلویزیون او آریانانیوز چارواکو د سې‌ شنبه پر ورځ( د لړم اتمه) د دې جایزې د ترلاسه کولو پر ویاړ په یو لړ مراسمو کې ویلي، چې دوی له پاکستان څخه د افغان مهاجرینو د جبري شړلو او د دې ټلویزیوني شبکې کارمندانو ته د خوندي چاپېریال برابرولو له کبله د دې اتحادیې کلنۍ جایزې ترلاسه کړې دي.

د آریانا ټلویزیون او آریانا نیوز د سوداګریزې څانګې مرستیال او مشر لطف الله ستانکزي ویلي: مونږ دوه معتبرې جایزې خپلې کړې؛ یوه یې د کاري چاپېریال د تنوع او دوه‌یمه یې د مهاجرینو اړوند خبري پوښښ په برخه کې دي. مونږ د آریانا راډیو ټلویزیون له همکارانو ډېر خوښ یوو او دا زمونږ د کار او کاري چاپېریال رښتینې ځلونه کوي. مونږ هیله من یوو، چې همکاران به په خپلو اړوند برخو او څانګو کې نور ډاډمن ګامونه هم واخلي.

د آریانانیوز خبریال مجیب الرحمن بهیر په دې مراسمو کې ویلي: مونږ دا جایزه حکومت ته د خلکو د دردونو د رسولو له لارې تر لاسه کړې ده. زما هغه سختې ورځې، چې کډوال مو له پاکستان څخه راغلل په یاد دي هغو سختې ورځې تېرې کړې؛ بل ځای نه‌وو، پاکستان په ډېر سخت حالت کې پرېکړه کړې وه او حکومت اړ و، چې لاسنیوی یې وکړي. رسنیو په ځانګړي توګه مونږ هڅه وکړه، چې هلته لاړ شوو او له هغه ځایه خپلې د دوه څانګو خپرونې پر ژوندۍ بڼه وړاندې او د کډوالو وضعیت له چارواکو سره د خبرو او مرکو له لارې وړاندې کړو.

دغه راز د آریانا او آریانانیوز ټلویزیونونو یو شمېر کارکوونکيو ويلي، چې د رسنیو کار ته ژمن دي او غواړي پخپل زیار، کار او هڅو د خلکو ستونزې وځلوي او تر حکومته یې ورسوي.

د آریانانیوز خبریال اسلم حجاب وايي: دا جایزه د معیاري فعالیتونو له کبله ترلاسه شوه. آریانانیوز په هېواد کې د مهاجرینو د راستنېدو، طبیعي پېښو او نورو ستونزو د اواري په برخه کې خپل مسوولیت ادا کړی او دغه بهیر یې روان ساتلی دی. د آریانانیوز ټیم یو ژمن ټیم دی او غواړي د خپلو خلکو تر څنګ هڅې وکړي.

د آریانا خبریال حبیب ناظم هم ویلي: د خوښۍ ځای دی، چې آریانا او آریانا نیوز وکولی شول، چې دا ستره جایزه او لاسته راوړنه د څو نورو هېوادونو تر منځ خپله کړي.

د آسیا – اقیانوسیې اتحادیه ABU  په ۱۹۶۴ ز. کال کې جوړه شوې. دا ټولنه په ۵۲ هېوادونو کې ۱۷۰ غړي لري او د نړۍ لویه او د مسلکي رسنیو اتحادیه ګڼل کیږي. د دې اتحادیې د جوړولو موخې د پروګرامونو په تخنیکي، تعلیمي، سپورټي، حقوقي برخو کې همکاري، همغږي، ګډ فعالیتونه، مشوره او د بشري سرچینو په برخه کې د غړیو تر منځ د راډیو او ټلویزیوني سټیشنونو پیاوړتیا او پراختیا لپاره کار کول دي.

د دوشنبې پر ورځ ( د لړم اوومه ) د روسیې د مشرانو جرګې مشرې ولنتینا ماتوینکو پاکستان ته په خپل سفر کې ویلي، چې مسکو او اسلام‌آباد سیمه‌ییز ثبات ته ګډه ژمنتیا پالي.

د پاکستانيو رسنیو د راپورونو له مخې؛ ماتوینکو تېره ورځ د پاکستان په مشرانو جرګه کې د وینا پر مهال ویلي، چې مسکو او اسلام‌آباد باید د امنیتي مسایلو په اړه خپله همغږي خوندي کړي.

هغې ډاګیزه کړه: زه ډاډه یم، چې مونږ به د امنیتي مسایلو او نړیوال ثبات، په فضا کې د وسلو د ځای پر ځای کولو د مخنیوي، د بیولوژیکي، کیمیاوي او زهرجنو وسلو د بندیز، د غیرقانوني بندیزونو میکانیزمونو د نه‌منلو  او د بشردوستانه خبرو اترو نه سیاسي کولو په اړه خپله همغږي خوندي ساتو.

روسیې او پاکستان تل په افغانستان کې د ترهګرو ډلو د شتون په اړه اندېښنه ښودلې؛ خو اسلامي امارت دا اندېښنې رد کړي او څرګندوي، چې په افغانستان کې هېڅ ترهګره ډله شتون نلري او نه هم د افغانستان له خاورې کوم هېواد ته ګواښ پېښ شوی دی.