د لبنان روغتیايی چارواکو ویلي؛ په لبنان کې د حزب الله پر ضد د اسرائیلو د هوايي بریدونو له کبله تر دې دمه د ښځو او ماشومانو په ګډون لږ تر لږه ۴۹۲ کسان وژل شوي دي.

د لبنان روغتیا وزارت د څرګندونو له مخې؛ په وژل شویو کې ۳۵ ماشومان او ۵۸ښځې شته او له ۱۶۰۰ ،ېر کسان ټپیان شوي دي.

اسرائیل وايي؛ په لبنان کې یې د حزب الله ۱۳۰۰ موخې بمبارد کړي دي.

دغه راز  حزب الله د غچ اخیستنې په لړ کې د اسرائیلو پر جنوبي سیمو لسګونه توغندي توغولي دي.

د لبنان روغتیا وزیر ویلي، د هوايي بریدونو په پایله کې زرګونه کورنۍ کډه کولو ته اړې شوې دي.

د رپوټونو له مخې، په پلازمېنه بيروت کې د حزب الله پر يوه لوړ پوړي قومندان علي کراکي هم بريد شوی؛ خو ياد غورځنګ ويلي، نوموړی ژوندی دی او يوې خوندي سيمې ته تللی دی.

د امريکا او مصر په ګډون ګڼو هېوادونو د جګړې د پراخېدو د شونتيا په تړاو اندېښنه څرګنده کړې او پر دواړو غاړو يې ستونزې ته د يوه ډيپلوماټيک حل د موندلو غږ کړی دی.

د ۲۰۲۳ ز. کال د اوکټوبر پر اوومه د غزې د جګړې له پیل راپدېخوا دا لومړی ځل دی، چې د لبنان او اسرائیلو په سرحد کې کړکېچ دومره پراخېږي.

ویل کیږي، چې د حزب‌الله وسلوال د لبنان له جنوبي سیمو څخه د اسرائیلو پر خاوره توغندي توغولي دي.

د ملګرو ملتونو د نهه‌اویایمې سرمشریزې ته د اسلامي امارت له نه‌بلنې وروسته د بهرنیو چارو وزارت په دې غونډه کې د اسلامي امارت د استازي نه‌شتون د افغانستان د خلکو له مشروع حقونو څخه تېری او د دې ټولنې غفلت بولي.

د ملګرو ملتونو نهه‌اویایمه سرمشریزه، چې نن پیل شوه؛ پرته د اسلامي امارت له استازي د ۱۹۳ هېوادونو استازو په کې ګډون او وینا کوي.

په دې څو ورځنۍ غونډه کې د اسلامي امارت استازو ته بلنه ورکړشوې نده؛ د افغانستان بهرنیو چارو وزارت د اسلامي امارت د استازو نه‌بلل د خلکو له حقونو څخه سرغړونه بولي.

د بهرنيو چارو وزارت د وياند مرستيال ضيا احمد تکل ويلي، چې د افغانستان واقعيتونو ته پر کتو بايد د افغانستان په اړه مثبتې پرېکړې وشي.

په ملګرو ملتونو ټولنه کې د افغانستان د دایمي څوکۍ چارسمبالي ګډون کړی دی. که څه هم تراوسه معلومه نده، چې ده ته به د وینا اجازه ورکړ شي او کنه؟

د افغانستان اسلامي امارت سهیل شاهین په ملګرو ملتونو کې د افغانستان د دایمي استازي په توګه معرفي کړی؛ خو ملګرو ملتونو د افغانستان څوکۍ د اسلامي امارت استازي ته نده سپارلې، ځکه سهیل شاهین نشي کولی په ملګرو ملتونو کې خپله دنده پیل کړي.

د ملګرو ملتونو سرمشریزه به نهه ورځې روانه وي؛ په دې غونډه کې به ګډونوال  د غزې، اوکراین، لبنان او په ټوله کې د منځني ختیځ پر روانو حالاتو راوڅرخیږي او د افغانستان په اړه به هم د دې سرمشریزې په څنډه کې خبرې ترسره شي.

د ایران د ځمکنیو ځواکونو د قومندان مرستیال نوذر نعمتي ویلي، چې هېواد یې له افغانستان سره د خپلې پولې له لس کیلومټره ډېر دیوال جوړ کړی دی.

نن دوشنبه ( د تلې دوه‌یمه) صدا او سیما خبري سرچینې د نوذر نعمتي د څرګندونو له مخې خبر ورکړی، چې د ایران او افغانستان په پوله کې ۵۰ کیلومټر نور دیوال د جوړولو په حال کې دی.

دغه ایراني چارواکي ویلي، چې له افغانستان سره پر پوله  بېخبنایي هڅې او دیوال جوړول د ۲۰ کارځیو له لارې ترسره کیږي.

له دې مخکې ایراني چارواکو اعلان کړی و، چې له افغانستان سره به د دغه هېواد شاوخوا ۷۰۰ کیلومټره پوله وتړل شي.

ویل کیږي، چې دا کار د امنیتي ستونزو له کبله تر سره کیږي.