رویټرز د امنیتي سرچینو د څرګندونو له مخې ادعا کړې، چې روسیې په چین کې د څارګرو یا بې پیلوټه جنګي الوتکو د جوړولو هڅې پیل کړې دي.

رویټرز د یوې اروپایي څارګرې ادارې د دوه سرچینو د هغو اسنادو پر بنسټ ادعا کړې، چې روسیې په چین کې  د اوکراین د جګړې لپاره د لرې واټن ویشتونکیو بې پیلوټه الوتکو د تولید هڅې پیل کړې دي.

یو له دغو اسنادو څخه هغه راپور دی، چې کوپول نومي تسلیحاتي شرکت د روان کال په لومړیو کې د روسیې دفاع وزارت ته استولی، چې په کې د دغو الوتکو له جوړولو خبر ورکړ شوی دی.

کوپول د روسیې د دولتي وسلو شرکت الماز انټي یو له هغو فرعي شرکتونو څخه دی، چې د دې هېواد د څانګه‌والو پر مرسته یې په چین کې د ګارپیا- ۳ څارګرو الوتکو ته پراختیا ورکړې او ازمویلې یې دي.

دغه شرکت په خپل بل یو راپور کې د روسیې دفاع وزارت ته ویلي، چې دوی کولی شي د چین په کارخانې کې د ګارپیا-۳ په ګډون څارګرې الوتکې تولید کړي، چې له اوکراین سره په جګړه کې وکارول شي.

دغه وزارت ته د کوپول د راپورونو له مخې؛ د ګارپیا-۳ بېلګې، چې ۲۰۰۰ کیلومټر لار له ۵۰ کیلو ګرامې بار سره وهلی شي؛ روسیې ته سپارل شوي دي.

رویټرز دا هم په ډاګه کړې، چې دغو دواړو شریکانو او د روسیې دفاع وزارت د دغه راپور په اړه د نظر څرګندونه نده کړې.

چین رویټرز ته ویلي، چې د دغه راز کومې پروژې څخه خبر ندي او ټینګار یې کړی، چې چین په دې هېواد کې د جوړو شویو څارګرو الوتکو پر صادراتو بشپړ کنټرول لري.

د دې راپور د ادعا له‌مخې؛ کوپول شرکت د دوه ګارپیا - ۳ الوتکو په ګډون اووه چینایي پوځي څارګرې الوتکې د روسیې د ایژویسک ښار په خپل مرکز کې ورسپارلي دي.

دغه راز روسیه او اوکراین دواړه د څارګرو الوتکو د جوړولو لپاره سخته سیالي کوي، چې د یو بل بېخبناوو بریدونه وکړي.

ویل کیږي، چې د امریکا بهرنیو چارو وزارت او د اوکراین حکومت هم په دې اړه د رویټرز پرله‌پسې  غوښتنو ته ځواب ندی ورکړی.

رویټرز خبري سرچینې د دوه لوړ پوړیو ایراني امنیتي چارواکو د څرګندونو له مخې راپور ورکړی، چې تېره اوونۍ د لبنان د حزب الله د غړیو د زرګونه پیجرونو له چاودنې وروسته د ایران سپاه پاسداران خپلو ټولو غړیو ته د هر راز ارتباطي وسایلو له کارولو څخه د ډډې کولو سپارښتنه کړې ده.

یو له دغو امنیتي چارواکو څخه، چې نوم یې په ډاګه شوی دی، دې خبري سرچینې ته ویلي: د سپاه پاسداران لخوا نه یوازې د مخابراتي وسایلو، بلکې د ټولو وسایلو د ارزونې پراخه کتنه روانه ده.

هغه زیاته کړې: ډېر دا وسایل یا پر لاس جوړ شوي او یا له چین او روسیې څخه وارد شوي دي.

یاد چارواکي دا هم ویلي، چې ایران د اسرائیلو د نفوذ په اړه اندېښمن دی او د دې پوځي ادارې د منځنیو او لوړ پوړیو غړیو په اړه څېړنې پیل شوې دي.

دې امنیتي چارواکي زیاته کړې: په دې څېړنه کې له بهر هم د خلکو د بانکي حسابونو لټون او همدارنګه د هغوی او د هغوی د کورنیو د سفري تګ راتګ تر پلټنې لاندې دی.

د ایران بهرنیو چارو، دفاع او کورنیو چارو وزارتونو په دې اړه څه ندي ویلي.

تېره سې‌شنبه په یوه همغږي برید کې د لبنان د حزب الله د غړیو پیجري وسایل والوځول شول، چې بیا ترې یوه ورځ وروسته هم د حزب الله سلګونه پیجرونه والوځول شول.

په دغو بریدونو کې ۳۹ کسان ووژل شول او له ۳۰۰۰ ډېر نور ټپیان دي.

د لبنان حکومت او حزب الله ويلي، چې د دغو بریدونو تر شا د اسرائیلو لاس دی؛ خو اسرائیلو په دې برید کې خپل لاس لرل نه‌رد کړي او نه‌یې هم تائید کړي دي.

له رویټرز سره په خبرو کې د ایران یاد امنیتي چارواکي په دې اړه له جزئیاتو ورکولو ډډه کړې، چې بیا د سپاه پاسداران ځواکونه اړیکه څنګه نیسي.

سپاه پاسداران ۱۹۰ زره کارکوونکي لري.

هغه ویلي، اوسمهال مونږ د پیغام رسولو په سیسټمونو کې نړیوال کوډونه کاروو.

د همدې چارواکي د څرګندونو له مخې؛ د ایران د واکمنې دستګاه په منځ کې پراخې اندېښنې شته دي.

همداراز د دغه راپور له مخې؛ د سپاه پاسداران چارواکو د تخنیکي کتنو لپاره له حزب الله سره اړیکې نیولی او د چاودېدونکیو توکو څو بېلګې یې ایراني کارپوهانو ته د څېړنو لپاره استولي دي.

دغه راز هغه بل ایراني چارواکي ویلي، چې د ایران اصلي اندېښنه د ایران د اټومي او توغندیزو تاسیساتو په ځانګړي توګه د ځمکې لاندې تاسیساتو ساتنه ده.

له تېر کال راپدېخوا په دغو ځایونو کې امنیتي تدابیر د پام وړ ډېر شوي دي.

هغه ویل، چې د اوس په شان سخت امنیتی تدبیرونه هیڅکله نه‌ول او په لبنان کې د پیجرونو له چاودنو وروسته امنیتی تدبیرونه له پخوا ېر شوي دي.

د راپورونو له مخې؛ محمد عاصم ملک د پاکستان د استخباراتي ادارې ISI د نوي مشر په توګه ټاکل شوی دی.

د رویټرز د څرګندونو له مخې؛ دا کار په داسې حال کې کیږي، چې د دې دفتر سیاسي رول تر جدي څارنې لاندې دی. د آی ایس آی یو پخوانی مشر د پخواني لومړي وزیر عمران خان د سیاسي موخو د ملاتړ پر تور نیول شوی او زنداني دی. عمران خان ادعا کوي، چې دا اداره د هغې د اوسني مشر نويد انجم پر مشرۍ د ده پر ضد کارول کېږي.

څو لوړ پوړیو قاضیانو هم قاضي القضات ته په یوه لیک کې تور لګولی، چې د آی ایس آی کارمندانو د خان پر ضد په دوسیو کې پر دوی فشار راوړی ړی.

رویټرز راپور ورکړی، چې مالک دا مهال په اردو کې د قومندان په توګه دنده ترسره کوي او د امریکا د فورټ لیوینورت پوځي اډې څخه فارغ شوی دی.

نوموړی به د سپټمبر پر دېرشمه د آی ایس آی د مشر په توګه کار پیل کړي.

د آی ایس آی د مشر پوست په پاکستان کې یو له معتبرو پوستونو څخه دی، چې د کورني سیاست، پوځ او بهرنیو اړیکو په سر کې ځای لري.

د غه راز د آی ایس آی مشر په تخنیکي توګه لومړي وزیر ته راپور ورکوي، چې د لوی درستیز لخوا اداره کیږي.

په ۲۰۲۱ کال کې د آی ایس آی د مشر د ټاکلو پر سر د عمران خان او پوځ ترمنځ کړکېچ داسې انګیرل کیږي، چې له لوړ پوړو جنرالانو سره د شخړې لامل شوی او بیا څو میاشتې وروسته یې د لومړي وزیر په توګه له دندې ګوښه کړ.

د پاکستان پوځ، چې پر قاضیانو د فشار راوړلو یا په سیاست کې د هر ډول رول ردوي؛ له ۱۹۵۸ کال راپدېخوا یې درې لسیزې پر پاکستان او د حکومت پر مهمو برخو واکمني کوي.