د هېوادوالو د هوساینې لپاره نن( د مرغومي یوولسمه ) د کابل ولایت په شکردره ولسوالۍ کې د څښاک پاکو او د کرنې لپاره د اړتیا وړ اوبو د برابرولو لپاره د شاه او عروس د اوبو بند  ګټې اخیستنې ته وسپارل شو، چې د برښنا پر تولید سربېره به د فردي اقتصاد او په ټوله کې د هېواد له ملي اقتصاد سره د پام وړ مرسته وکړي.

له اقتصادي مرستیالۍ څخه په خپره شوې خبرپاڼه کې راغلي: ملا عبدالغني برادر په دې مراسمو کې د اوبو د ارزښت په اړه د خبرو پر مهال ویلي دي: نن ورځ په نړیوال سیاست او اړیکو کې پر اوبو د یو مهم اقتصادي عنصر په توګه بحث کېږي او په یوشمېر هېوادونو کې یې ارزښت له تېلو او ګران بیه کاني زېرمو هم لوړ دی.

نوموړي زیاته کړې؛ له بده مرغه پر افغانستان د تپل شویو جګړو او یوشمېر کورنیو او بهرنیو عواملو له کبله په هېواد کې د دغه مهم اقتصادي عنصر د مدیریت لپاره اساسي پانګونه نده شوې او له همدې کبله د موسمي بارانونو او اقلیمي بدلونونو له وجې د زیاتو سېلابونو راوتلو پر مهال یوشمېر هېوادوالو ته د سر او مال زیان رسېږي.

د اوبو او انرژۍ وزارت چارسمبالي عبداللطیف منصور ویلي، چې د شاه او عروس بند د څه باندې ۵۳ میلیون امریکايي ډالرو پر ارزښت د دغه وزارت لخوا د اوبو د مدیریت او ښاریانو ته د څښاک د پاکو اوبو د برابرولو لپاره جوړ شوی دی.

ویل کیږي، چې شاه او عروس بند  ۷۸مټره لوړوالي لري؛ د ۹.۴میلیون مټرمکعب اوبو د زیرمه کولو وړتیا لري او شاوخوا ۳۵۰۰ هکټاره ځمکه به خړوبه او  ۱.۲میګاواټه برښنا تولید کړي.

د کورنیو چارو وزارت چارسمبالي سراج الدین حقاني په کابل کې د چین له سفیر ژاو شینګ سره وکتل او د واخان دهلیز د سټراټیژیک اهمیت، د دواړو هېوادونو ترمنځ د سوداګریزو اړیکو پر پراختیا او د مسافرینو د الوتنو د زیاتوالي په اړه خبرې وکړې.

د کورنیو چارو وزارت ويلي، چې په دې کتنه کې د دوه اړخیزو همکاریو پر پیاوړتیا او دغو موخو ته د رسېدو لپاره د عملي ګامونو اخیستلو ټینګار وشو.

شاوخوا دوه میاشتې مخکې د افغانستان په چارو کې د چین ځانګړي استازي هم کابل ته سفر کړی و او د اسلامي امارت له لوړ پوړیو چارواکو سره یې لیدلي او د کابل او بیجینګ ترمنځ د اړیکو پر پراختیا یې خبرې کړې وې.

د نړیوالو اړیکو کارپوهانو ويلي، چې د سیمې او نړۍ له هېوادونو سره د افغانستان اړیکې باید د ملي ګټو پر بنسټ او د بشري حقونو د ازادۍ او اعلامیې په رڼا کې وي.

چین د یوه نړیوال ځواک په توګه د جمهوري نظام له ړنګیدو وروسته په کابل کې خپل سفارت فعال ساتلی او له چارسمبالي حکومت سره یې اړیکو ته دوام ورکړی. که څه هم چین تر اوسه اسلامي امارت په رسمیت ندی پېژندلی؛ خو لومړنی هېواد دی، چې په بیجینګ کې یې د اسلامي امارت رسمي سفیر ومانه. د یادونې ده، چې په تېرو درې کلونو کې یې د افغانستان له چارسمبالي حکومت سره سیاسي او اقتصادي اړیکې ټینګې ساتلې دي.

د افغانستان لپاره د پاکستان ځانګړي استازي محمد صادق څرګنده کړې، چې کابل ته یې د خپل سفر جزئیات د پاکستان لومړي وزیر شهباز شریف ته وړاندې کړي دي.

محمد صادق د دوشنبې پر ورځ (د مرغومي لسمه) په ایکس پاڼه کې لیکلي، چې کابل ته یې د خپل سفر جزئیات شهباز شریف ته وړاندې کړل. که څه هم د دې لیدنې جزئیات ندي خپاره شوي؛ خو پاکستانۍ ورځپاڼې "ایکسپرس ټریبیون" راپور ورکړی، چې دا سفر د اسلامي امارت او د پاکستان د حکومت تر منځ د ترینګلو اړیکو د ښه کولو او د اسلام‌آباد د اندېښنو د حل یوه هڅه وه.

دې ورځپاڼې زیاته کړې؛ اسلام‌آباد د تېر کال په اوږدو کې د تحریک طالبان پاکستان پر ضد د اسلامي امارت د نه اقدام له کبله خپلې اړیکې ورسره  پرې کړې وې.

ایکسپرس ټریبیون راپور ورکړی؛ محمد صادق هڅه کړې، چې د ډیپلوماټیک حل لپاره فرصتونه رامنځته کړي او د تحریک طالبان پاکستان په اړه د اسلامي امارت دریځ بدل کړي.

دا کابل ته د محمد صادق د بیا ټاکلو وروسته د هغه لومړنی سفر و.

محمد صادق تیره اوونۍ کابل ته سفر کړی و او د اسلامي امارت له چارواکو سره یې لیده کاته درلودل.

په کابل کې د محمد صادق له شتون سره هم مهاله د پکتیکا ولایت په برمل ولسوالۍ د پاکستان هوايي ځواکونو برید وکړ او د طالبانو د راپور له مخې لږ تر لږه ۴۶ کسان یې ووژل.

د پاکستان دا هوايي بریدونه د اسلامي امارت له توند غبرګون او غچ اخیستنې سره مخ شول.

د اسلامي امارت د دفاع وزارت اعلان کړی و، چې د ډیورنډ کرښې له هغې غاړې یې د «شریرو عناصرو او د هغوی د ملاتړو پر مرکزونو او پټنځایونو» یې بریدونه کړي دي.

دا سفر په داسې حال کې ترسره شوی، چې د افغانستان او پاکستان اړیکې اوس هم ترینګلې دي.