تازه خبرونه
په کابل کې د اسلامي امارت ځواکونو د داعش پر پټنځي برید کړی
(Last Updated On: )
د افغانستان اسلامي امارت ويلي، په کابل کې د داعش پر یوه پټنځي د برید پرمهال یو داعشي وژل شوی دی.
د اسلامي امارت د ویاند مرستیال انعام الله سمنګاني په خپل ټوېټ کې څرګنده کړې، چې دغه عملیات تېره شپه (چارشنبه د لړم ۲۶ ) د کابل د خیرخانې په اړوند سیمه کې د اسلامي امارت ځواکونو ترسره کړي دي.
د نوموړي د څرګندونو له مخې؛ په دغه بريد کې د داعش ډلې د غړيتوب پر تور څو نور کسان هم نيول شوي دي.
سمنګاني ټینګار کړی، چې دغه کسان اوسمهال د اسلامي امارت په بند کې تر پوښتنو لاندې دي.
هغه زياته کړې، چې د خيرخانې په اړوند سيمه کې د داعش دغه پټنځى هم له منځه وړل شوى دى.
دا په داسې حال کې ده، چې د رویټرز د څرګندونو له مخې؛ د داعش خراسانۍ ډلې په کابل کې د پرونیو دوه بېلابېلو چاودنو د ترسره کولو مسوولیت منلی دی.
