تازه خبرونه
په کابل کې درې ماین چاودنو اووه کسانو ته مرګ و ژوبله اړولې
(Last Updated On: )
د کابل ښار په درې بېلابېلو برخو کې درې چاودنو دوه ملکي وګړي وژلي او پېنځه نور ټپیان کړي دي.
لومړۍ چاودنه نن (سې شنبه د سلواغې ۱۴) سهار د کابل ښار د دوه یمې ناحیې په جوی شیر سیمه کې رامنځته شوې ده.
د پېښې لیدونکي وايي، چاودنه د نښلیدونکي ماین وه.
امنیتي سرچینې چاودنه تائیدوي او وایي، چې په پېښه کې د امنیتي ځواکونو دوه غړي ټپیان دي.
دوه یمه چاودنه شاوخوا اته بجې د کابل ښار د څلورمې ناحیې اړوند د سلیم کاروان په سیمه کې رامنځته شوې ده.
د کابل پولیسو ویاند فردوس فرامرز ویلي، چې په پېښه کې دوه ملکي وګړي وژل شوي او دوه نور ټپیان شوي دي.
درېیمه چاودنه د دهمزنګ په نوآباد سیمه کې پر کرولا موټر شوې، د لیدونکیو د څرګندونو له مخې ترې یو کس ټپي شوی دی.
امنیتي ادارو تر دې دمه پدې اړه څه ندي ویلي.
د درې واړو پېښو مسوولیت چا ندی منلی.
