روغتيا
په هېواد کې د درملیزو او روغتيايي خدمتونو د خونې پر رامنځته کولو ټینګار څرګند شو
د صنايعو او سوداګرۍ وزارت د څرګندونو له مخې؛ په دې کتنه کې د روغتيايي او درملیزو خدمتونو د سکتور استازیو په دې اړه پراته خنډونه، ننګونې او ستونزې رایادې کړې او د دغې خونې د جوړېدو په اړه يې خپله خوښه په ډاګه کړه.
د صنایعو او سوداګرې وزارت چارسمبالي نورالدين عزيزي هم د يادې خونې له جوړېدو خپل بشپړ ملاتړ اعلان کړ.
هغه د خلکو او په ځانګړي توګه د ناروغانو ستونزو ته په نغوته کې وویل؛ په دې څانګه کې به د پخوا په پرتله ډېرې آسانتیاوې برابرې او په هېواد کې دننه به د ناروغانو درملنې ته زمینه هم برابره شي.
دغه راز د افغانستان د سوداګرۍ خونې د فدراسیون مرستیال خانجان الکوزي په یوه پیغام کې د روغتیا او درملو د خدمتونو د وړاندې کولو د خونې جوړېدل یو ښه ګام بولي او ترې د پوره ملاتړ ډاډ حرګندوي.
په دې غونډه کې پرېکړه وشوه، چې د درملیزو او روغتیایي خدمتونو د خونې د استازیو په شتون کې دې د اړوندو څانګو ترمنځ د همغږۍ غونډه جوړه شي.
