تازه خبرونه
په هرات او کندهار ولایتونو کې طالبانو ته درانده ځاني زیانونه اوښتي
د ځایي سرچینو د څرګندونو له مخې؛ هرات ولایت په ادرسکن ولسوالۍ کې د طالبانو یوه غونډه بمبارد شوی، چې په کې ۴۰ وسلوال طالبان وژل شوي او ۳۰ نور ټپیان دي.
د هرات والي ویاند ویلي، چې د یادې ولسوالۍ په خم زیارت سیمه کې پر طالبانو هوایي برید ترسره شوی، چې د لومړنیو څرګندونو له مخې؛ عبدالله اکبري، مولوي حیدر، ملا رحمت الله، ملا ذبیح الله اکبري، ملا محمد( ملا ادریس) او ملا عبدالحق ( ملا اسامه) چې په ګذره، ادرسکن او پښتون زرغون ولسوالیو کې د طالبانو تکړه قومندانان ول؛ له یو شمېر نورو طالبانو سره وژل شوي دي.
د هرات ولایت په ادرسکن ولسوالۍ کې ځایي خلکو ویلي، د یوه طالب قومندان د خلاصون په ویاړ پر راټولو شویو خلکو بمبارد شوی، چې په کې عامو خلکو ته مرګ و ژوبله اوښتې ده.
طالبانو منلې، چې د یو راخلاص شوي بندي کور دوه ځله بمبارد شوی؛ کله، چې عام خلک د مړیو او ټپیانو د لیږد لپاره سیمې ته راغلل دوه یم برید تر سره شو. د دوی د څرګندونو له مخې په دې بریدونو کې د ښځو او ماشومانو په ګډون ۸ کسان وژل شوی او ۱۲ نور ټپیان دي.
دغه راز د کندهار ولایت سیمه ییزو چارواکو ویلي، چې د کندهار ولایت په خاکریز ولسوالۍ کې د امریکایي ځواکونو پر هوایي برید ۳۶ طالب جنګیالي وژل شوي دي.
همدارنګه د بغلان ولایت د دند غوري په اړوند سیمه کې پر یوه کور د افغان ځواکونو پر هوایي برید یو ماشوم او یوه ښځه وژل شوي او ۸ نور ټپیان دي.
سربېره پر دې؛ وسلوالو طالبانو تېره شپه د کابل سروبي ولسوالۍ د ماهیپر په اړوند سیمه کې له درې خواوو د کابل ـ جلال آباد د لویې لارې پر امنیتي پوستو بریدونه کړي.
د سرچینو د څرګندونو له مخې؛ د طالبانو سرې قطعې، چې له کوه ساپي ولسوالۍ ورغلي وه؛ لومړی یې لویه لار وتړله او بیا یې نښته پیل کړه، چې ۱۳ ګړۍ روانه وه.
په دې نښته کې درې وسلوال طالبان وژل شوي، درې طالب وسلوال او د لویې لارې ۴ ساتونکي ټپیان شوي دي.
د پکتیا پولیسو ویلي، چې په تېرو ۱۵ ورځو کې ۶۵ وسلوال طالبان له امنیتي ځواکونو سره په نښته کې وژل شوي دي.
طالبانو تر دې دمه د دغې پېښې په اړه څه ندي ویلي.
