د عامې روغتیا وزارت چارسمبالی(سرپرست) وايي، چې ګاونډ هېوادونه د افغانستان پرمختګ زغملی نشي؛ نو دوی کډوال ځوروي، ملکیتونه یې مصادره کوي او هغو یې جبري ایستلي دي.

د عامې روغتیا وزارت چارسمبالی(سرپرست) نور جلال جلالي په کابل کې د یوې غونډې پر مهال ویلي: “یو چا په خپل توان سره کور او ژوند جوړ کړی؛ خو ورته ویل کیږي، چې حق نلري دا له ځانه سره یوسې. له یوې جوړې  جامو سره په سپکاوي او بې عزتۍ وهل کېږي او موټر کې اچول کېږي او ورته ویل کېږي، چې ولاړ شه. زمونږ وروڼه باید خپل هېواد ته ان که  لږې پیسې هم ولري راستانه دې شي.”

د پاکستان حکومت په ټول هېواد کې د بې اسنادو افغانانو د نیولو او شړلو لپاره پراخ عملیات پیل کړي دي.

د ننګرهار ولایت سیمه‌ییزو چارواکو اعلان کړی، چې له پاکستان څخه د افغان کډوالو د ایستلو د دوه‌یم پړاو له پیل سره په تېرو درې ورځو کې ۳۱۶ کورنۍ د تورخم بندر له لارې هېواد ته رادننه شوې دي.

د ننګرهار والي مرستیال عزیزالله مصطفی ويلي: “ټولې کمیټې چمتو دي. په تېرو دوه یا درې ورځو کې، ۳۱۶ کورنۍ جبري ایستل شوې دي. د خدماتو کمیټه شته. مونږ هم له مرکز سره اړیکه نیولې ده. ان شاالله امکانات لرو. مونږ به له ادارو سره هم وګورو او دا بهیر به پر همغږۍ ترسره کړو.”

د بشري حقونو ټولنو له پاکستان څخه د افغان کډوالو پر ایستلو نیوکه کړې ده.

د یادونې ده، چې په تېرو ۱۸ میاشتو کې شاوخوا ۸۴۵ زره افغانان له پاکستان څخه راوتلي دي.

د بلخ ولایت د اطلاعاتو او کلتور ریاست ويلي، چې د اختر په درې ورځو کې له ۱۲ زره څخه زیاتو کورنیو او ۲۱ بهرنیو سیلانیانو د دې ولایت له تفریحي او تاریخي ځایونو څخه لیدنه کړې ده.

یو شمېر هغو هېوادوالو، چې د دې ولایت له تفریحي سیمو څخه لیدنه کړې؛ له رامنځته شوي امنیت څخه رضایت څرګند کړی او په دې سیمو کې د نورو تفریحي اسانتیاوو د رامنځته کولو غوښتنه کوي.

پسته مزار سیمه، چې د بلخ ولایت په مارمل ولسوالۍ کې موقعیت لري او له مزار شریف ښار څخه ۲۰ کیلومټره لرې ده، یو له هغو سیمو څخه ده، چې په دې ورځو کې د هېواد له بېلابېلو برخو څخه د زرګونو کورنیو سیلانیانو کوربتوب کوي.

د بلخ د اطلاعاتو او کلتور ریاست د څرګندونو له مخې؛ د اختر په درې ورځو کې له ۱۲۰۰۰ څخه زیاتو کورنیو او ۲۱ بهرنیو سیلانیانو دې ولایت ته سفر کړی دی.

یو شمېر سیلانیان له رامنځته شوي امنیت څخه رضایت څرګندوي او د تفریحي اسانتیاوو په ګډون د رسټورانټونو، جوماتونو، بازارونو او په سیاحتي ځایونو کې د څښاک اوبو د چمتو کولو غوښتنه کوي.

خو د بلخ سیمه‌ییز چارواکي د دې ولایت په تفریحي سیمو کې د اسانتیاوو د رامنځته کولو لپاره له هڅو خبره کوي.

پر پسته مزار سربېره د قوش‌ټېپي کانال، د دشت شادیان، د آمو سیند او د خواجه سکندر چینه په بلخ ولایت کې نورې تفریحي سیمې دي، چې د کورنیو او بهرنیو سیلانیانو د شتون شاهدې دي.

د کاپیسا د باغدرې برښنا بند د جوړولو چارې تېره ورځ د چینایي ام سي سي شرکت د قرارداد پر بنسټ د کابو ۵۶۲ میلیون ډالرو پر ارزښت پیل شوې.

د باختر خبري سرچینې د راپور له مخې؛ دا بند د ۲۴۰ مېګاواټه برښنا د تولید وړتیا لري او د کاپیسا په ګډون د ۵ ولایتونو خلک به يې له برښنا برخمن شي.

د ام سي سي جي سي ال کمپنۍ د اوبو او انرژۍ له وزارت سره د ۱۴۰۳ لمریز لېږدیز کال د لیندۍ د یوولسمې د تړون له مخې ټاکل شوې، چې په راتلونکو شپږ میاشتو کې به د باغدرې برښنا بند د جیوفزیک او جیو تخنیک لابراتواري څېړنې ترسره شي.

د روانې میاشتې پر نهمه د ریاست الوزراء اقتصادي مرستیال ملا عبدالغني برادر پر مشرۍ اقتصادي کمیسیون پرېکړه وکړه،‌ چې ډېر ژر به د افغانستان په بېلابېلو ولایتونو کې د برښنا بندونو د جوړلو مطالعاتي پروژې پیل شي.

د اقتصادي کمیسیون د پرېکړې له مخې په روان ۱۴۰۴ مالي کال کې به دغه مطالعاتي پروژې د دغو بندونو سروې او د امکان سنجۍ چارې ترسره کړي.

دغه بند د کاپیسا ولایت په مرکز کې موقعیت لري.

ویل کیږي، چې د دې بند چارې به په ۳ پړاوونو کې اته کاله وخت ونیسي.