تازه خبرونه
په ننګرهار کې د افغان او پاکستانیو ځواکونو نښتې مرګ و ژوبله رامنځته کړې
(Last Updated On: )
نن ماښام د ننګرهار ولایت د مومند درې ولسوالۍ په غوړکي سیمه کې د افغان او پاکستانیو سرحدي ځواکونو ترمنځ نښته رامنځته شوه.
د ننګرهار والي ویاند عطاء الله خوږیاڼي ویلي: نښته هغه وخت رامنځته شوه، چې پاکستانيو سرتېرو غوښتل په سیمه کې نظامي تاسیسات جوړ او اغزن تار وغزوي؛ خو د افغان ځواکونو لخوا یې مخه ونیول شوه.
خوږیاڼي زیاته کړې، چې په دې پېښه کې یو سرحدي پولیس وژل شوی او درې نور ټپیان دي.
د والي ویاند دا هم ویلي، چې د نښتو پرمهال ځايي خلکو هم سیمه پریښوه او وتښتیدل.
دغه راز ویل شوي، چې لومړى ګوزار پاکستاني لوري کړى دی.
هغه وايي، نښته اوس دریدلې؛ سيمې ته د څار او څېړنې ډله استول شوې ده.
د نوموړي د څرګندونو له مخې؛ پاکستانيو ځواکونو ته هم زیان رسیدلی؛ خو شمېر یې معلوم ندی.
پاکستان تر دې دمه په دې اړه څه نه دي ویلي.
