د افغانستان په چارو کې د روسیې د ولسمشر ځانګړي استازي ضمیر کابلوف په کابل کې د بهرنیو چارو له چارسمبالي وزیر سره په لیدنه کې ویلي، چې په نږدې راتلونکي کې د روسیې یو لوړ پوړی پلاوی کابل ته راځي او د دغه هېواد له چارواکو سره د همکارۍ پر پراختیا خبرې کوي.

د بهرنیو چارو وزارت د خبرپاڼې له مخې؛ په دې کتنه کې د افغانستان او روسیې ترمنځ د دوه اړخیزو اړیکو په ځانګړي توګه پر اقتصادي همکاریو، پانګونې او ټرانزیټ خبرې وشوې.

د بهرنيو چارو وزارت چارسمبالي د اسلامي امارت او روسيې ترمنځ اړيکې مهمې یادې کړې او ټينګار يې وکړ، چې د دواړو هېوادونو ترمنځ باید د اقتصادي او سوداګريزو همکاريو په ګډون اړيکې پراخه شي.

امیرخان متقي د افغانستان او روسیې تر منځ د لوړ پوړیو پلاویو تبادله مهمه وبلله او زیاتوي، چې په تېر کال کې د اسلامي امارت ګڼ چارواکي د ناستو لپاره روسیې ته بلل شوي دي.

دغه راز د روسيې ځانګړي استازي ويلي، چې هېواد يې غواړي له افغانستان سره په اقتصادي او سوداګريزو برخو کې خپلې اړيکې پراخې کړي.

ضمیر کابلوف زیاته کړې؛ په نږدې راتلونکي کې د روسیې یو لوړ پوړی پلاوی کابل ته راځي او د اسلامي امارت له چارواکو سره به د همکاریو پر پراختیا خبرې وکړي.

مهر خبری سرچینې څرګنده کړې، چې د ایران بهرنیو چارو وزارت پخوانی قونسلي مرستیال علی رضا بیګدلی په کابل کې د دغه هېواد د سفیر په توګه معرفی شوی دی.

دغې رسنۍ زیاته کړې، چې په افغانستان کې د ایران د ولسمشر د ځانګړي استازي دنده حذف شوې او نوموړی به د افغانستان په چارو کې د پخواني ځانګړي استازي په څېر د بهرنیو چارو د وزیر تر څارنې لاندې فعالیت کوي.

د یادونې ده، چې کاظمي قُمي له دې مخکې د سفیر او په افغانستان کې د دغه هېواد د ولسمشر د ځانګړي استازي په توګه کار کاوه.

د روسیې بهرنیو چارو وزارت مرستیال اندري رودینکو ويلي؛ هېواد یې د ترهګرو ډلو له نوملړ څخه د اسلامي امارت د ویستلو بهیر د ګډوډولو اراده نلري او نه به یې بند کړي.

دغه راز د روسیې بهرنیو چارو وزارت مرستیال ویلي، چې اوس هم وختي دی او دا بهیر به تدریجي او ګام پر ګام ترسره شي.

هغه له تاس خبري سرچینې سره په مرکه کې زیاته کړې: د ترهګرۍ له نوملړه د طالبانو (اسلامي امارت) د ویستلو لپاره قانوني پړاوونه باید بشپړ شي او له افغانستان سره په بېلابېلو برخو په تېره بیا په اقتصادي برخه کې د روسیې د تعامل لپاره مثبته هڅونه رامنځته شي.

دغه روسي ډيپلوماټ د اسلامي امارت د پېژندلو په اړه هم ويلي، چې په دې اړه خبرو کولو لپاره وخت شته دی.

هغه زیاته کړې: روسیه له اوسنیو افغان چارواکو سره د متقابلو ګټو پر بنسټ د عملي تعامل لپاره ګامونه پورته کوي.

روسیه په سیمه کې یو هغه هېواد دی، چې په افغانستان کې د اسلامي امارت له بیا جوړېدو وروسته یې اړیکې نږدې پاتې شوي؛ خو تر اوسه یې اسلامي امارت پر رسمیت ندی پېژندلی.