سوداگري
په بلخ کې ۹۰ سلنه تولیدي فابریکې له بحران سره مخ دي
د بلخ د صنعت او کانونو خونې مسوولینو ویلي، چې نږدې نوي سلنه تولیدي کارخانې د اقتصادي ستونزو پر دلیل د تړل کېدو له ګواښ سره مخ شوي دي.
په بلخ ولایت کې د خوراکي توکو د پروسس مسوولین، چې د اسلامي امارت له واکمنېدو وروسته یې خپل فعالیت له سره پیل کړی؛ وایي: له دې مخکې یې ډېر تولیدات بهرنیو هېوادونو ته صادرېدل؛ خو اوس د بازار او تقاضا نشتون او اقتصادي ستونزو له کبله یې اتیا سلنه فعالیت له رکود سره مخ شوی.
د ممیزو د پروسس فابریکې مسوول سید حمید الله ټینګار کوي، چې که اسلامي امارت د کورنیو تولیداتو ملاتړ وکړي، افغانستان کولی شي کورنۍ اړتیاوې ځواب او ان بهر ته هم صادرات ولري.
په دې تولیدي فابریکو کې په کار بوخته کارګره زیبا له اسلامي امارته غواړي، چې ښځو ته د کار زمینه برابره کړي.
په بلخ کې د صنایعو او کانونو خونې د مدیره پلاوي غړی سید اسماعیل حسیني وایي؛ د صنعتي کارخانو د فعالیتونو د کمي مهم دلیل د حکومت نه ملاتړ او په بانکونو کې د پانګوالو د پیسو بندېدل دي.
له دې مخکې د کورنیو تولیداتو ستره برخه؛ ممیز، بادام او ځینې نور خوراکي توکي له پروسس وروسته د ازبکستان او ترکمنستان هېوادونو له لارې آسیایي هېوادونو ته صادرېدل.
