Connect with us

تازه خبرونه

په بغلان او کابل کې ماین چاودنو ۱۷ کسانو ته مرګ و ژوبله اړولې

خپور شوی

د

(Last Updated On: زمری ۲۹, ۱۳۹۹)

د بغلان امنیتي سرچینو ویلي، چې د دې ولایت په مرکز پلخمري ښار کې ماین چاودنې دوه پوځیان وژلي او ۱۱ نور ټپیان دي.

د بغلان پولیسو ويلي؛ د سړک غاړې په دې ماین چاودنه کې، چې د بغلان ولایت د مقام پر سړک رامنځته شوې څلور ملکي وګړي هم  ټپیان شوي دي.

سیمه ییزو سرچینو ویلي، چې په دې چاودنه کې د بغلان د ملي امنیت سرتېرو ته مرګ و ژوبله اوښتې ده.

د بغلان د عامې روغتیا مشر داکتر محب الله حبیب آریانا نیوز ته ویلي؛ په چاودنه کې دوه کسان وژل شوي او ۱۱ نور ټپیان دي، چې د پلخمري ولایتي روغتون ته لیږدول شوي دي.

د نوموړي د څرګندونو له مخې؛ په دې پېښه کې د ټپیانو تر منځ یوه ښځه او یو ملکي سړی شته دی.

دغه راز کابل ښار هم نن سهار د دوه نښلیدونکیو ماین چاودنو شاهد و.               

د کورنیو چارو وزارت ويلي، چې نن سهار شاوخوا ۶:۴۵ لومړی د دولسمې حوزې د ارزان قیمت په اړوند سیمه کې پر رینجر موتر او بیا د سهار په ۸:۰۷ د پوهنې وزارت پر اړوند کرولا موتر د پېنځمې حوزې د کمپنۍ په اړوند سیمه کې د نښلیدونکیو ماینونو چاودنې رامنځته شوې دي.

وزارت منلې، چې په دې پېښو کې دوه کسان وژل شوي او دوه نور ټپیان دي.

د پوهنې وزارت هم منلې، چې د دې پېښې له قربانيانو څخه یو هم د دغه وزارت یو لوړ پوړی چارواکی دی.

د دې وزارت د څرګندونو له مخې، د دې وزارت د علمي شورا مشر داکترعبدالباقي آمین او د ښوونې او روزنې په برخه کې د هېواد یو ترټولو اغېزمنه څیره وه؛ نن په کابل ښار کې له ماین چاودنې خپل خوږ ژوند له لاسه ورکړ.

دغه راز پرون هم په ورته وخت کې د هېواد د خپلواکۍ د بیرته تر لاسه کولو د ۱۰۱ کلیزې د نمانځلو پر مهال هم د کابل ښار پر بېلابېلو سیمو ۱۴ توغندي وتوغول شول.

د کورنیو چارو وزارت ويلي، چې په پېښه کې د یوه ملکي وګړي په ګډون لږ تر لږه درې کسان وژل شوي او د شپږ عامو وګړیو په ګډون ۱۶ نور ټپیان دي.

تر اوسه هیچا د دغو بریدونو مسوولیت ندی منلی.

تازه خبرونه

د داعش خراسانی مشر د پاکستان په بلوچستان کې دی – رویټرز

Published

on

(Last Updated On: وری ۹, ۱۴۰۳)

رویټرز خبري اژانس راپور ورکړی، چې د داعش د خراسان څانګې مشر د پاکستان په بلوچستان ایالت کې ژوند کوي.

د دغه خبري آژانس د راپور له مخې: ۲۹ کلن ثناالله غفاري، چې شهاب المهاجر هم یاد شوی؛ دا ډله یې د داعش پر تر ټولو وېرونکې څانګې بدله کړې ده.

رویټرز دا هم څرګنده کړې، چې ثناالله غفاري په ۲۰۲۰ ز. کال کې د داعش خراسان څانګې مشري پر غاړه واخیسته او د ده د مشرۍ پر مهال دغې ډلې سخت بریدونه وکړل او یو شمېر کسان یې ځان ته جلب هم کړل.

رویټرز زیاته کړې، چې د غفاري په اړه د ۲۰۲۱ کال د کابل پر هوايي ډګر د داعش له وژونکي برید مخکې، چې ۱۷۰ افغان ملکي وګړي او ۱۳ امریکايي پوځیان ووژل شول؛ ډېر لږ معلومات خپاره شوي وه.

د داعش د خراسان څانګې بحث وروسته له هغې ګرم شو، چې د تېرې جمعې ورځ مسکو ته نږدې د کنسرت په یوه تالار کې خونړۍ ډزې وشوې او لږ تر لږه ۱۳۹ کسان په کې ووژل شول.

له دې مخکې پاکستانيو چارواکو اعلان کړی و، چې غفاري د تېر کال په جون میاشت کې د افغانستان په کونړ ولایت کې وژل شوی؛ خو اوس رویټرز خبر ورکوي، چې نوموړی پاکستان ته تښتېدلی او د بلوچستان په ایالت کې اوسېږي.

د افغانستان کورنیو چارو وزارت ویاند عبدالمتین قانع وايي، داعش له څه باندې دوه کلونو راپدیخوا په افغانستان کې ځپل شوی او خپلې عملیاتي وړتیاوې یې له لاسه ورکړي او ګواښ پېښولی نشي.

ویل کیږي، چې داعش په افغانستان کې وروستی برید د کندهار ولایت د کابل بانک پر دفتر وکړ، چې ۳ کسان یې ووژل او ۱۲ نور ټپیان دي.

Continue Reading

تازه خبرونه

د رښتر پر کچه ۵ اعشاریه ۲ درجې زلزلې افغانستان ولړزاوه

Published

on

(Last Updated On: وری ۹, ۱۴۰۳)

د هند د زلزلې ملي مرکز څرګنده کړې، چې نن (پنجشنبه د وري نهمه) له غرمې وروسته د رښتر پر کچه ۵.۲ درجې زلزلې افغانستان ولړزاوه.

دا زلزله د ځمکې په ۷۰ کیلومټره ژوروالي کې رامنځته شوې او مرکز یې د بدخشان ولایت د اشکاشم ولسوالۍ شمال ختیځه غرنۍ سیمه ده.

دغه زلزله پر افغانستان سربېره په تاجکستان، ازبکستان او قرغزستان کې هم احساس شوې ده.

تر اوسه د دې پېښې د ځاني او مالي زیان په اړه څه ندي ویل شوي.

تېر اکټوبر په هرات ولايت کې د رښتر پر کچه شپږ اعشاريه څلور درجې زلزلې له دوه زره زيات کسان مړه او ډېر کلي ویجاړ کړل.

Continue Reading

تازه خبرونه

د بیات بنیاد د روژې مرسته د بلخ ولایت اړمنو ته ورسېده

Published

on

(Last Updated On: وری ۹, ۱۴۰۳)

بیات بنیاد د روژې د مرستو په لړ کې د بلخ ولایت لسګونه اړمنو کورنیو ته خوراکي توکي ووېشل.

د بیات بنیاد د روژې د مرستو په لړ کې دا ځل د بلخ ولایت لسګونه اړمنې کورنۍ تر پوښښ لاندې راغلې. په بلخ ولایت کې د بیات بنیاد استازی یافث ثاقب وایي؛ په دې مرسته کې اوړه، غوړي او وريجې شته، چې پر اړمنو کسانو وېشل شوې دي.

نوموړي زیاته کړې؛ د هېواد په بېلابېلو سیمو کې د بیات بنیاد د روژې د مرستو لړۍ روانه ده.

هغو کورنیو، چې دغه مرستې ترلاسه کړې د دې بنسټ له مرستو خوښ دي او له نورو مرستندویه بنسټونو هم غواړي، چې له اړو کسانو سره مرستې وکړي.

بیات بنیاد یو له هغو خیریه بنسټونو څخه دی، چې په تېرو ۲۰ کلونو کې یې پر اړمنو کورنیو د مرستو د وېش ترڅنګ یې د هېواد په بېلابېلو برخو کې رغنیزې پروژې هم پلې کړې دي.

Continue Reading

Trending

Copyright © 2022 Ariana News. All rights reserved!