نړۍ
په امریکا کې یوه ښځه یو ناڅاپه میلیونره شوه
د امریکا د کالیفورنیا اوسیدونکې لاکوډرا اډوارډز په یوه شپه کې يو ناڅاپه ملیونره شوه.
نوموړې د ټارزانا په لوی پلورنځي کې د پلور یوه برښنایي ماشین ته ۴۰ ډالر ورغورځولي وه او غوښتل یې، چې خپله ټاکلې لوبه غوره او پیل کړي؛ خو ورسره د یوه لاروي پر لګېدو یې ناڅاپه د ۳۰ ډالرو تڼۍ غوره او کېکاږله.
د ګارډین د څرګندونو له مخې: هغې، چې تل یې ارزانه ټکټونه پېرودل؛ خو کله یې، چې خپل نوی ټکټ ګراوه، وپوهېده، چې ژوند یې بدل شوی او د ۱۰ میلیون ډالرو د لاټرۍ ګټونکې شوې ده.
لاکوډرا اډوارډز وایي: هغه سړی راسره ولګېده او څه یې ونه ویل. کله، چې زه بېرته خپل موټر ته راغلم، وپوهېدم، چې څه پیښ شوي. باور مې نه شو کولی، نږدې و ټکر وکړم. ما څو ځلې په ماشین کې خپل ټکټ سکین هم کړ.
هغې زیاته کړې: زه اوس هم حیرانه یم. یوازنی شی، چې یادیږی مې دا دی؛ کله، چې وپوهېدم ګټونکې یم ومې ویل: زه بډایه یم.
ویل کیږي، چې نوموړې اوس غواړي یو کور واخلي او د یوه خیریه بنسټ پر جوړولو خپلو خلکو ته خدمت وکړي.
