د جرمني لومړي وزیر خبرداری ورکړ؛ هغه افغانان، چې جرمونه کوي له هېواده ایستل کیږي.

د اګست پر دېرشمه جرمني ۲۸ افغانان افغانستان ته راولېږل، چې بېلابېل جرمونه یې کړي وه.

اوس د دغه هېواد لومړی وزیر یو ځل بیا وايي؛ هغه افغانان، چې جرمونه کوي له دې هېواده به وشړل شي.

اولف شولتز په بروکسل کې د اروپايي ټولنې د مشرانو په غونډه کې ویلي، چې دا ډول هڅې پخوا هم شوې وې. که څه هم پیچلې وې؛ خو بریالۍ وې.

د آلمان لومړی وزیر اولاف شولتز وایي: زمونږ په هېواد کې ډېر شمېر افغان مجرمین ول، چې مونږ بېرته افغانستان ته ستانه کړل. دا پېچلې وه؛ خو مونږ دا کار وکړ. دا پروسه به روانه وي او مجرمین به بېرته خپلو هېوادونو ته ستانه کړو. مونږ د سوریې د کډوالو لپاره هم همداسې کوو.

دغه راز د ترکیې ولسمشر پدې باور دی، چې د کډوالۍ ضد مبارزه له اسلامه د  ډارولو په حرکتونو کې رېښه لري او په اروپا کې ځینې حرکتونه دا تقویه کوي.

د ترکیې ولسمشر رجب طیب اردوغان وایي: دا هڅه په اروپا کې له اسلامه د ډارونې د ښي اړخو افراطي خوځښتونو لخوا پیاوړې شوې او د مهاجرینو ترمنځ یې اندېښنې راپارولي دي. دا حرکت په اروپا کې دومره پیاوړی شوی، چې اوس په دغو هېوادونو کې د مهاجرینو سوله‌ییز ژوند ګډوډوي. مونږ په ځانګړي توګه اندېښمن یوو.

ایران له افغان کډوالو سره د زور - زیاتي چلند پيل کړی؛ خو په همدې حال کې یې له ملګرو ملتونو غوښتي، چې په ایران کې د کډوالو لپاره بودجه زیاته کړي.

د کډوالو او راستنېدونکیو چارو وزارت مرستیال عبدالرحمن راشد وایي، کابل په کوربه هېوادونو کې له افغان کډوالو سره انساني چلند غواړي.

د ملګرو ملتونو د وروستي راپور له مخې؛ په تېر کال کې له پاکستان څخه څه باندې ۷۳۳ زره کسان افغانستان ته راستانه شوي دي.

ویل کیږي، چې په ګاونډ هېوادونو کې د افغان کډوالو د ژوند شرایط ستونزمن شوي او راستانېدو ته اړ شوي دي.

د افغانستان د انرژۍ او اوبو وزارت ويلي؛ د بامیان د خلکو د برښنا د ستونزې د حل لپاره هڅې زیاتې شوي دي.

د افغانستان د انرژۍ او اوبو وزارت خبر ورکړی، چې د دغه وزارت چارسمبالي عبداللطیف منصور د چین له سفیر ژاو شینګ سره د همدې موخې لپاره بامیان ولایت ته سفر کړی او د دې ولایت له والي سره یې د لمریزې برښنا د پروژې له سیمې لیدنه کړې ده.

د انرژۍ او اوبو وزارت چارسمبالي زیاته کړې؛ د دې پروژې لومړنۍ څېړنې بشپړې شوي او اوس د لمریزې برښنا پروژه د چین پر مرسته په بامیانو کې پلې کېږي.

د بامیان ولایت د لمریزې برښنا د تولید پروژه به د ۲۰ میګاواټه برښنا د تولید وړتیا ولري، چې د بامیان ولسي اړتیاوې به پوره کړي.

د باميان والي ويلي، چې د باميان خلک برښنا ته سخته اړتيا لري؛ نو هيله ده، چې د دې پروژې کار ژر تر ژره پيل شي.

ویل کیږي، چې چین د دې پروژې عملي کولو ته ژمن دی.

د افغانستان په چارو کې د چین ځانګړي استازي یو شیائو یونګ د افغانستان په چارو کې د اروپايي ټولنې د ځانګړي استازي ټوماس نیکولسن په ګډون د آسیا او آرام سمندر لپاره د دې ټولنې له استازو سره  لیدلي دي.

نوموړي د شنبې پر ورځ (د تلې اته‌ویشتمه) په ایکس کې له دې پلاوي سره د بروکسل غونډه ګټوره یاده کړې او څرګندوي: مونږ د افغانستان بیارغونې ته پر دوامداره تعامل او زیاتې پاملرنې ټینګار وکړ.

بیجینګ په تېرو درې کلونو کې د افغانستان اسلامي امارت د یوه مهم ملګري په توګه راڅرګند شوی او په افغانستان کې د دې وړتیا لري، چې د همکارۍ زیاته، سیمه‌ییز ادغام ته وده ورکړي او د امنیتي ننګونو په ګډون له بېلابېلو خنډونو سره اغېزمنه مبارزه وکړي.

نوموړي په دې وروستیو کې راپور ورکړی، چې چین د اسلامي امارت له بیا واکمنېدو راپدېخوا په فعاله توګه له افغانستان سره د اړیکو په لټه کې دی او د دې هېواد د بیارغونې او پراختیا په برخه کې یې د مرستې ژمنتیا او چینايي شرکتونو په افغانستان کې پانګونې ته لیوالتیا ښودلې ده.

تېره اوونۍ د چین لومړي وزیر لي کیانګ په اسلام‌آباد کې د شانګهای هېوادونو د سرمشریزې پر مهال  له اسلامي امارت څخه وغوښتل، چې «نرمه پالیسي» غوره او یو ټولګډونه حکومت جوړ کړي.

د لي او د پاکستان د لومړي وزير شهباز شريف په ګډه خپره شوې خبرپاڼه کې راغلي، چې دواړو چارواکو د ګاونډيانو پر ضد د افغانستان د خاورې د کارونې د مخنيوي پر اړتيا هم ټينګار کړی او د ترهګرۍ پر وړاندې یې د اغېزمنې مبارزې غوښتنه کړې ده.

لي او شريف دغه راز په دوه اړخيزه او څو اړخيزه کچه د تروريزم پر ضد د همکاريو د پياوړتيا غوښتنه کړې او د اسلامي امارت له حکومت څخه يې وغوښتل، چې په د فعالو تروريستي ډلو د له منځه وړلو لپاره کوټلي او د تائيد وړ هڅې تر سره کړي.

دغه راز دواړو مشرانو د افغانستان د حالاتو په اړه د اړیکو او همغږي د پیاوړتیا پر اړتیا هم ټینګار وکړ او د اسلامي امارت د هڅونې لپاره یې د نړیوالي ټولني د همغږو هڅو غوښتنه وکړه، چې یو ټولګډونه سیاسي چوکاټ جوړ او نرمه پالیسي پلي کړي.

ویل کیږي، چې دواړو هېوادونو د افغانستان د دوامدارې پراختیا او له نړیوالې ټولنې سره د هغه د ادغام په برخه کې پر رغنده رول ترسره کولو هوکړه کړې ده.