د ریاست‌الوزراء اقتصادي مرستیال ملا عبدالغني برادر اخوند نن یکشنبه ( د لړم پر اووه‌ویشتمه )له یو شمېر روسي او افغان پانګوالو سره پر سوداګرۍ او پانګونې خبرې وکړې.

 د ریاست‌الوزراء اقتصادي مرستیالۍ په ایکس پاڼه کې لیکلي، چې له دغو پانګوالو او سوداګرو سره خبرې په زېربنایي، صنعتي، سوداګریز، ټرانسپورټي، کرنیز، اوسپنې‌پټلۍ او روغتیایي سکټورونو کې د روسي پانګوالو پر پانګونې او شته فرصتونو او ګډې همکارۍ راڅرخېدلې.

د اقتصادي مرستیالۍ د څرګندونو له مخې؛ د ریاست الوزراء اقتصادي مرستیال په خپلو خبرو کې ویلي، چې افغانستان دا مهال په بېلابېلو سکټورونو کې د پانګونې لپاره زیات فرصتونه لري؛ هېوادني او بهرني پانګوال کولی شي، چې په دغو سکټورونو کې پانګونه وکړي.

نوموړي زیاته کړې؛ افغانستان د طبیعي سرچینو له پلوه یو بډای هېواد دی او د پانګونې لپاره ښه فرصتونه لري.

د ریاست الوزراء اقتصادي مرستیال وایي؛ دوی تل له هېوادنیو او بهرنیو پانګوالو غوښتي، چې افغانستان ته راشي او په بېلابېلو برخو کې له مارکیټ ارزونې وروسته پانګونه وکړي.

روسي پانګوالو د افغانستان د بېلا بېلو سکټورونو په ځانګړي توګه د صنعت، ټرانسپورټ، اوسپنې‌پټلۍ، روغتیا او کرنې سکټورونو کې پانګونې ته لېوالتیا وښوده او څرګندوي، چې دوی غواړي په دې برخو کې پانګونه وکړي او له اسلامي امارت سره خپلې تجربې شریکې کړي.

ویل کیږي، چې په دې ناسته کې د کور او ښار جوړولو، صنعت او سوداګرۍ، ټرانسپورټ او هوایي چلند وزارتونو سرپرست وزیرانو، د کرنې اوبو لګولو او مالدارۍ او عامې روغتیا وزارتونو مرستیالانو او د امارتي شرکتونو لوی ریاست مسوولینو هم حضور درلود.

د کاناډا لومړی وزیر جسټن ټروډو ويلي؛ په افغانستان کې د دغه هېواد د ځانګړو ځواکونو د یوه پخواني غړي د نیول کېدو موضوع یې تر څار لاندې ده.

ټروډو دغه څرګندونې د شنبې پر ورځ ( د لړم پر شپږویشتمه ) د پیرو په پلازمېنه لیما کې د آسیا – پاسیفیک د اقتصادي همکاریو د غونډې په پای کې د یوې پوښتنې په ځواب کې کړې دي.

د کاناډا ټلویزیوني شبکې CTV د څو سرچینو د څرګندونو له مخې راپور ورکړی، چې د کاناډا متقاعد عسکر ډیویډ لاوري د تېرې اوونۍ د دوشنبې پر ورځ ) د لړم یو‌ویشتمه ) کابل ته له رسېدو لږ وروسته ونیول شو.

د راپور له مخې؛ تر اوسه معلومه نده، چې دغه کاناډايي وګړی چېرته ساتل کېږي.

د ۲۰۲۱ په اګست کې د بدلونونو په جریان کې ډیویډ لاوري له افغانستان څخه د شاوخوا ۱۰۰ کسانو په وتلو کې مرسته کړې وه.

هغه پخوا په افغانستان کې یوه خصوصي امنیتي شرکت درلوده.

اسلامي امارت تر اوسه د کاناډا د لومړي وزیر د څرګندونو په اړه څه ندي ویلي.

په دې ملي ننداره کې د زعفرانو د پروسس شاوخوا څلویښت شرکتونو خپل محصولات نندارې ته وړاندې کړل.

اوس‌مهال د هرات کروندګر د زعفرانو د حاصلاتو پر راټولولو اخته دي.

د هرات د کرنې ریاست ويلي، په دې ولایت کې شاوخوا ۹ زره ۵۰۰ هکټاره ځمکه د زعفرانو تر کښت لاندې ده او ښایي، چې سږ کال به له ۴۰ ټنو زیات زعفران راټول شي.

د هرات په غوريان، پښتون زرغون، کرخ، زنده جان، انجيل او ګذره ولسواليو کې کروندګرو تر ټولو زيات زعفران کرلي دي.

په روان کال کې د هرات د کرنې ریاست د مرستندویه بنسټونو پر همکارۍ د دغه ولایت په بېلابېلو ولسوالیو کې شاوخوا ۱۲۴ ټنه د  زعفران پیاز وېشلي دي.