د ملګرو ملتونو د ماشومانو د وجهي صندوق (یونیسف) یوه چارواکي خبرداری ورکړی، چې د میانمار ځینې سیمې د وروستۍ ویجاړونکې زلزلې له کبله بشپړې ویجاړې شوې دي او دا ناورین مخ پر پراخېدو دی.

جولیا ریس ویلي، چې د زلزلې قربانیانو اړتیاوې مخ پر زیاتېدو دي او د زلزلې قربانیانو د ژغورنې لپاره د فرصت کړکۍ تړل کیږي.

د میانمار پوځي واکمن خبرداری ورکړی، چې په دې هېواد کې د ۷.۷ درجې زلزلې له کبله د مړو شمېر به له ۳ زره څخه ډېر شي، چې له کبله یې ۲ زره ۷۱۹ کسان مړه شوي او ۴۴۱ نور ورک دي.

مرستندویه ډلو د سې‌شنبې پر ورځ خبرداری ورکړ، چې زلزله ځپلې سیمې د خوړو، اوبو، سرپناه او روغتیا پاملرنې له سخت کمښت سره مخ دي او د ژوندي پاتې شویو کسانو د موندلو فرصت مخ پر خلاصېدو دی.

دا تر ټولو قوي زلزله وه، چې د جنوب ختیځې آسیا دې هېواد په تېره یوه پېړۍ کې تجربه کړه. زلزلې د میانمار دوه‌یم لوی ښار، منډالې او نیپیداو ته هم پراخ زیانونه واړول.

د ملګرو ملتونو ادارو ویلي، چې روغتونونه تر فشار لاندې دي او د ژغورنې هڅې د بېخبناوو د زیان او کورنۍ جګړې له کبله له خنډ سره مخ شوې.

د میانمار پوځي حکومت له نړیوالې ټولنې څخه د مرستې غوښتنه کړې، چې تر اوسه پورې یوازې چین، روسیې او هند، له ګاونډ هېوادونو سره یوځای، د ژغورنې او بیارغونې په عملیاتو کې د مرستې لپاره د مرستې ډلې او بشري تجهیزات دې هېواد ته لېږلي دي.

د ملګرو ملتونو د بشري میشت ځایونو پروګرام (یو این هبیتات) ويلي، چې په افغانستان کې ۲۱ میلیون خلک دا مهال د اوبو له ناورین سره مخ دي او دا هېواد د اوبو پر زیربناوو پراخې پانګونې ته اړتیا لري.

د دې پروګرام مشرې سټیفاني لوس په یوه راپور کې څرګنده کړې، چې افغانستان د اوبو په زیربناوو کې پراخې پانګونې ته اړتیا لري.

د مېرمن لوس د څرګندونو له مخې: د افغانستان لوی ښارونه لکه کابل، کندهار او هرات هم د اوبو له رامنځته شوي ناورین سره مخ دي؛ ځکه، چې د ځمکې لاندې اوبه د ټیټېدو په حال کې دي.

د ملګرو ملتونو د بشري میشت ځایونو پروګرام په افغانستان کې د اوبو د کمښت په اړه دا خبرداری په داسې وخت کې ورکوي، چې د سره صلیب نړیوالې کمیټې (ICRC) د اټکلونو له مخې؛ اتیا سلنه افغانان کافي اوبو ته لاسرسی نلري.

د ملګرو ملتونو د خوړو او کرنې اداره (FAO) په افغانستان کې د دې هېواد د یخچالونو چټکه ویلېکېدا د اوبو د کمښت لامل بللی او څرګندوي، چې دا یخچالونه د اقلیم د بدلون له کبله ویلې کېږي، چې له کبله یې افغانستان د اوبو له کمښت سره مخ او د اوبو لګولو او خوراکي توکو تولید یې هم له ګواښ سره مخ کړی دی.

دا په داسې حال کې ده، چې د افغانستان په بېلابېلو سیمو کې ځینې خلک د اوبو له کمښت اندېښمن شوي او وايي، چې د اوبو کمښت مو ژوند له ننګونې سره مخ کړی دی.

د فراه او کندهار د طبیعي پېښو پر وړاندې د مبارزې ریاستونو چارواکو ويلي، چې په دغو دوه ولایتونو کې د سېلابونو له کبله ۲۹ کسان مړه شوي او ۹ نور ټپیان دي.

د فراه د طبیعي پېښو د څارنې مشر محمد اسرائیل سیار آریانا نیوز ته تائید کړې، چې د سې‌شنبې پر ورځ د دې ولایت په پشتکوه قلعه کاه ولسوالۍ کې د سېلاب له کبله ۲۱ کسان مړه شوي او ۶ نور ټپیان دي.

د سیار د څرګندونو له مخې؛ دا خلک د تفریح ​​لپاره د پشتکوه قلعه کاه غرونو ته تللي وه، چې ناڅاپه سېلاب لاهو کړل.

د کندهار د طبیعي پېښو پر وړاندې د مبارزې ریاست چارواکو هم ویلي، چې په دې ولایت کې د سېلابونو له کبله ۱۱ کسان مړه او ټپیان شوي دي.

دوی ویلي؛ د دې ولایت په اوومه ناحیه کې یوه ښځه او در ماشومان د خپل کور د چت د لوېدو له کبله خپل ژوند له لاسه ورکړی دی.

دوی زیاته کړې، چې د دې ولایت د پېنځمې امنیتي حوزې په اړوند سیمه کې د سېلابونو له کبله درې ښځې او یو ماشوم مړه شوي دي.

دوه ماشومان او یو بل کس هم ټپیان شوي دي.