تازه خبرونه
ټاکنیزو شکایتونو کمیسیون ته د رایو ټول سندونه سپاروـ د ټاکنو کمیسیون
د ټاکنو خپلواک کمیسیون تازه ژمنه کړې، چې د ۶۵ سلنه بایومتریک شویو او ۳۵ سلنه بې بایوو متریک رایو سندونه به د ټاکنیزو شکایتونو خپلواک کمیسیون ته وسپاري.
د آریانا نیوز د موندنو له مخې؛ د رایو ورکولو له پېنځه سوه اته پنځوس مرکزونو څخه یوازې په دوه سوه دوه هغو کې د ولسي جرګې ټاکنې له ننګونو پرته تر سره شوي، خو د رایو ورکولو په درې سوه شپږ پنځوس مرکزونو کې ټاکنې له ستونزمن حالت سره مخ شوې دي.
د ټاکنو خپلواک کمیسیون د تازه څرګندونو له مخې؛ د دواړو کمیسیونو د هوکړې له مخې؛ به د بایو متریک شویو او له بایو متریک پرته د ترسره شویو رایو سندونه د ټاکنیزو شکایتونو خپلواک کمیسیونه ته وسپارل شي.
د ټاکنو خپلواک کمیسیون د ویاند مرستیال عبدالعزیز ابراهیمي وایي: پرېکړه شوې، چې د کابل د ولسي جرګې د رایو پر باطلیدو له سره بیا کتنه وشي او مونږ په دې بهیر کې خپلې مرستې ته ژمن یو.
د ټاکنیزو شکایتونو خپلواک کمیسیون وایي، که د ټاکنو خپلواک کمیسیون اسناد د ټاکنو روڼتیا تضمین کړي، د کابل ټولې رایې به باطلې نشي.
د ټاکنیزو شکایتونو خپلواک کمیسیون منشي وایي: که اسناد او د رایو بېرته شمېرل رڼښت وښيي، مونږ به د خپلې پرېکړې په لومړي بند کې تعدیل راولو.
د ټاکنیزو شکایتونو خپلواک کمیسیون او د مدني ټولنو او ګوندونو په یوه مشورتي ناسته کې هم ټینګار شوی، چې دا کمیسیون به یوازې بایومتریک شوې رایې ومني؛ خو ټاکنیزو شکایتونو خپلواک کمیسیون دا خبره ونه منله.
د افغانستان روڼتیا څار رییس سید اکرام افضلي وايي: د ټاکنیزو شکایتونو کمیسیون باید پرخپله پرېکړه، چې په کې د کابل د ولسي جرګې رایې باطلې اعلام شويو؛ کلک ودریږي. پرته لدې به د ګوندونو له فشارونو سره مخ شي او د اړوند ټاکنو له ترسره کولو پرته به د حل بله لار ونلري.
که څه هم د ټاکنیزو شکایتونو خپلواک کمیسیون د کابل رایې باطلې کړي دي؛ خو د حکومت له منځګړیتوب وروسته دې بنسټ له دې پرېکړې په شاتګ وکړ او اوس د ټاکنو خپلواک کمیسیون د سندونو د څېړلو نیت لري.
خبریاله: دیانا صمدي
تازه خبرونه
افغان او ایراني حکومتي مشرانو د سیاسي، اقتصادي، سوداګریزو او ټرانزیټي اړیکو پر پياوړتیا خبرې وکړې
د ریاستلوزراء اقتصادي مرستیال ملا عبدالغني برادر او د حکومت یو شمېر وزیرانو د ایران د ولسمشر له ځانګړي استازي او په کابل کې د ایران له سفیر حسن کاظمي قُمي سره وکتل.
د ریاست الوزراء د مرستیالۍ دفتر ویلي؛ د لیدنې پر مهال د سیاسي، اقتصادي، سوداګریزو او ټرانزیټي اړیکو پر پياوړتیا او په بېلابېلو برخو کې پر دوه اړخیزو همکاریو خبرې وشوې.
د ریاست الوزراء اقتصادي مرستیال د افغانستان او ایران اړیکې ښې او مثبتې وبللې او څرګندوي، چې د اړیکو د پراختیا او پياوړتیا لپاره ګډ کار ته اړتیا ده.
ملا برادر وایي: سږ کال د اورښتونه د ډېروالي له کبله نیمروز ولایت او د ایران سیستان ته د هلمند سیند اوبه ورسېدې، چې دا به د دواړو هېوادونو د ولسونو ډېری ستونزې حل کړي.
دغه راز ملا عبدالغني برادر اخوند د ایران له لارې اروپايي هېوادونو ته د افغانستان تولیداتو ته د ټرانزیټي اسانتیاوې له برابرولو خوښي وښوده او د دواړو هېوادونو ترمنځ یې د ټرانزیټ او سوداګرۍ کچې د زیاتېدو غوښتنه وکړه.
په کابل کې د ایران سفیر سیستان ته د هلمند سیند د اوبو رسېدو په اړه خوښي څرګنده کړه او د دواړو هېوادونو د اقتصادې ودې او پراختیا لپاره اړینه بولي، چې هېواد به یې له افغانستان سره د سوداګرو د بانکي ستونزو د له منځه وړلو، د چاپېریال ساتنې پر وړاندې د ګډې مبارزې، د کرنې سکټور عصري کولو او همدارنګه د ایران له لارې د افغانستان د سوداګرۍ او ټرانزیټ کچې زیاتولو په برخو کې همکاري وکړي.
د ریاست الوزراء اقتصادي مرستیال په ایران کې د میشت افغان کډوالو د ستونزو د یادونې تر څنګ له ایراني لوري وغوښتل، چې په جبري بڼه افغان کډوال را ونهباسي او په دې اړه د دواړو لوریو ترمنځ ښه همغږي رامنځته شي.
ویل کیږي، چې په دې لیدنه کې د اوبو او انرژۍ، کرنې، اوبولګولو او مالدارۍ، د اطلاعاتو او کلتور وزارتونو چارسمبالو او په تهران کې د افغانستان چارسمبالي استازي فضل محمد حقاني هم حضور درلود.
تازه خبرونه
ملا برادر د قزاقستان د لومړي وزیر له مرستیال سره د اوسپنې پټلۍ پر رامنځته کولو خبرې وکړې
د اسلامي امارت د ریاست الوزرا اقتصادي مرستیال او د قزاقستان د لومړي وزیر مرستیال سیرک ژومانګارین د ترکمنستان او افغانستان له لارې پاکستان ته د اوسپنې پټلۍ پر رامنځته کولو خبرې وکړې.
د افغانستان اقتصادي مرستیالۍ په خبربانه کې راغلي، چې په دې لیدنه کې ملا عبدالغنی برادر د دواړو هېوادونو د سوداګرو د بانکي ستونزو د حل، د افغان – قزاق د ګدو شرکتونو رامنځته کولو او سوداګرو ته د ویزو د ورکړې لپاره د هوکړه لیکونو پر لاسلیک ټینګار وکړ.
سیرک ژومنګارین په پام کې لري، چې د قزاقستان د صنعت او سوداګرۍ ګډه خونه او د دواړو هېوادونو د سوداګرۍ او کار ګډه ډله رامنځته کړي او چمتو دی، چې د برښنایي حکومتولۍ، صنعت، لوړو زدهکړو، پوهنې، روغتیا او بانکدارۍ په سکټورونو کې له افغانستان سره همکاري وکړي.
تازه خبرونه
ایران او پاکستان په افغانستان کې پر ترهګرو ډلو اندېښنه څرګنده کړه
ایران او پاکستان په یوه ګډه اعلامیه کې د یو سولهییز، متحد، خپلواک او له ترهګرۍ او نشهیي توکو قاچاق څخه د پاک افغانستان په اړه پخپلو ژمنو ټینګار څرګند کړی دی.
دواړو لوریو د ترهګریزو ډلو شتوالي ته په افغانستان کې نغوته کړې، چې سیمې او نړۍ ته امنیتي ګواښ دی؛ نو پر وړاندې یې پر مبارزه، همکارۍ او متحدې جبهې جوړولو ټینګار کړی دی.
دوی دغه راز د سیمې د امنیت او ثبات د ډاډمنولو لپاره د سیمهییزې او نړیوالې همغږۍ د اړتیاوو پر اهمیت خبرې کړې دي.
دواړه لوري د افغانستان حاکمیت او ځمکنۍ بشپړتیا ته د احترام کولو تر څنګ څرګندوي؛ د دې هېواد ټولې خواوې باید په بنسټیزو پرېکړو کې ونډه ولري، چې په هېواد کې د سولې او ثبات لامل شي.
-
تازه خبرونه2 days ago
وروستیو سیلابونو په افغانستان کې ۱۵۰۰ کورنیو ته زیانونه رسولي
-
نړۍ4 days ago
د جاپان دوه پوځي چورلکې بحر ته وغورځېدې
-
تازه خبرونه4 days ago
د پاکستان سرحدونو وزیر د افغان کډوالو پر باعزته ستنېدا ټینګار وکړ
-
نړۍ2 days ago
د مالیزیا بحري ځواکونو د چورلکو په ټکر کې ۱۰ کسان مړه شول
-
لوبی3 days ago
عینو مېنې، استقلال کابل او اټکانرژي فوټبال لوبډلې، خدیم افسي مات کړل
-
لوبی2 days ago
د موج ساحل لوبغاړي د جوانان واحدي لوبډلې پر وړاندې زړهراکښونکی ګول ترسره کړ
-
تازه خبرونه2 days ago
راشد خان د افغان بیسیم سوداګریز سفیر شو
-
سیمه ییز خبرونه3 days ago
د ایران ولسمشر پر درې ورځني سفر پاکستان ته ولاړ