د پاکستان بلوچستان ایالت پولیسو افغان کډوالو ته خبرداری ورکړی، چې له دغه ایالت څخه په خپله خوښه ووځي.

پولیسو ویلي، چې که دغه کډوال په ځايي وخت د سې شنبې پر ورځ سهار اته بجې د بلوچستان له څنډو او کلیو ونه‌وځي؛ جبري به وویستل شي.

هغه کډوال افغانان، چې د افغان تابعیت او د راجسټریشن کارتونه لري هم په دې خبرتیا کې شامل دي.

که څه هم د پاکستان حکومت له دې مخکې اعلان کړی و، چې هغه کډوال به له پاکستان څخه ونه‌ایستل شي، چې د افغان تابعیت کارتونه او د راجستریشن سندونه ولري؛ خو اوس د بلوچستان ایالت چارواکي وايي، چې قانوني کډوال به هم ایستل کېږي.

له دې مخکې اسلام‌آباد افغان کډوالو ته د دوشنبې پر ورځ ( د وري اتویشتمه / د اپریل پېنځلسمه ) ضرب الاجل ټاکلی و او دا یې د افغان کډوالو د جبري اخراج دوه‌یم پړاو ونوماوه.

چارواکو ویلي، چې دا پړاو پر شاوخوا ۸۵۰ زره افغانانو، چې ډېر یې له لسیزو راپدیخوا په پاکستان کې ژوند کوي؛ د پلي کېدو وړ دی.

د افغانستان اسلامي امارت او د ملګرو ملتونو ادارې اټکل کوي، چې په تېرو شپږ میاشتو کې له نیم میلیون ډېر کسان له پاکستان څخه ایستل شوي او یا هم په خپله خوښه افغانستان ته ستانه شوي دي.

د ریاست الوزراء اقتصادي مرستیال ملا عبدالغني برادر تېره ورځ هلمند ولایت ته د خپل سفر پرمهال له کجکي بند څخه لیدنه وکړه.

د ریاستالوزراء د اقتصادي مرستیالۍ د څرګندونو له مخې؛د ریاست الوزراء اقتصادي مرستیال د کجکي بند پروژه ملي او حیاتي یاده کړه او په دې برخه کې یې د رامنځته شویو نوښتونو له کبله د مسوولینو هڅې وستایلې.

ملا برادر ویلي، چې وچکالۍ او په بندونو کې د اوبو د کمښت له کبله د برښنا د تولید کچه راټیټه شوې وه؛ خو سږ کال په هېواد کې د اورښتونو له کبله د اوبو کچه لوړه شوې او د کجکي بند په څېر زیاتره بندونه له اوبو ډک شوي دي.

له دې سره به په روان کې کال د کرنې برخه وده وکړي او هم به په هېواد کې دننه د برښنا د تولید کچه لوړه شي.

د کجکي بند د هېواد په کچه یو له لویو بندونو څخه دی، چې د هلمند ولایت په کجکي ولسوالۍ کې  د هلمند پر سیند د موسمي سیلابونو د کنټرول، کرنیزو ځمکو خړوبولو او برښنا د تولید لپاره جوړ شوی دی.

دغه راز د ریاست الوزراء اقتصادي مرستیال ملا عبدالغني برادر د روزګان ولایت له سیلاب ځپلیو سیمو څخه هم لیدنه کړې او هلته یې له سیمه‌ییزو چارواکو او عامو خلکو سره کتلي او د لازمو مرستو د رسولو امر يې کړی دی.

د ریاست الوزراء اقتصادي مرستیال ملاعبدالغني برادر روزګان ولایت ته د سفر پرمهال له سیلاب ځپلیو او زیانمنو کورنیو سره د خواخوږۍ ترڅنګ یوه اندازه نغدي مرسته هم  کړې ده.

دا په داسې حال کې ده، چې د سیمه ایزو چارواکو د معلوماتو له مخې په دغو سیلابونو کې  ۴۶۸ د استوګنې کورونه بشپړ او لږ څه ویجاړ شوي او له پنځوس څخه ډېر پلچکونه او زرګونه جریبه فصلونه سیلابونو وړي دي.

د ریاست الوزراء سياسي مرستيال مولوي عبدالکبير په کابل کې د اروپا مېشتو افغانانو له يو شمېر استازو او بنسټونو مشرانو سره په کتنه کې څرګنده کړې؛ اوس افغانستان د واحد ملت، واحد اسلامي نظام لرونکی دى او د وېشلو هڅې یې ناکامې شوې دي.

مولوي عبدالکبیر زیاته کړې، چې ملي حاکمیت، ځمکنۍ بشپړتیا، ملي مشارکت او ازادي ډاډمنه شوې او افغانستان د ښې راتلونکې پر لوري ستر ګامونه پورته کوي.

د ریاست الوزراء سیاسي مرستیال وايي؛ اسلامي امارت په سیمه او نړۍ کې نظم او ثبات غواړي او د اسلامي امارت خپلواکۍ ته هم باید درناوی وشي.

نوموړي ویلي؛ د اسلامي امارت لومړیتوب سیاسي او اقتصادي دایمي ثبات او په افغانستان کې د یووالي ټینګښت دی.

په دې کتنه کې د جرمني، بریټانیا، بلجیم، سویډن، اټریش، ترکیې، ناروې او عربي متحده اماراتو  مېشتو افغان بنسټونو استازو او مشرانو په یادو هېوادونو کې د مېشتو افغانانو وړاندیزونه او نظریات د ریاست الوزراء له سیاسي مرستیال سره شریک کړل.

ډاکټر خوشال روهي د نورو په استازيتوب خبرې وکړې او څرګندوي، چې دوی په بهر کې اټولنې لري او د زيات شمېر افغانانو استازيتوب کوي.

هغه زیاته کړې: اسلامي امارت په تېرو درې کلونو کې د پام وړ پرمختګونه او لاسته راوړنې لري، چې افغانان او نړیواله ټولنه ترې راضي ده.

د نوموړي د څرګندونو له مخې؛ اوسنی نظام د ډېرو قربانيو پايله ده او هيچا ته بايد اجازه ورنکړ شي، چې کمزوری او له منځه يې يوسي.

دی وایي، چې په بهر کې میشت افغانان ستر علمي او اقتصادي ظرفیتونه لري، چې اسلامي امارت کولی شي د هېواد په پرمختګ کې ترې ګټه واخلي.

روحي د افغانستان اقتصادي او مالي پالیسي وستایله او څرګندوي: افغانستان د زورواکۍ، فساد، ناامنۍ او غصب له ټاپوګانو ژغورل شوی دی؛ په سيمه او نړۍ کې هیڅوک د جګړې پلوي ندي.

هغه زیاته کړې، چې اسلامي امارت باید خپله کابینه له سرپرستۍ وباسي او تلپاتی حکومت جوړ کړي. هغه د ښځو لپاره د زده‌کړو او کار د دروازې د خلاصولو غوښتنه هم وکړه.

دې استازو او مشرانو ويلي، چې د افغانستان حالات او شرایط له هغه څه سره ډېر توپير لري، چې په اړه يې رسنیز منفي تبلیغات خپرېږي.

دوی دا ډاډ هم څرګند کړ، چې د افغانستان رښتینی انځور به اروپايي هېوادونو ته ورسوي.