د افغانستان کورنیو چارو وزارت د اسټرالیایي پروفیسور ټیموتي ویکس( جبرئیل عمر ) ، چې په افغانستان کې یې ژوند کاوه له مړېنې خبر ورکړ او پر ​​مړېنه یې خواشیني څرګنده کړه ده.

د کورنیو چارو وزارت ویاند عبدالمتین قانع په یوه رسنیزه خبرپاڼه کې ویلي، چې ټیموتي ویکس اسلامي امارت ځواکونو په وروستیو کلونو کې نیولی و؛ خو له څه مودې وروسته د بندیانو په تبادله کې خوشې شو او بیا يې اسلام قبول کړ او خپل نوم یې له ټیموتي ویکس څخه جابرئیل عمر ته بدل کړ.

د عبدالمتین قانع د څرګندونو له مخې، هغه له ډېرې مودې راپدېخوا د سرطان پر ناروغۍ اخته و او د چهارشنبې پر ورخ( د مرغومي نولسمه) د کابل په خپل استوګنځي کې مړ شو.

د یادونې ده، چې جبرئیل عمر په کابل کې د انګلیسي ژبې د ښوونکي په توګه دنده ترسره کوله.

د هند بهرنیو چارو وزارت مرستیال ویکرام میسري په متحده عربي اماراتو کې د افغانستان د بهرنیو چارو وزارت له چارسمبالي امیرخان متقي سره لیدلي دي.

د هند بهرنیو چارو وزارت د خبرپاڼې له مخې؛ په دې کتنه کې، چې نن( چارشنبه د مرغومي نولسمه )ترسره شوې دواړو خواوو پر دوه اړخیزو اړیکو، د سیمې پر امنیتي وضعیت او بشري مرستو خبرې کړې دي.

د دې وزارت د خبرپاڼې له مخې؛ دواړو لوریو ژمنه کړې، چې د چابهار بندر له لارې به سوداګرۍ ته نورو هم وده ورکړي.

دغه راز ښاغلي مصري ډاډ ورکړی، چې له افغانانو سره پر بشري مرستو سربېره به په افغانستان کې د پراختیايي پروژو ملاتړ ته هم روان وساتي.

هند ویلي، چې تر اوسه یې افغانستان ته د توکو څو باره، چې په کې ۵۰ زره ټنه غنم، ۳۰۰ ټنه درمل، ۲۷ ټنه زلزله ځپلو لپاره مرستې، د پولیو واکسین ۱۰۰ میلیون دوزه د ماشومانو د ګوزڼ واکسین او نور اړین توکي مرسته کړې ده.

د یادونې ده، چې په دې وروستیو کې د افغانستان او هند ترمنځ ډیپلوماټیکې اړیکې مخ په پراخېدو دي.

د افغانستان اسلامي امارت د ډونلډ ټرمپ هغه ادعاوې په کلکه رد کړې، چې ګواکې واکمن حکومت له امریکا څخه میلیارډونه ډالر ترلاسه کوي.

د اسلامي امارت د ویاند مرستیال حمدالله فطرت په ایکس پاڼه کې لیکلي، چې « امریکا اسلامي امارت ته نه یوازې دا، چې یوه ( افغانۍ ) هم نده ورکړې، بلکې د افغانستان د خلکو میلیارډونه ډالر یې غصب او کنګل کړي دي.»

نوموړي زیاته کړې؛ « هغه پیسې، چې امریکا یې یادونه کوي؛ د امریکا هغه مصارف دي، چې ډېره برخه یې له افغانستان څخه د امریکايي ځواکونو پر تېښته او وتلو مصرف شوي او یا د هغو افغانانو پر وتلو او ځای پر ځای کولو لګول شوي، چې له دوی سره یو ځای وتښتېدل.»

د نوموړي د څرګندونو له مخې؛ شاید یوه اندازه یې د نړیوالو بنسټونو له لوري په اصطلاح د بشري مرستو پر نوم هم لګیدلې وي.

هغه وایي: « مونږ هم غواړو، چې امریکا دې د مرستو پر نوم دغه ډول لګښتونه قطع کړي؛ ځکه دا پیسې د افغانستان د خلکو په هیڅ  درد نه‌خوري. که دقیق تحلیل وشي، دا ټولې پیسې امریکا د افغانستان پر نوم بېرته د خپلو اهدافو د ترسره کولو لپاره مصرف کړي او هڅه کوي له دې لارې د اسلامي امارت پر وړاندې پروپاګند وکړي.

د امریکا منتخب ولسمشر په دې وروستیو کې ویلي، چې د امریکا له مالي سرچینو څخه په میلیارډونو ډالر اسلامي امارت ته ورکړ شوي دي.

ډونالډ ټرمپ د افغانستان په اړه د جوبایډن پالیسي ناسمه وبلله او زیاتو، چې د واشنګټن اوسنۍ ادارې د اسلامي امارت تر واکمنۍ لاندې افغانستان ته میلیارډونه ډالر ورکړي دي.

د امریکا منتخب ولسمشر په یوه خبري غونډه کې له افغانستان سره د امریکا د نغدي مرستو یادونه کړې او وایي، چې افغانستان ته د میلیارډونو ډالرو د استولو خبره د باور وړ نده.

ډونلډ ټرمپ د امریکا د اوسني ولسمشر جوبایډن پر اداره نیوکې وکړې او ادعا کوي، چې بایډن د امریکا له خزانې میلیارډونه ډالر ضایع کړي دي.

ټرمپ ویلي: "دا حتی د باور وړ نده، چې مونږ میلیونونه ډالر نه، بلکې په میلیارډونه ډالر په افغانستان کې طالبانو (اسلامي امارت) ته لیږو. دا پیسې د بایډن لخوا لیږل کیږي؛ هماغه کس، چې د امریکا له خزانې څخه ۵۰-۶۰ ټریلیونونه ضایع کړي. هغه څه، چې زمونږ ترټولو مهمه شتمني ګڼل کیږي. د دې کار اجازه باید ورنکړ شي. "

په همدې حال کې یو شمېر کارپوهان په افغانستان کې د امریکا او ناټو شل کلن حضور د روان وضعیت د خرابېدو لامل بولي او وايي، چې دغه هېواد له دې هېواد سره د مرستې او د بهرنیو اسعارو د زېرمو د را ایستلو مسوولیت لري.

دا په داسې حال کې ده، چې امريکا په تېرو درېيو کلونو کې له افغانستان سره له دوه نيم ميليارډو ډالرو ډېره مرسته کړې ده؛ خو د امریکا بهرنیو چارو وزارت پر ځلونو ویلي، چې دا مرستې یوازې د افغانستان د عامو خلکو لپاره د مرستو پروګرامونو ته ورکړ شوي او دا پیسې د اسلامي امارت غړو ته نه‌رسیږي.

ویل کیږي، چې اسلامي امارت له امریکا څخه د کومې مرستې توقع نلري او نه یې هم کله غوښتنه کړې ده.