د ایران بهرنیو چارو وزیر عباس عراقچي په ملګرو ملتونو کې د دې هېواد له سفیر سره د ایلان ماسک د لیدلو په اړه د امریکايي رسنیو راپورونه رد کړل.

هغه د شنبې پر ماښام (د لړم شپږویشتمه ) په يوه پروګرام کې ویلي، چې له ایلان ماسک سره هیڅ یوه ایراني چارواکي لیدلي ندي او دا موضوع یې د امریکایانو خبر جوړول یادکړي دي.

په ملګرو ملتونو کې د ایران اسلامی جمهوریت له استازی سعید ایرواني سره د ایلان ماسک د کتنې خبر لومړی نیویارک ټایمز خپور کړ او څرګنده یې کړه، چې دواړو لوریو د تهران او واشنګټن ترمنځ د کړکېچ کمولو پر لارو چارو خبرې کړې دي.

عراقچي زیاته کړې: یقیناً د اسلامي جمهوریت هیڅ یو سفارت او دفتر به له همغږۍ پرته دا ډول غونډې ترسره نکړي.

څو ساعته مخکې د ایران دولتي خبري سرچینې ایرنا لیکلي وه، چې د ایران بهرنیو چارو وزارت ویاند اسماعیل بقایي نه یوازې دا ناست رد کړې، بلکې د امریکایي رسنیو د دې پوښښ په اړه یې حیرانتیا هم څرګنده کړې ده.

دا تردیدونه په ملګرو ملتونو کې د ایران له سفیر امیر سعید ایرواني سره د ایلان ماسک د کتنې د خبرونو له پراخ پوښښ وروسته خپاره شوي دي.

د دې ناستې خبر لومړی د پنجشنبې پر ورځ (د لړم پر څلیریشتمه ) نیویارک ټایمز د ځینو ایراني چارواکو پر حواله خپور کړ، چې د دواړو لوریو د خبرو تمرکز د ایران او امریکا ترمنځ د کړکېچ د کمولو پر څرنګوالي و.

د اسرائیلو لومړي وزیر بنیامین نتنیاهو د یکشنبې پر ورځ ( د لړم شلمه ) ویلي، چې له امریکا د ځواکنو اړیکو او یوالي د پیاوړتیا لپاره مې په تېرو څو ورځو کې د امریکا له غوره شوي ولسمشر ډونالډ ټرمپ سره درې ځله ټیلیفوني خبرې کړې دي.

د نتانیاهو د خبرپاڼې له مخې؛ دغه خبرې اترې ښې او ډېرې اړینې وې او د ایران د ګواښونو او خطرونو په اړه وغږېدو او پرې همغږي شو، چې په کې اسرائیلو ته د سولې او پرمختګ ستر فرصتونه لیدل کیږي.

نتانیاهو نن د اسرائیلو د کابینې په اوونیزه غونډه کې ادعا وکړه، چې لوړپوړیو امنیتي او سیاسي چارواکو په روانه جګړه کې د یو شمېر لوړو خطر لرونکیو پوځي عملیاتو مخالفت کړی دی. په دغو عملیاتو کې د حزب الله د عمومي منشي حسن نصرالله وژل او د رفح پر ښار برید شامل ول.

د اسرائیلو لومړي وزیر زیاته کړې: په کابینه کې داسې کسان هم ول، چې زما له پلان سره یې د نصرالله د نیولو او د نورو عملیاتو د ترسره کولو مخالفت کاوه. دوی په خپل مخالفت کې د امریکا د ملاتړ د نشتوالي یادونه وکړه ... خو ما ونه منله او ماموریت مې روان وساته.

نتانیاهو همدا راز کورني او بهرني عناصر تورن کړل، چې د یرغمل شویو د خلاصون لپاره د خبرو اترو په اړه دروغ وايي.

هغه ومنله، چې د اګست په وروستیو کې د رفح ښار له یوه تونل څخه د ۶ یرغمل شویو کسانو له وژلو وروسته حماس یوازې خپل دریځ پیاوړی کړی دی.

د پاکستان دفاع وزیر خواجه محمد اصف تېره ورځ په یوه مرکه کې ویلي، چې په کوټه کې ترهګري یوه نیابتي جګړه ده، چې هند د TTP او  BLA په څېر ډلو له لارې زمونږ پر وړاندې روانه کړې ده.

دا په پاکستان کې د چین د پرمختګ د هڅو د شنډولو لپاره یوه دسیسه ده.

خواجه اصف له جیو نیوز سره په مرکه کې ويلي، چې بلوڅ بیلتون پالي او ټي تي پي دواړه ډلې په افغانستان کې پټنځایونه لري او له هغه ځايه خپل بریدونه پلانوي.

نوموړي پر هندوستان د تور پورې کولو پر مهال ویلي، چې د دغو دواړو وسل‌والو ډلو مالي ملاتړ کوي او په افغانستان کې دوی ته د پاکستان د ناامنه کولو لپاره اسانتیاوې برابروي.

اسلامي امارت او هندي چارواکو په دې اړه رسمي غبرګونونه ندي ښودلي؛ خو له دې مخکې د پاکستان دا ډول ادعاوې بې بنسټه یادې شوې دي.

بلوڅ بیلتون پالو د بلوچستان په کويټه ښار کې د رېل په یوه تمځای کې د تیرې ورځې د ځانمرګې برید مسوولیت پر غاړه اخیستی، چې له کبله یې د ۱۹ پاکستانيو پوځيان په ګډون ۲۶ کسان ووژل شول او لږ تر لږه ۵۰ نور ټپیان دي.