تازه خبرونه
هند د افغانستان خلکو ته د لس زره ټنه غنمو هوکړه لیک لاسلیک کړ
هند د افغانستان خلکو لپاره د ملګرو ملتونو له خواړو نړیوال پروګرام سره د لس زره ټنه غنمو د بشري مرستو په برخه کې یو هوکړه لیک لاسلیک کړ.
دا بشري مرسته د هند د بشري مرستو پېنځمه برخه ده، چې د چابهار بندر له لارې رالېږل کیږي. تېر کال د خواړو نړیوال پروګرام د هند ۴۰ زره ټنه غنم د افغانستان ۲۳ میلیون خلکو ته ورکړل.
دغه نوی هوکړه لیک د پنجشنبې پر ورځ په ممبي کې د هند د بهرنیو چارو وزارت د پاکستان، افغانستان او ایران د څانګې د ګډ سکرتر جې پي سنګهـ او د هند د خواړو د نړیوال پروګرام د استازې الیزابت فاور ترمنځ لاسلیک شو.
الیزابت فاور وایي: د افغانستان له خلکو سره د خوراکي توکو د مرستو له کبله د هند له حکومت څخه د زړه له کومې مننه کوم. د هند مرسته د اړمنو کورنیو لپاره د ژوند ژغورنې لار او په ټول افغانستان کې د میلیونونو خلکو سره د WFP د مرستې یوه مهمه برخه ده.
جې پي سنګهـ ویلي؛ دا په افغانستان کې د WFP لپاره د هغو مرستو پېنځمه برخه ده، چې تر ټولو اړو کسانو ته ورکړ شوي دي. هند خپله ژمنه پوره او پلې کړه.
