Connect with us

نړۍ

ملګري ملتونه د بشري حقونو په شورا کې د روسیې په اړه رای ورکوي

خپور شوی

د

(Last Updated On: وری ۱۸, ۱۴۰۱)

رویټرز څرګنده کړې؛ د ملګرو ملتونو عمومي غونډه به نن پنجشنبه د امریکا د هغې غوښتنې په اړه، چې روسیې په اوکراین له بشري حقونو سرغړونه کړې له اړوند شورا څخه د دغه هېواد د غړیتوب په اړه رای ورکړي.

د ۴۷ هېوادونو د غړیو په شورا کې د یو هېواد غړیتوب له ممتنع رایو پرته د دوه پر درېیمه برخه رایو ځنډېدلی شي. په دې شورا کې پر ۲۰۱۱ کال د لیبیا غړیتوب د دې هېواد د هغه وخت مشر معمر القذافي ته د وفادارو ځواکونو لخوا د مظاهره چیانو پر وړاندې د تاوتریخوالي له کبله ځنډول شوی دی.

د رویټرز د څرګندونو له مخې؛ لویدیځ ډیپلوماټان ډاډه دي، چې دوی د بشري حقونو په شورا کې د روسیې د غړیتوب د ځنډولو لپاره د عمومي غونډې د ۱۹۳ غړیو له بشپړ ملاتړه برخمن دي؛ ځکه، چې  د مسودې متن په اوکراین کې د روانو بشري حقونو او بشري بحران په اړه ژوره اندېښنه په ډاګه.

په ملګرو ملتونو کې د امریکا سفیرې لینډا ټوماس ګرینفیلډ د دوشنبې پر ورځ د دغې هڅې په رویټرز ته ویلي: اړتیا ده روسیې ته ووایو؛ مونږ به تاسې ته اجازه ورنکړو، چې له مجازاتو پرته خپل خوندیتوب روان وساتئ او وښیئ، چې بشري حقونو ته درناوی کوئ.

رویټرز د لیدل شويو یادښتونو له مخې؛ روسیې هغو هېوادونو ته خبرداری ورکړی، چې د هو یا رایې پریښودلو په صورت کې به دوه اړخیزو اړیکو ته د نادوستانه نغوتې په توګه وکتل شي.

د فبرورۍ پر ۲۴  پر اوکرایین د روسیې د پوځي عملیاتو له پیل راپدیخوا دغې شورا د روسیې په دوه پرېکړه لیکونو کې د ۱۴۱ او ۱۴۰ رایو پر ترلاسه کولو د دې هېواد بریدونه غندلي دي. په داسې حال کې، چې مسکو د اوکراین د بې وسلې کولو لپاره د ځانګړيو عملیاتو د تر سره کولو غږ پورته کړې دی.

د رویټرز په راپور کې راغلي؛ امریکا اعلان کړی، چې دوی به د روسیې د غړیتوب ځنډولو غوښتنه هغه وخت وکړه، چې اوکراین په بوچا ښارګوټي کې د سلګونه ملکي وګړیو په وژلو کې روسي سرتېري تورن کړل.

روسیې په اوکراین کې پر ملکي وګړیو بریدونه رد کړي دي.

د ملګرو ملتونو سفیرې واسیلي نیبنزیا د سې شنبې پر ورځ ویلي: په داسې حال کې، چې بوچا د روسیې تر کنټرول لاندې وه؛ یو ملکي وګړی هم له هیڅ راز تاوتریخوالی سره مخ شوی ندی.

روسیه په ژنیو کې د بشري حقونو د شورا د درې کلنې دورې دوه کاله تېر کړي، چې نشي کولی په قانوني توګه د ټینګار وړ پرېکړه وکړي. که څه هم پرېکړه یې اړین سیاسي پیغامونه ولېږدوي؛ خو کولی شي د څېړنو اجازه ورکړ شي.

د یادونې ده، چې دې شورا تېره میاشت په اوکراین کې د روسیې له برید راپدیخوا د احتمالي جنګي جرمونو په ګډون له بشري حقونو څخه د سرغړونو په اړه څېړنې پیل کړې دي.

نړۍ

د بشري حقونو لپاره د م.م ځانګړې څرګندوونکې اسرائیل پر نسل وژنې تورن کړل

Published

on

(Last Updated On: وری ۸, ۱۴۰۳)

د ملګروملتونو یوې راپور‌ورکوونکې د سې شنبې پر ورځ ( د وري اوومه) د بشري حقونو نړیوالې کمیټې ته یو راپور وړاندې کړ، چې په غزه کې یې اسرائیل پر نسل وژنې تورن کړي او پر دغه هېواد یې د بېړنیو بندیزونو او د وسلو د بندېدو غوښتنه وکړه.

اسرائیلو، چې په دې غونډه کې حاضر نه و؛ د ملګرو ملتونو د دې راپورورکوونکې تورونه رد کړي دي.

د رویټرز د څرګندونو له مخې؛ د فلسطین د بشري حقونو په برخه کې د ملګرو ملتونو ځانګړې راپورورکوونکې فرانچسکا آلبانیز د “نسل وژنې د جوړښت پېژندنې” تر سرلیک لاندې د خپل راپور د وړاندې کولو پر مهال دا خپله دندې یاده کړه، چې څېړنه یې د “بشریت د ناوړه کړنو” بشپړه څېره ښیي.

د بشری حقوقو په چارو کې د ملګرو ملتو ځانګړې راپورورکوونکې د اسرائیلو د وروستیو بریدونو له پیله تراوسه د زرګونه فلسطینیانو وژلو ته په نغوته کې ویلي: زه باور لرم، چې فلسطینیان د یوې ډلې په توګه په غزه کې ژوند کوي؛ خو د فلسطینیانو پر خلاف د نسل وژنې د ترسره کول منطقي ندي.

فرانسیسکا آلبانیز د ملګرو ملتونو د بشري حقونو کمیټۍ ته په خطاب کې زیاته کړې: زه له غړیو هېوادونو څخه غوښتنه کوم، چې د اسرائیلو پر وړاندې د وسلو د بندیز او نورو بندیزونو د لګولو په برخه کې خپل مکلفیتونه ترسره کړي او ډاډ ترلاسه کړي، چې په راتلونکي کې به دا پېښه بیا نه تکراریږي.

د اسرائیلو ډیپلوماټیک پلاوي څرګنده کړې، چې د دغه هېواد د جګړې هدف فلسطینیان نه، بلکې د حماس اسلامي ډله ده.

د اسرائیلو د څرګندونو له مخې؛ د ۲۰۲۳ کال د اوکټوبر پر اوومه د اسرائیلو پر جنوبي سیمو د حماس د غړیو له برید وروسته ۱۲۰۰ کسان، چې ډېری یې ملکي وګړي وه؛ وژل شوي او ۲۵۳ کسان یې یرغمل شوي دي.

د اسرائیلو پلاوي ویلي، چې د بشري حقونو ځانګړې راپور‌ورکوونکې “د حقیقت موندلو پر ځای، هڅه کوي، چې حقیقت تحریف او ضعیف دلیلونه وړاندې کړي.”

فرانچسکا آلبانیز د بشری حقونو له څو خپلواکو کارپوهانو څخه ده، چې د ملګرو ملتونو له‌خوا د بحرانونو او ځانګړو مسلو په اړه د راپورونو چمتو کولو او مشورې ورکولو لپاره ګمارل شوې ده او د هغې نظرونه د ملګرو ملتونو د بشري حقونو کمیټې دریځ نه‌وړاندې کوي.

دا لومړی ځل ندی، چې اسرائیل د غزې په وروستي برید کې د “نسل وژنې” پر تور تورنیږي.

د برازیل ولسمشر لوئیز ایناسیو لولا دا سیلوا (لولا) اسرائیل تورن کړل، چې د فلسطینیانو پر وړاندې “نسل وژنه” کوي.

له دې مخکې جنوبي افریقا د نډرلیند په هاګ ښار کې د جرمونو نړیوالې محکمې ته په یوه شکایت کې اسرائیل د فلسطینیانو پر ضد پر «نسل وژنه» تورن کړی  او په غزه کې یې له فلسطینیانو سره د اسرائیلو چلند په دغه هېواد کې د توکمپالنې له دورې سره پرتله کړ.

اسرائیلو دا تورونه ردوي او وايي، چې د حماس وسله‌واله ډله له فلسطینیانو څخه د انساني سپر په توګه کار اخلي.

Continue Reading

نړۍ

قطر په غزه کې د م.م د امنیت شورا د اوربند له پرېکړه لیک هرکلی وکړ

Published

on

(Last Updated On: وری ۷, ۱۴۰۳)

د قطر د بهرنیو چارو وزارت د ملګرو ملتونو امنیت شورا له هغه پرېکړه لیک هرکلی کړی، چې د روژې پرمهال یې په غزه کې د بېړني اوربند غوښتنه کړې ده.

د دې وزارت د خبرپاڼې له مخې؛ قطر هیله لري، چې دا ګام به په غزه کې د روانې دښمنۍ د دایمي پای ته رسولو لپاره په ځانګړي توګه د ناورین بشري اړخ په پام کې ونیسي، چې ملکي وګړي، ماشومان او ښځې ترې ځوریږي.

په دې خبرپاڼه کې د پرېکړه لیک پر پلي کېدا؛ د شخړو پر بندولو، د غزې ټولو سیمو ته د بشری مرستو رسېدا او بې خنډه ننوتلو د آسانتیاوو او په روانو خبرو اترو کې د مثبت ګډون اړتیا غوښتل شوې ده.

په خبرپاڼه کې راغلي دي: دغه وزارت هیله لري، چې دې پرېکړه لیک ته د ۱۴ هېوادونو رایه ورکول به د فلسطین په اشغال شوي سیمو او په ځانګړي توګه د غزې تړانګه کې د غمجنو حالاتو په اړه د نړیوالې ټولنې د پوهاوي په هڅو کې بنسټیز بدلون رامنځته کړي.

دغه راز د فلسطین د خلکو د مشروع حقوقو په ملاتړ کې قطر پر پرېکنده دریځ ټینګار کړی دی.، په دې کې د ۱۹۶۷ کال د سرحدونو خوندیتوب او د خپل خپلواک دولت د جوړولو حق هم شامل دی، چې ختیځ بیت المقدس یې د پلازمېنې په توګه وي.

قطر په تېرو څو میاشتو کې د حماس او اسرائیلو ترمنځ په غزه کې د اوربند او د یرغمل شویو تبادلې په اړه یوې هوکړې ته د رسېدو په هیله د خبرو اترو په اسانه کولو او منځګړیتوب کې مهم رول لوبولی دی.

د قطر لومړي وزیر شیخ محمد بن عبدالرحمن د یک شنبې پر ورځ په دوحه کې د ملګرو ملتونو د بشري چارو له مرستیال مارتین ګریفیتس سره د غزې تړانګې ته د بشري مرستو د رسولو د اسانتیاو په اړه هم خبرې کړې دي.

د ملګرو ملتونو امنیت شورا د دوشنبې پر ورځ یو پرېکړه لیک تصویب کړ، چې په کې د اسرائیلو او حماس ترمنځ د بېړني اوربند او همدارنګه د ټولو یرغمل شویو خوشې کولو غوښتنه شوې ده. امریکا دغه پرېکړه لیک ته ممتنع رای ورکړې ده.

د شورا ۱۴ نورو غړیو د دغه پرېکړه ليک په حق کې مثبته رای ورکړه. دغه پرېکړه ليک د دې شورا د ۱۰ غړو له‌خوا وړانديز شوى و.

په ملګروملتونو کې د الجزایر استازي عمار بن جام ویلي: د فلسطین ولس ډېر ځپل شوی دی؛ دا وینه تویونه له ډېر وخت راپدیخوا روانه ده. دا زمونږ دنده ده، چې د دې وینې تویېدو مخه ونیسو.

د اسرائیلو لومړي وزیر بنیامین نتنیاهو ویلي، چې د امریکا د دغه پرېکړه لیک له ویټو کولو څخه ډډه کول له خپل پخواني دریځ څخه «ښکاره شاتګ» دی او د اسرائیلو جګړې او د حماس له‌خوا تر اوسه د ۱۳۰ برمته شویو کسانو د خلاصون هڅې ته زیان رسوي.

د سپینې ماڼۍ ویاند جان کربي خبریالانو ته ویلي: زمونږ رای زمونږ په پالیسۍ کې د بدلون استازیتوب نکوي او هیڅ شي مو په پالیسۍ کې بدلون ندی کړی.

اسرائیلو د تېر کال د اوکټوبر د میاشتې له اوومې، چې د حماس تر برید لاندې راغلل او شاوخوا ۱۲۰۰ کسان یې ووژل شول؛ پر غزه بریدونه پیل کړل.

له هغه وخت راپدیخوا په غزه کې له ۳۲ زره او ۲۰۰ څخه ډېر فلسطینیان، چې ډېري یې ښځې او ماشومان دي وژل شوي او له ۷۴ زره او ۵۰۰ ډېر نور ټپیان دي.

Continue Reading

نړۍ

په هنګري کې سپورټي موټر ۱۲ نندارچيانو ته مرګ او ژوبله اړولې

Published

on

(Last Updated On: وری ۶, ۱۴۰۳)

د هنګري چارواکو څرګنده کړې، چې د دغه هېواد په شمال کې د سیالیو یو موټر له سړکه اوښتی؛ ۴ نندارچیان یې مړه کړي او ۸ نور ټپيان دي.

رویټرز د هنګري پولیسو د اوبپاڼې د څرګندونو له مخې په ډاګه کړې: پېښه د یکشنبې پر ورځ رامنځته شوی او تر دې دمه یې د اوښتو علت معلوم ندی.

د بېړنیو خدماتو ادارې Index.hu خبري سایټ ته ویلي، چې د پېښې ځای ته څو امبولانسونه او د ژغورنې چورلکې رسیدلې او د سیالیو جوړوونکیو سیالۍ درولي دي.

Index.hu راپور ورکړی، چې یو ماشوم په ټپي حالت کې روغتون ته وړل شوی، یو بل سخت ټپي شوی او شپږ نور لږ ټپیان دي.

Continue Reading

Trending

Copyright © 2022 Ariana News. All rights reserved!