په افغانستان کې د ایران سفارت د سوداګرۍ اتشې ويلي، د لمریز لېږدیز کال په لومړیو ۶ میاشتو کې دې هېواد ته د ایران غیرنفتي صادرات د ۲۵۴ میلیون ډالرو پر زیاتېدو ۱ میلیارډ او ۷۰ میلیون ډالرو ته رسېدلي دي.

د ایران سفارت د سوداګرۍ اتشې د څرګندونو له مخې؛ د تېر کال د همدې مودې پر پرتله د صادراتو دغه کچه ۳۱ سلنه زیاته شوې ده.

ایلنا خبري سرچینې راپور ورکړی، چې په دې موده کې د اوسپنې، فولادو، سمنټو، هګیو او کچالو په ګډون شاوخوا ۵۶۰ زره ټنه ایراني توکي افغانستان ته صادر شوي دي.

د ایران د سوداګرۍ د پراختیا ادارې مشر حسین روستایي په یوه مرکه کې ویلي، چې افغانستان ته د ایران د غیر نفتي صادراتو ارزښت ۲۵۴ میلیون ډالره او او وزن ۵۵۹ زره ټنه ډېر شوی دی. د ټولو صادراتو وزن  ۲ میلیون او ۵۲۳ زره ټنو ته رسېدلی، چې د تېر کال پر پرتله یې ۲۸ سلنه وده کړې ده.

د نوموړي د څرګندونو له مخې؛ له افغانستان څخه د ايران د وارداتو ارزښت هم څه باندې ٣٣ ميليون ډالرو ته رسېدلى، چې ١٩٢ سلنه زياتوالى يې موندلى او پر ټولیزه توګه په وارداتي توکو کې وربشي، جوار، ممپلي او مرچ راغلي دي.

د افغانستان لپاره د چين ځانګړي استازي يو شياویونګ د چين او افغانستان ترمنځ د ریلګاډي له سوداګري خبر ورکړ.

هغه په ایکس پاڼه کې لیکلي: دا د سوداګریزو محصولاتو لومړني ۵۵ واګونه دي، چې د شانګهای د شمال یوه کمربند او یوې لارې پروژې له مرکز نانټونګ څخه بار شوي او د افغانستان د حيرتان پولې ته روان دي.

د افغانستان لپاره د چین ځانګړي استازي او په بیجینګ کې د افغانستان د سفیر بلال کریمي په ګډون په یو لړ مراسمو کې د دې ریل‌پټلۍ د بیا پیلولو پرانسته وکړه.

تېره اوونۍ په کابل کې د چین سفیر اعلان کړی و، چې د روان کال تر پایه به چین ته د افغانستان سوداګریزو توکو پر صادراتو ګمرکي تعرفه لغو کړي.

د ریاست الوزراء اقتصادي مرستیالۍ د خپرې شوې خبرپانې له مخې؛  نن( سې‌شنبه د لړم اتمه ) د جوزجان ولایت په یتیم تاق سیمه کې له ۷۷‌ترکي شرکت سره د سيمنټو تولیدي کارخونې د جوړولو هوکړه لیک لاسلیک شو.

د دې هوکړې له مخې؛ ‌۷ ترکي شرکت به پدې کارخونه ۱۶۳ میلیون ډالر پانګونه کوي.

په دې مراسمو کې د ترکیې سفیر جنګ اونال دغه پروژه اړینه یاده کړې او وایي، خوښ دی، چې ترکي پانګوال په افغانستان کې پانګونه کوي.

هغه زیاته کړې؛ په افغانستان کې د دې پروژې پیل نورو ترکي شرکتونو ته د پانګونې یو ښه زیری دی.

د ریاست الوزراء د اقتصادي مرستیالۍ په څرګندونو کې دا هم راغلي؛ ترکي شرکت د سيمنټو د اکتشاف، استخراج، تولید او ټولنیزو خدماتو په برخو کې پانګونه کوي.

د یتیم تاق د سیمنټو کارخونه به له بشپړېدو وروسته پر ورځنۍ کچه ۳زره ټنه سیمنټو د تولید ترڅنګ ۱۲۰۰ کسانو ته هم د کار زمینه برابره کړي.

د یادونې ده، چې د کانونو او پټرولیم وزارت د سېمنټو په برخه کې د هېواد ځان‌بسیاینې لپاره له دې پروژې مخکې د شاوخوا ۴۷۶ میلیون ډالرو پر ارزښت د جبل السراج، کندهار او هرات سېمنټو پروژو قراردادونه له یو شمېر کورنیو او بهرنیو شرکتونو سره لاسلیک کړي دي.