تازه خبرونه
له ۱۰۰ ډېرو بهرنیو پانګوالو د پانګونې جوازونه تر لاسه کړي
د صنعت او سوداګرۍ وزارت مسوولینو ويلي، چې له تېر یوه کال راپدیخوا یې څه باندې ۱۰۰ بهرنیو پانګوالو ته د پانګونې جوازونه ورکړي دي.
د صنعت او سوداګرۍ وزارت مسوولین وايي، چې د تېر کال د ورته مودې پر پرتله يي په روان کال کې له څلور برابو ډېرو بهرنیو پانګوالوته په افغانستان کې د پانګونې د تر سره کولو جوازونه ورکړي. که څه هم د افغانستان د صنعت او سوداګرۍ وزارت دانه وايي، چې د کوموهېوادونو پانګوالو ته یې د پانګونې ډېر جوازونه ورکړي دي.
دوی زیاتوي؛ بهرني پانګوال غواړي، چې د هېواد په بېلا بېلو برخو کې پانګونه تر سره کړي.
د صنعت او سوداګرۍ وزارت زیاته کړې؛ دوی هڅه کوي، چې له لویو بهرنیو شرکتونو سره په افغانستان کې د پانګونې تعاملات ولري، چې د هېواد په اقتصادي سکتور کې ژور مثبت بدلون رامنځته شي.
د صنعت او سوداګرۍ وزارت ویاند جواد دبیر وایي: مونږ د تېر کال د ورته مودې پر پرتله څلور برابره ېر جوارونه ورکړي او غواړوو له لویو بهرنیو شرکتونو سره په افغانستان کې د پانګونې تعاملات ولرو. د کوچنیو شرکتونو پر پرتله لویو ته لومړیتوب ورکوو.
بل لور ته د افغانستان افغان ویست شرکت مسوولین بیا د صنعت او سوداګرۍ وزارت پدې هڅه نیوکه کوي او څرګندوي، چې د صنعت او سوداګرۍ وزارت باید کورنیو پانګوالوته آسانتیاوې زیاتي کړي، چې افغان پانګوال په هېواد کې پانګونه ترسره کړي.
د افغان ویست شرکت عمومي مشر شېرباز کمین زاده ویلي: زما له نظره باید د افغانستان د صنعت او سوداګرۍ وزارت پر کورنیو پانګوالو ډېر راوڅرخي؛ ځکه، چې کورني پانګوال کولی شي په هېواد کې د بهرنیو پر پرتله ډېره ښه پایله ورکړي.
اقتصادي کارپوهان هم له صنعت او سوداګرۍ وزارته غوښتنه کوي؛ هڅه دې وکړي، چې د بهرنیو پرځای دې افغان پانګوالو ته ډېرې آسانتیاوي برابرې کړي او بهرني شرکتونه دې هم د ګډې پانګونې لپاره وهڅوي، چې د ناکامۍ وېره راټیټه شي.
