د خوړو نړیوال پروګرام اعلان کړی، چې په افغانستان کې له هرو څلور کورنیو څخه درې یې د خوراکي توکو د ترلاسه کولو لپاره پور اخلي.

د یاد پروګرام د څرګندونو له مخې؛ سږ کال په افغانستان کې د خوراکي توکو د تر لاسه کولو لپاره د کورنیو پور منځنۍ کچه ۳۸ زره ۲۰۰ افغانۍ ده.

د خوړو نړیوال پروګرام خبرداری ورکړی؛ د ژمي موسم راروان دی، چې په هرو څلور کورنیو کې یوه به د کافي خوراکي توکو د ترلاسه کولو توان ونلري.

دغه بنسټ زیاته کړې، چې د کورنیو وروستۍ هیله د خوړو نړیوال پروګرام دی؛ خو دغه اداره په راتلونکیو شپږ میاشتو کې ۶۸۰ میلیون ډالرو ته اړتیا لري.

تېره ورځ د خوړو نړیوال پروګرام اعلان وکړ، چې سږ کال یې په ټول افغانستان کې له ۱۰ اعشاریه ۵ میلیون وګړو سره نغدي او خوراکي مرستې کړې دي.

ویل کیږي، چې د خوړو نړیوال پروګرام دغه مرستې د ماشومانو د سالمې تغذیې، د سیمه‌ییز اقتصاد او ټولنې د پیاوړتیا لپاره ترسره شوې دي.

د امریکا ټاکل شوي ولسمشر ډونالډ ټرمپ د تحقیقاتو فدرالي ادارې (FBI) د نوي مدیریت لپاره خپل غوراوی اعلان کړ.

ډونلډ ټرمپ په ډاګه کړې، چې د FBI د راتلونکي رییس په توګه یې د کاش پټل د نومولو پرېکړه کړې ده.

ټرمپ په خپله ټولنیزه شبکه کې لیکلي؛ ویاړم، چې ۴۴ کلن کش پټل به د تحقیقاتو فدرالي ادارې د راتلونکي رییس په توګه دنده ترسره کړي.

دغه راز د FBI اوسنی رییس کریسټوفر ری باید له دندې ګوښه شي او یا ووځي.

کریسټوفر په ۲۰۱۷ کال کې د ټرمپ لخوا دغه مقام ته ټاکل شوی و او د خپلې لس کلنې دورې درې کاله یې پاتې دي.

پټل، چې هندي نژاد دی؛ د ټرمپ په لومړي پېر کې یې غوښتي وه، چې د FBI د استخباراتو راټولولو هڅې ودروي او له هر هغه کارمند څخه یې پاکه کړي، چې د ټرمپ د اجنډا ملاتړ نه‌کوي.

هغه د اف‌بي‌آى د ریاست د ترلاسه کولو لپاره د امریکا د مشرانو جرګې تصویب ته اړتیا لري.

دا په داسې حال کې ده، چې ډونلډ ټرمپ د ری د ماموریت پر مهال په پنسلوانیا کې د ټاکنيزو کمپاینونو پر مهال د وژونکي برید هدف وګرځېد او پر غوږ ټپي شو.

په کابل کې د ترکیې سفیر جنګ اونال د بهرنیو چارو وزارت له چارسمبالي امیر خان متقي سره په لیدنه کې ویلي؛ انقره له افغانستان سره د اړیکو په اړه مثبت نظر لري او هیله ده، چې په ډیپلوماټیکو اړیکو کې به د دواړو هېوادونو ترمنځ ډېر نور پرمختګ رامنځته شي.

د بهرنیو چارو وزارت وايي، امیر خان متقي  او جنګ اونال د کابل او انقرې ترمنځ پر سیاسي او اقتصادي اړیکو خبرې وکړې.

امیرخان متقي د دواړو هېوادونو ترمنځ د ډيپلوماټيکو اړيکو اوسنی حالت مثبت و ارزاوه او هيله يې څرګنده کړه، چې دواړه لوري ډېر نور رغنده ګامونه پورته کړي.

د بهرنیو چارو وزارت د ویاند مرستیال ضیا احمد تکل د څرګندونو له مخې؛ په کابل کې د ترکيې سفارت چارسمبالي ويلي، انقره له افغانستان سره د اړيکو په اړه "مثبت نظر" لري او هيله ده، چې د کابل او انقرې ترمنځ ډيپلوماټيکې اړيکې نور پرمختګ هم وکړي.

د بهرنیو چارو وزارت چارسمبالي همدارنګه د ترکیې په حلال نندارتون کې د افغان پلاوي له ګډون هرکلی وکړ.

د افغانستان د صنایعو او سوداګرۍ وزارت سرپرست په ترکیه کې دی او له خپل ترکي سیال سره یې د حلال په نندارتون کې د ګډون ترڅنګ د دوه اړخیزې رغنده سوداګرۍ په اړه خبرې کړې دي.

ترکیه که څه هم د نورو هېوادونو په څېر اسلامي امارت پر رسمیت نه‌پېژني؛ خو له درې کلونو راپدېخوا له اسلامي امارت سره ښې سیاسي او اقتصادي اړیکې لري.