له روسیې سره مو د اړیکو پراختیا یو لومړیتوب دی – پزشکیان

د ایران دولتي رسنیو راپور ورکړی، چې د ایران ولسمشر مسعود پیزشکیان د دوشنبې پر ورځ د زمري پېنځلسمه د کرملین د مشر ولادیمیر پوتین یوه جګپوړي متحد سره په خبرو کې ویلي؛ تهران هوډ لري، چې له خپل ستراتیژیک ملګري روسیې سره اړیکې پراخې کړي.

د ایران ولسمشر مسعود پزشکیان د روسیې د ملي امنیت شورا له عمومي منشي سرګي شویګو سره په کتنه کې روسیه یو ستراتیژیک ملګری وباله او په دې اړه څرګندوي؛ له روسیې سره د اړیکو پراختیا د ایران د بهرني سیاست یو لومړیتوب دی.

د رویټرز خبري اژانس د راپور له مخې، د روسیې د امنیت شورا منشي سرګي شویګو د ایران له ولسمشر او لوړ پوړو امنیتي چارواکو سره په داسې حال کې وکتل، چې اسلامي جمهوریت د حماس د یوه مشر د وژل کېدو په اړه خپل غبرګون وښود.

د ایران دولتي رسنیو راپور ورکړی، چې روسیه هغه هېواد دی، چې په سختو وختونو کې د ایران د ملت تر څنګ ولاړ دي.

د ایران ولسمشر پزشکیان ویلي، د څو قطبی نړۍ د ودې په برخه کې د ایران او روسیې ګډ دریځونه به د نړیوال امنیت او سولې لامل شی.

روسیې تېره اوونۍ په ایران کې د فلسطین د اسلامي غورځنګ حماس د مشر اسماعیل هنیه وژنه غندلې او پر ټولو خواوو یې غږ کړی، چې په منځني ختیځ کې د پراخې سیمه‌ییزې جګړې مخه ونیسي.

له سرګي شویګو سره په کتنه کې پزشکیان ویلي، چې په غزه کې د اسرائیلو جنایي کړنې او د هنیه وژنه له ټولو نړیوالو قوانینو او مقرراتو څخه د سرغړونې ښکاره بېلګه ده.

شویګو په تېر می کې د هېواد امنیت شورا ته له ټاکل کیدو مخکې د روسیې دفاع وزیر و.

د راپور له مخې: که څه هم پوتین تر اوسه په منځني ختیځ کې د وروستیو تاوتریخوالو په اړه څه ندي ویلي؛ خو لوړپوړو روسي چارواکو ویلي؛ د هنیه د وژلو تر شا هغه کسان دي، چې په منځني ختیځ کې د سولې هر ډول هیلې له منځه وړي او امریکا په دې اړه پوره ښکېله ده.

ایران اسرائیل تورن کړی او ګواښلی دی؛ خو اسرائیلي چارواکو د برید پړه پر غاړه نده اخیستې.

روسیې د اوکراین د جګړې له پیل راپدېخوا له ایران سره نږدې اړیکې ټینګې کړي او ورسره د پراخو همکاریو تړون لاسلیکولو ته چمتووالی نیسي.

رویټرز د ایران او روسیې د اړیکو په اړه د روان کال په فبرورۍ کې لیکلي، چې ایران روسیې ته له ځمکې څخه ځمکې ته ویشتونکي لوی شمېر ځواکمن بالیسټیک توغندي ورکړي دي.

د امریکا بهرنیو چارو وزارت ویاند مټیو میلر په تهران کې د شویګو خبرو ته په نغوته او اشاره کې ویلي، امریکا دا تمه نلري، چې روسیه به د منځني ختیځ د کړکېچ په کمولو کې ګټور رول ولوبوي.

میلر زیاته کړې، چې واشنګټن د خپلو ډیپلوماټیکو اړیکو له لارې هېوادونه هڅوي، چې ایران ته ووایي؛ په منځني ختیځ کې کړکیچ د تهران په ګټه ندی.

امریکا د جون په میاشت کې ویلي وه؛ داسې ښکاري، چې روسیه له ایران سره خپله دفاعي همکاري ژوره کوي او په سلګونه یو طرفه برید کوونکې څارګرې الوتکې یې ترلاسه کړي، چې پر اوکراین د برید لپاره یې کاروي؛ خو مسکو دا څرګندونې رد کړې دي.