د پاکستان د جمعیت علمای اسلام مشر مولانا فضل الرحمن ويلي، چې د ترهګرۍ وده د پاکستان د حکومت د تېروتنو پایله ده.

د افغانستان او پاکستان ترمنځ په روان کړکېچ کې د پاکستان د جمعیت علمای اسلام مشر مولانا فضل الرحمن له اسلام‌آباد څخه وغوښتل، چې په افغانستان کې له اسلامي امارت سره د احتمالي شخړې په وړاندې له احتیاط څخه کار واخلي.

هغه د پاکستاني چارواکو د وروستیو څرګندونو په حواله وویل چې جګړه د افغانستان او پاکستان په ګټه نه ده.

فضل الرحمن زیاته کړې، چې د ترهګرۍ وده د پاکستان د حکومت د تېروتنو پایله ده.

نوموړي وایي: “دا، چې آیا له افغانستان سره د جګړې خطر شته، ډېر فکر ته اړتیا ده. دا جګړه نه د افغانستان په ګټه ده او نه هم د پاکستان په ګټه. مونږ په افغانستان کې د سولې او امنیت لپاره یوې جامع ستراتیژۍ ته اړتیا لرو او واکمنان باید دا مسلې په پام کې ونیسي او ټول سیاسي ګوندونه په پرېکړه کولو کې شامل کړي.”

دغه راز تېره ورځ د خیبر پښتونخوا اعلی وزیر علی امین ګنډاپور ویلي وه، چې له افغان چارواکو سره خبرې اترې په دې ایالت کې د سولې د ترلاسه کولو یوازنۍ شونې لار ده.

ګنډاپور وایي”طالبان نشي کولی، چې له قومي مشرانو سره له خبرو اترو انکار وکړي. هغوی د خبرو اترو میز ته راولي. زه دا مهال له طالبانو سره هیڅ اړیکه نلرم؛ خو که ماته مسوویت راکړ شي؛ مونږ به دا دنده بشپړه کړو. مونږ باید له طالبانو سره د خبرو اترو میز ته کښینو او له هغوی سره خبرې وکړو. دا یوازنۍ حل لار ده.”

د سیاسي چارو شنونوکي په دې باور دي، چې پاکستان د افغانستان په اړه یو واحد دریځ نلري او تل د مسلو په اړه دوه ګونی چلند لري.

اسلامي امارت تل له پاکستان سره د دوه اړخیزو مسایلو په اړه له خبرو اترو هرکلی کړی؛ خو باور لري، چې په پاکستان کې د ناامنۍ رېښه په هغه هېواد کې ده. دا په داسې حال کې ده، چې د پاکستان ځانګړی استازی هم کابل ته راغلی او د اسلامي امارت له چارواکو سره یې د سوداګرۍ او ټرانزیت په اړه خبرې اترې وکړې.

بیات بنیاد په بلخ ولایت کې لسګونو اړمنو کورنیو ته د اوړو، وریجو او غوړیو لرونکو خوراکي توکي ووېشل.

په بلخ کې د بیات بنیاد چارواکو ويلي، چې د مرستو دا لړۍ  به د هېواد په نورو ولایتونو کې د روژې د مبارکې میاشتې تر پایه روانه وي.

په بلخ کې د بیات بنیاد استازی یافث ثاقب وايي: “د بیات بنیاد د مرستو په لړ کې دا ځل مونږ په مزار شریف ښار کې د روژې مناسبتي مرستې ووېشلې، چې اوړه، وریجې او غوړي په کې دي او ان شاء الله دا مرستې به رونانې وي.”

دغه راز له مرستو برخمن د مرستو له وېش هرکلی کوي او وايي، چې بیات بنیاد د بېوزلو او اړمنو خلکو ته د مرستو رسولو او د فقر په کمولو کې مهم رول لوبولی دی.

عین الدین نومی اړمن وايي: “مونږ ډېر خوشحاله یوو.” د روژې میاشت ده. ” خدای دې له هغه چا سره مرسته وکړي، چې زمونږ غریبانو ته مرستې راکوي.”

زرمینه، چې یوه اړمنه ده وايي: “زه پخپله د کور چارسمبالی( سرپرست) نلرم. زه د پنجشنبې پر ورځ له کوره وځم او د پیپسي ډبي راټولوم، چې خپلو ماشومانو ته ډوډۍ پیدا کړم.”

دا مرستې په داسې وخت کې وېشل کیږي، چې ځینو نړیوالو ټولنو په دې وروستیو کې د بېوزلۍ له زیاتوالي خبرداری ورکړی دی.

د ریاست‌الوزراء اقتصادي مرستیال ملا عبدالغني برادر آخوند نن( د وري درېیمه) د کابل ولایت پغمان ولسوالۍ د ارغندۍ ټرانسپورټي ترمینل د چارو د پيل پرانیسته وکړه.

د ریاست الوزراء د اقتصادي مرستیالۍ د خبرپاڼې له مخې:  د ریاست‌الوزراء اقتصادي مرستیال په هېواد کې د ټرانسپورټي بنسټونو د پراختیا په برخه کې د ارغندۍ ټرانسپورټي ترمینل جوړول مهم وبلل او په دې اړه څرګندوي: د ټرانسپورټي بېخبناوو معیاري رغول او پراخول د یو هېواد د اقتصادي ودې، پرمختګ او د داخلي او سیمه‌ییز اتصال لپاره ډېر مهم او بنسټیز ګام ګڼل کېږي.

د نوموړي د څرګندونو له مخې؛ له بده مرغه په هېواد کې د لسیزو جګړو او فساد له کبله دې مهمې برخې ته پام ندی شوی؛ بلکې په دې برخه کې شته بنسټونه د ټیټ کیفیت له کبله تخریب شوي، عامه ملکیتونه د اشخاصو له لوري غصب او د لویو لارو او سړکونو حریمونه کوچني شوي دي.

ملا برادر آخوند د معیاري ټرانسپورټي بېخبنا ارزښت ته په نغوته کې ویلي؛ پر ټرانسپورټي او مواصلاتي بنسټونو پانګونه، د غصب شویو عامه ملکیتونو بېرته استرداد، د سړکونو او لارو د اصلي حریم تشخیصول او رغول د افغانستان اسلامي امارت یو له اساسي او مهمو ملي موخو څخه ګڼل کېږي.

نوموړي ویلي: د ارغندې ټرانسپورټي ترمینل لپاره  ۴۲ مهم تاسیسات جوړېږي.

د یادونې ده، چې د کابل ولایت د ارغندۍ ټرانسپورټي ترمینل په  شاوخوا ۹۰۰ جریبه ځمکه کې د یو میلیارډ او ۲۸۵ میلیون افغانیو پر لګښت جوړېږي، چې چارې به یې د خصوصي سکټور له لوري په دوه کلونو کې بشپړې شي.