تازه خبرونه
طالبان د ټول پنجشېر د نیولو او احمد مسعود یې د ردولو ادعاوې کوي
په خواله رسنیو کې خپرې شوې ویډیوګانو ښیي، چې طالبان د پنجشېر ولایت ودانۍ مخې ته ولاړ او خپل رپی یې پرې رپولی؛ احمد مسعود، چې له طالبانو سره د وسلوال مقاومت رهبري کوي، د پنجشیر نیول ردوي او وايي، چې اوس هم په ځينو سیمو کې جګړې روانې دي.
احمد مسعود له خلکو غوښتي، چې د طالبانو پر وړاندې ملي پاڅون وکړي.
په پنجشېر ولایت کې تېره شپه د احمد مسعود د پلوي وسلوالو پر وړاندې د طالبانو بریدونو زورواخیست. طالب چارواکو ویلي: نن د وږي ۱۵ سهار مهال ۷ بجې او ۲۰ دقیقې د پنجشیر پر مقام د امارت رپی ( بیرغ ) ورپول شو او په نورو سیمو کې چاڼیز عملیات روان دي.
طالب ویاند ذبیح الله مجاهد په یوه ټویټ کې په ډاګه کړې، چې په هېواد کې د بشپړ امنیت پر لوري وروستیو هڅو هم پایله ورکړه او د پنجشېر ولایت پوره د اسلامي امارت تر کنترول لاندې راغی.
د نوموړي د څرګندونو له مخې؛ په یاد ولایت کې یو شمېر نامسووله وسلوال وځپل شول او پاتې نور وتښتېدل.
نوموړي زیاته کړې؛ د پنجشیر له نیولو سره د دې ولایت مظلوم او باعزته ولس د وسلوالو له شره خلاص شو.
مجاهد دا ډاډ هم ورکړی، چې د پنجشېر له شریف ولس او خلکو سره به هيڅ ډول توپيري چلند نکیږي؛ ټول زمونږ وروڼه دي، د یوه هېواد او یوه هدف لپاره به مشترک خدمت کوو.
د افغانستان ګاونډي هیواد ایران په پنجشیر د طالبانو برید غندلی دی او ویلي یې دي چې په پنجشیر د طالبانو په برید کې د ځينو هیوادونو د ښکیلتیا موضوع څيړي.
دغه راز د احمد مسعود په رهبرۍ وسلوال دا نه مني، چې ګڼې د پنجشېر ولایت په بشپړه توګه د طالبانو لاس ته لویدلی دی.
د طالبانو پر وړاندې د وسلوال خوځښت مشر احمد مسعود په یوه غږیز پیغام کې ویلي، چې د یکشنبې پر شپه په نښتو کې د ده د کورنۍ د غړیو په ګډون څو کسان وژل شوي.
دی له خلکو غواړي، چې د طالبانو پر ضد ملي قیام وکړي او دوی یې ملاتړ کوي.
د پنجشیر جګړه پېچلې شوې ده. ان تر دې، چې ادعا کیږي پاکستان په دې جګړه کې ښکېل دی.
ایران هم د اړوند جګړې په اړه غبرګون ښودلی او څرګنده وي، چې د پنجشیر په جګړه کې د پاکستان ښکېلتیا باید و څېړل شي.
د ایران د بهرنیو چارو وزارت ویاند سعید خطیب زاده ویلي: له پنجشېره، چې څه تر لاسه کیږي حیرانووونکي دي او مونږ بهرنۍ لاسوهنې تر څېړنو لاندې نیولي دي.
د یکشنبې په جګړه کې د احمد مسعود د وسلوال مقاومت ویاند فهیم دشتي او جنرال داود زره هم وژل شوي دي.
د حمد مسعود جبهه ادعا کوي، چې دا کسان د پاکستان په هوايي بریدونو کې وژل شوي دي.
طالب ویاند ويلي، چې دا کسان د احمد مسعود د جبهې د خپلمنځي اختلافونو په لړ کې د رامنځته شوې وسلوالې شخړې په پایله کې وژل شول دي.
د سیمې خلک وايي، چې طالبانو له څو ورځو راپدیخوا د پنجشېر لاره تړلې او هیڅ ډول خوراکي توکو ته اجازه نه ورکول کیږي او ټیلفوني اړیکې یې هم پرې شوي دي.
طالبان وايي، چې د پنجشېر له نیولو سره سم د والي په ګډون ټول اداري پرسونل د همدې ولایت خلک دي او ډېر ژربه دې ولایت ته لارې پرانیزی او هلته به ورځنۍ چارې عادي حالت ته راوګرزي.
تازه خبرونه
د ازبکستان بشري مرستې بلخ ته راورسېدې
نن پنجشنبه ( د غویي شپږمه ) له ازبکستان څخه د بشري مرستو یوه ټولګه د بلخ په سوداګریز بندر حیرتان کې د دې ولایت سیمهییزو چارواکو ته وسپارل شوه.
د سیمهییزو چارواکو د څرګندونو له مخې؛ په دغو مرستو کې ۶۰ ټنه خوراکي توکي( اوړه، غوړي، غنم، بوره او غوښه ) شته، چې د ازبکستان د سرخاندریا د والي لهخوا د بلخ چارسمبالي والي ته سپارل شوې ده.
د سرخاندریا والي د دغو مرستو موخه د افغانستان له خلکو ملاتړ یاد او د دواړو هېوادونو ترمنځ يې د ښو اړيکو پر پراختيا ټينګار څرګند کړ.
په تېرو دوه کلونو کې دا څووم ځل دی، چې ازبکستان افغانستان ته دا ډول مرستې را لیږي.
کابل او تاشکند دا مهال ښې اقتصادي او سیاسي اړیکي لري او دا دواړه هېوادونه په پام کې لري، چې په روان کال کې د افغان ټرانس د اوسپنې پټلۍ کار هم پیل کړي.
تازه خبرونه
په سیمه او هېواد کې امنیتي پېښې وارداتي دي – امیر خان متقي
نن پنجشنبه ( د غویی شپږمه ) د اسلامي امارت بهرنیو چارو وزارت چارسمبالي امیرخان متقي د افغان-قزاق نندارتون د پرانیستې په مراسمو کې د افغانستان او سیمې امنیتي پېښې وارداتي یادې کړې دي.
نوموړي په دې اړه په خپلو خبرو کې ویلي: متاسفانه زمونږ درې ګاونډي هېوادونه په نوبت سره؛ په یوه هېواد کې د داعش لپاره بشري قوه او افراد تیاریږي؛ مونږ او تاسې ولیدل، چې د نړۍ په بېلابېلو برخو کې یې پېښې تر سره کړې.
بل هېواد د هغې لارې پر سر پروت دی، چې امن خرابوونکي افراد ترې راتېریږي.
او بل هېواد بیا په خپله خاوره کې دوی ته د مرکزیت، د تمویل او پلان جوړونې مراکز ورکړي دي. که دا درې هېوادونه خپل مسوولیت ادا کړي؛ په افغانستان او سیمه کې هیڅ مشکل نشته.
ویل کیږي، چې بد امني پر ګډه همکارۍ او همغږۍ له منځه وړل کیږي.
تازه خبرونه
له اسلامي امارت سره نړیوالې اړیکې ورځ تر بلې پراخیږي – ذبیح الله مجاهد
د اسلامي امارت ویاند ذبیح الله مجاهد افغانستان ته د ګڼشمېر ډیپلوماټیکو استازو راتګ او نورو هېوادونو ته د افغان لوړ پوړیو چارواکو سفرونو ته په نغوته کې ويلي، چې اسلامي امارت په پراخه کچه منل شوی؛ اړیکې ورسره خوندي او لیدنې یې روانې دي.
ذبیح الله مجاهد زیاته کړې؛ له اسلامي امارت سره د نړۍ د هېوادونو اړیکې ورځ تر بلې پراخېږي او اغېزمنتیا یې مخ پر ډېرېدو ده.
د اسلامي امارت ویاند ټینګار کړی: د ځینو خلکو او کړیو دا تصور، چې افغانستان انزوا ته تلی او اقتصاد یې مخ پر خرابېدو دی او له نورو هېوادونو سره یې اړیکې نشي خوندي کېدی؛ ټول دروغ ثابت شول.
د نوموړي د څرګندونو له مخې؛ اوس څرګنده شوه، چې افغانستان له سیاسي او اقتصادي پلوه د ودې او پراختیا پر لوري چټک ګامونه اخلي او دا هڅې به نورې هم ګړندۍ شي.
-
تازه خبرونه2 days ago
وروستیو سیلابونو په افغانستان کې ۱۵۰۰ کورنیو ته زیانونه رسولي
-
نړۍ4 days ago
د جاپان دوه پوځي چورلکې بحر ته وغورځېدې
-
تازه خبرونه4 days ago
د پاکستان سرحدونو وزیر د افغان کډوالو پر باعزته ستنېدا ټینګار وکړ
-
نړۍ2 days ago
د مالیزیا بحري ځواکونو د چورلکو په ټکر کې ۱۰ کسان مړه شول
-
لوبی3 days ago
عینو مېنې، استقلال کابل او اټکانرژي فوټبال لوبډلې، خدیم افسي مات کړل
-
تازه خبرونه2 days ago
راشد خان د افغان بیسیم سوداګریز سفیر شو
-
لوبی2 days ago
د موج ساحل لوبغاړي د جوانان واحدي لوبډلې پر وړاندې زړهراکښونکی ګول ترسره کړ
-
سیمه ییز خبرونه3 days ago
د ایران ولسمشر پر درې ورځني سفر پاکستان ته ولاړ