طالبان دې د هېواد له ورانولو او د خلکو له وژلو ډډه وکړی- محب

د افغانستان د ملي امنیت شورا سلاکار حمدالله محب له طالبانو غوښتي، چې د خلکو له وژلو دې ډډه وکړي او هېواد دې نه ورانوي.

نوموړي دغه څرګندونې تېره ورځ ننګرهار ولایت ته په سفر کې خلکو ته وړاندې کړې او ترې غوښتنه وشوه، چې له ملي امنیتي ځواکونو دې خپل ملاتړ څرګند کړي.

هغه د ننګر هار سیمه ییزو چارواکو ته ویلي؛ دښمنان دې ان په پټنځیو کې هم تر بریدونو لاندې راولي، چې عام وګړي او عامه ودانۍ ترې خوندي پاتې شي.

نوموړي کونړ او لغمان ولایتونو ته هم سفر وکړ او د پاکستان د توغندیو پر توغولو یې خپلې اندېښنې په ډاګه کړې دي.

د ملي امنیت شورا سلاکار حمد الله محب ګواښ کړی، چې دغه توغندیز بریدونه به بې ځوابه پاتې نشي او پاکستانیانو ته به هم د افغانستان په خاوره کې د ودانیو د جوړولو اجازه ورنکړ شي.

دا په داسې حال کې ده، چې ولسي جرګې تېره ورځ د کورنیو چارو وزارت چارسمبالی د پاکستان له خاورې د توغندیو د توغولو په اړه دې جرګې ته غوښتل شوی و.

ولسي جرګې ویلي، چې پاکستان په تېرو وروستیو کلونو کې ۱۳۰۰۰ توغندي د افغانستان پر خاوره توغولي دي.

تېره اوونۍ په دغو توغندیزو بریدونو کې د کونړ ولایت ۸ هېواد وال وژل شوي دي.

سیمه ییزو چارواکو ویلي؛ د افغان او پاکستانیو ځواکونو تر منځ هغه مهال نښته هم شوې، چې پاکستان غوښتل له پولې دې غاړه خپلې ودانیزې چارې تر سره کړي.