نړۍ
شمالي کوریا د کروز توغندیو نوې بڼه وکاروله
د شمالي کوریا دولتي ټلویزیون په ډاګه کړې، چې هېواد یې د لرې واټن ویشتونکي کروز توغندي نوې بڼه بریالۍ کارولې ده.
شمالي کوریا دا کارول شوی نوی توغندی یوه ستراتیژیکه بریا او مهمه وسله بولي.
د راپورونو له مخې؛ دغه توغندي د شمالي کوریا له خاورې او ځمکنیو اوبو څخه پر تېرېدو د ۱۵۰۰ کیلومټرو په واټن کې خپله موخه ویشتلې ده.
امریکا د دغو توغول شویو توغندیو په اړه غبرګون ښودلی او وایي، چې په اړه یې بحثونه روان دي.
دا په تېرو شپږ میاشتو کې د شمالي کوریا لومړنۍ توغول شوې آزموینه ده.
کروز هم بالسټیک توغندیو ته ورته د ځمکې له هوا نه وځي.
شمالي کوریا له ۲۰۱۷ کال راپدیخوا د بالسټیک او اټومي توغندیو آزموینه نده کړې.
دغه هېواد د خپلو اتومي او توغندیزو فعالیتونو له کبله له نړیوالو بندیزونو سره مخ شوی دی.
امریکا او شمالي کوریا د اټومي فعالیتونو په اړه بحث او خبرې کړي؛ خو تر دې دمه کومې پایلې ته رسېدلي ندي.
