رویال چلینجرز بنګلور (آر سي بي RCB) لوبډلې د ټاټا ۲۰۲۵ IPL  سیالیو پیل پر اورلوبه وکړ او ورسره د دې سیالیو زړه‌راکښونکی پړاو پیل شو.

د هند غوره لیګ په لومړۍ لوبه کې رویال چلنجرز بنګلور د کلکتې نایټ رایډرز ته د ۷ ویکټو پر توپیر ماتې ورکړه.  

د راجاټ پټیدار پر مشرۍ لوبډلې په اته‌لسمم اوور کې پر ۲۲ توپونو ۱۷۵ منډې جوړې کړې.

ویرات کوهلي، چې د ټاټا آی پي ایل په تاریخ کې تر ټولو زیاتې منډې جوړونکی لوبغاړی دی؛ په ۲۰۲۴ کال کې یې له هغه ځایه لوبه پیل کړه، چې پریښې یې وه. د فیل سالټ (۵۶ په ۳۱ توپونو) سره د یوې غوره پرانیستونکې ملګرتیا وروسته په ۵۹ منډو ناسوځېدلی پاتې شو.

د یکشنبې پروګرام

سنرایزرز حیدرآباد به د یکشنبې پر ورځ د وري درېیمه / د مارچ درویشتمه د حیدرآباد په راجیو ګاندي نړیوال لوبغالي کې له راجستان رویالز سره مخ شي.

دا لوبه به د افغانستان پر وخت د ماسپښین پر دوه بجو د آریانا ټلویزیون له لارې پر ژوندۍ بڼه خپره شي.

د ورځې په دوه‌یمه لوبه کې چینای سوپر کینګز به د چینای په ایم اے چیدامبرم لوبغالي کې له ممبۍ انډینز سره مخ شي.

د دې لوبې ژوندۍ خپرونه به د ماښام پر ۶:۱۵ له آریانا تلویزیون څخه پیل شي.

د دې سیالیو په اړه د معلوماتو لپاره د آریانا ټلویزیونATN  او آریانا نیوز ATNN  ټولنیزو رسنیو پاڼې وګورئ.

هند کرکټ لوبډلې د نیوزلینډ لوبډلې ته په پایلوبه کې د څلور ویکټو پر توپير ماته ورکړه او د ۲۰۲۵ کال کرکټ اتلانو جام اتلولي یې وګټله.

د کرکټ اتلانو جام د پایلوبې پچه د نیوزلینډ لوبډلې وګټله او لومړی یې د توپ‌وهنې پرېکړه وکړه.

د نیوزلینډ لوبډلې د پنځوس اورونو په لوبولو او د ۷ ویکټو پر زیان د هند لوبډلې ته د ۲۵۲ منډو هدف وټاکه.

په توپ‌وهنه کې د نیوزلینډ پر ګټه ډاریل میچل ۶۳، مایکل بریسول ۵۳، راچین راوینډرا ۳۷ او ګلین فیلیپس ۳۴ تر نورو لوبغاړو ډېرې منډې جوړې کړې.

د هند لوبډلې د سیالې لوبډلې له لوري وړاندې کړی هدف د لوبډلمشر روهیت شرما د ۷۶، شریاس ایېر ۴۸، کې اېل راهول ۳۴ او شوبمان ګېل د ۳۱ منډو پر مټ د لوبې په وروستې اور کې پوره او د اتلانو جام اتلولي یې خپله کړه.

د هند لوبډلې له ۱۲ کلونو وروسته د کرکټ اتلانو جام اتلولي وګټله.

هند په ۲۰۱۳ کې هم د اتلانو جام اتلولي ګټلې وه.

د روهیت شرما په لوبډلمشرۍ کې ۲۰۲۴ او ۲۰۲۵ کلونه د هند د کرکټ لوبډلې لپاره له لاسته راوړنو ډک وو.

هند د ۲۰۲۴ کال د شل اوریزو لوبو نړېوال جام اتلولي هم په خپل نوم کړې ده.

دا په داسې حال کې ده، چې د هند لوبغاړي ویرات کوهلي د اتلانو جام د نه ماتېدونکي کمپاین لپاره له خپلو ملګرو ستاینه وکړه او د ۲۰۲۵ کال د اتلانو جام د بریالي ماموریت په بېلابېلو پړاوونو کې یې داډمن ګامونه پورته کړي دي.

د اتلانو جام کرکټ سیالیو په لړ کې د دوشنبې پر ورځ (د کب شپږمه)، بنګله دېش د نیوزیلینډ د کرکټ ملي لوبډلې پر وړاندې د ۵ ویکټو پر ماتې وخوړه او د دې لوبې په پایله کې د پاکستان ملي لوبډله، چې د جام کوربه وه؛ له سیالۍ څخه وایستل شوه.

په دې لوبه کې، چې په راولپنډۍ کې ترسره شوه؛ د بنګله دېش لوبډلې لومړی توپ‌وهنه وکړه او په ټاکلو ۵۰ اورونو کې یې د ۹ لوبغاړو پر سوځېدو ۲۳۶ منډې جوړې کړې.

نیوزیلینډ یاد هدف په ۴۶.۱ اورونو کې د ۵ لوبغاړو پر سوځیدو پوره کړ او د اتلانو جام نیمه پایلوبې ته یې لار پیدا کړه.

که بنګله دېش پرونۍ لوبه ګټلې وای؛ نو پاکستان به د پرمختګ لپاره لږ چانس درلود، خو د دوی له ماتې سره د کوربه لوبډلې وروستۍ هیله هم له منځه لاړه او دواړو لوبډلو له اتلانو جام سره مخه ښه وکړه.

د بنګله دېش لپاره نجم الحسین شانټو ۷۷ او جاکر علي ۴۵ منډې وکړې.

د نیوزیلینډ لوبډلې ټاکل شوی هدف په ۴۷ اورونو کې بشپړ کړ، چې یوازې پېنځه لوبغاړي یې له لاسه ورکړي وه.

د نیوزیلینډ لپاره راچین راوینډرا ۱۱۲ او ټام لټام ۵۵ منډې جوړې کړې.

له دې بریا سره له A ګروپ څخه د هند او نیوزیلینډ لوبډلو بل پړاو ته ولاړل.

که څه هم په دې ګروپ کې د پاکستان او بنګله دېش، هند او نیوزیلینډ ترمنځ سیالي اوس هم پاتې ده؛ خو پایلې یې پدې اغېزه نلري، چې دا لوبډلې راتلونکي پړاو ته لاره پیدا کړي.

ټاکل شوې، چې افغانستان د چارشنبې پر ورځ د دې سیالیو په خپله دوه‌یمه لوبه کې له انګلستان سره مخ شي. افغانستان په لومړۍ لوبه کې له سویلي افریقا څخه ماتې خوړلې ده.

د هېواد په ګوټ ګوټ کې د کرکټ مینه‌وال کولی شي د اتلانو جام ټولې لوبې پر ژوندۍ بڼه له آریانا ټلویزیون ATN څخه وګوري.

د لوبو د معلوماتو او مهالوېش ترلاسه کولو لپاره، د آریانا ټلویزیون او آریانا نیوز ټولنیزې وګورئ.