په کابل کې د پاکستان ځانګړي استازي محمد صادق د افغانستان او پاکستان د همغږۍ ګډې کمېټې د پلاوي پر مشرۍ د بهرنیو چارو وزارت له چارسمبالي( سرپرست) امیر خان متقي سره ولیدل.

د بهرنیو چارو وزارت د عامه اړیکو مشر ضیا احمد تکل په یوه خبرپاڼه کې لیکلي، چې امیر خان متقي د دې غونډې په بهیر کې د کابل او اسلام‌آباد ترمنځ د اړیکو په ځانګړي توګه د افغان کډوالو د جبري ایستلو په اړه، خپله ژوره اندېښنه څرګنده کړه.

امیرخان متقي ټینګار کړی، چې دواړه هېوادونه باید خپلې ستونزې د متقابل باور په فضا کې د خبرو اترو له لارې حل کړي او له هر هغه عمل یا څرګندونو څخه ډډه وکړي، چې د خلکو د کرکې لامل کیږي یا د خلکو احساسات راپاروي.

د پاکستان ځانګړي استازي دا هم ویلي، چې افغانستان او پاکستان ژورې اړیکې لري او دا اړینه ده، چې ستونزې وارزول شي، چې څنګه حل شي.

هغه زیاته کړې، چې په نږدې راتلونکي کې به د پاکستان د لومړي وزیر مرستیال او د بهرنیو چارو وزیر محمد اسحاق ډار کابل ته سفر وکړي او هیله من شو، چې دا سفر به د دواړو خواوو لپاره مثبتې پایلې ولري.

د افغانستان اسلامي امارت د صنایعو او سوداګرۍ وزارت چارسمبالی(سرپرست) نورالدین عزیزي د یو لوړ پوړي پلاوي پر مشرۍ پاکستان ته ولاړ.

د صنایعو او سوداګرۍ وزارت نن( چارشنبه) ویلي، چې د دې سفر موخه د دواړو هېوادونو ترمنځ د سوداګریزو، ټرانزیټي او ټرانسپورټي خنډونو لرې کول او په پاکستان کې د میشتو افغان کډوالو  پر اړوند ننګونو بحث دی.

پویل کیږي ، چې د نوموړي پر مشرۍ پلاوی به ن د افغان کډوالو او سوداګرو له یو شمېر استازو سره د سفارت پر کوربتوب وګوري.

د افغانستان لپاره د امریکا پخواني استازي زلمي خلیلزاد د دې احتمال په اړه اندېښنه څرګنده کړې، چې پاکستان به د کډوالو د ایستلو پر پلمه د داعش جنګیالي افغانستان ته واړوي.

زلمي خلیلزاد نن (چارشنبه) په ایکس پاڼه کې ولیکل: “باخبره افرادو راته ويلي؛ دوی له دې اندېښمن دي، چې پاکستان ممکن د افغان کډوالو د جبري ایستلو تر چتر لاندې داعش ترهګر افغانستان ته ولیږدوي. “زه هم دا اندېښنه لرم.”

خلیلزاد پدې اړه نور څه ندي ویلي او دا یې هم روښانه کړې نده، چې له “باخبره افرادو” څخه یې مطلب څوک دی.

دا په داسې حال کې ده، چې اسلامي امارت له ډېرې مودې راپدېخوا له داعش سره مبارزه کوي او پخوا یې پاکستان له دې ډلې پر ملاتړ تورن کړی و.

د روان کال د جنورۍ په میاشت کې اسلامي امارت څرګنده کړې وه، چې د داعش ډله د پاکستان په خاوره کې روزنیز مرکزونه لري.

د خلیلزاد وروستۍ څرګندونې په داسې حال کې رابورته شوې، چې پاکستان د سلګونو زره افغان کډوالو د ایستلو لپاره د دوه‌یم پړاو هڅې ګړندۍ کړې دي.

پاکستان د ۲۰۲۳ ز.کال په اوکټوبر کې د بې اسنادو افغان کډوالو د ایستلو بهیر پیل کړ؛ خو په ډسمبر کې یې د نوي برېکړې له مخې د اپریل پر لومړۍ د جبري ایستلو بهیر چتک کړ.

د یادونې ده، چې یوازې د روانې میاشتې په لومړیو دوه اوونیو کې له ۴۵ زره څخه ډېر افغانان هېواد ته جبري راستانه شوي دي.